Read kapsiki Yɛ Ŋgaɗe ghə 2 Bible Online

Yɛ Ŋgaɗe ghə 2 - kapsiki bible

Yɛ Ŋgaɗe ghə 2

¹Amaga, nahe Shala kezhiɓəaghe ləmbə kənəa meleme ta Siyon le wənə le wənə gɛ wa! Sawa pelɛ ghweme ne, nahe ŋkɛ keneghakawa zləvəa Israyɛl kasawa kadzete hɛɗi. Kese ŋkɛ kazəzə ŋkwa keve seɗa ta ŋkɛ te vecia hwepe wənə ta ŋkɛ we.

²Nahe Shala kezamte sebe kakwa zhɛma heli te pɛtɛa wəvea Zhakob. Le wənə le wənə ne, nahe ŋkɛ keŋzlamte meleme nyi berete berete ta Zhəwda, nahe ŋkɛ kempəate hɛ te hɛɗi. Nahe ŋkɛ kekelemte zləvə te meghe ba'a mbelia ŋkɛ nyi te ghə.

³Ma mbe ghwə ta hwepe wənəa ŋkɛ ne, nahe ŋkɛ kezamte pɛtɛa berete ta Israyɛl. Nahe ŋkɛ kenzanyɛ kesate te ŋkwa vəa ŋkwa nya se nde ghema. Mbe hɛɗia Zhakob ne, nahe ŋkɛ kendəte wəsə kala ghwə nya keteremte ŋkwa nya dzeyi yite.

⁴Kala nde ghema ne, nahe ŋkɛ kepenakete rəgia ŋkɛ, ɗeke ɗeke dzeve kwa zeme ta ŋkɛ kahe have. Kala nde jaga ne, nahe ŋkɛ kempəmte pɛtɛa mbeli nyi nza ntsə te hɛ. Nahe ŋkɛ kebetaghe hwepe wənəa ŋkɛ kala ghwə kənəa ghɛa Shala nya mbe Siyon.

⁵Nahe Shala kemenete kala nde ghema, nahe ŋkɛ kezamte sebe te Israyɛl ba'a pɛtɛa ghɛ ganjia ŋkɛ. Nahe ŋkɛ keŋzlamte zli nya dzeyi yite ba'a kepesleyi yirə ba'a ŋgaɗe ghə te yayata ŋkwa hwa ka Zhəwda.

⁶Nahe ŋkɛ kedzawa ntsa ta ŋkɛ le berete, nahe ŋkɛ keŋzlamte ŋkwa kebegeme geva ta ŋkɛ. Mbe Siyon ne, nahe Mahwətə kendeke nda zaghə yɛ vecia gəsəkə ba'a yɛ veci kezhɛne mpi ke mbeli. Ma mbe ghwə ta hwepe wənəa ŋkɛ ne, nahe ŋkɛ kekelemte zləvə te meghe ba'a ka dzeghe Shala.

⁷Nahe Shala keneghamte reghwetɛa ŋkɛ, nahe ŋkɛ kewəfəyite ghɛa ŋkɛ. Ma zli nyi dzeyi yitea ghɛ ganjia ŋkɛ ne, nahe ŋkɛ kevame hɛ mbe dzeve ta nde jaga. Ma mbe ghɛa Mahwətə ne, gaka ya shɛ kala nya te vecia gəsəkə.

⁸Nahe Mahwətə ketarete za sebe te zli nya yitea meleme ta Siyon. Keghereŋe ŋkɛ yitea ŋzla ŋkwa hwa'a te za ta sebe te pɛtɛa wəshi we. Nahe ŋkɛ kevate ɗa te zli nyi bake, nahe hɛ keŋzlanji bake nci.

⁹Nahe yɛ mɛ degha ta Siyon keŋzlanji, nahe Shala kehwəshimte wəshi keŋzle ta nci. Nahe meghea ŋkɛ ba'a mbelia ŋkɛ nyi te ghə kenza kaka mavashi hwa kweci hwelefefi. Nde teke nda wəsə mahalegə ke mbeli shɛ we. Kezhɛne ka mɛ ŋkwa ta ŋkɛ kanakɛ wəsə nya kese va Mahwətə we.

¹⁰Ma mbelia jama nyi mbe meleme ta Siyon ne, nahe hɛ kenza kwekwelebəhə hwa hɛɗi, wəsə shɛ kageze hɛ we. Nahe ghəa nci kenza bətə mbe keləwə, nahe hɛ kehwehwepahwe wəsə hwa hwə. Ma deghelɛshi nyi mbe Zhɛrəzalɛm ne, nahe hɛ keŋeŋame ghə mbe hɛɗi.

¹¹Nahe ntsə ta ɗa keghare va nehwene, nahe mehele ta ɗa ketaze, kazhɛne wənəa ɗa kazereghete ndiremi nya te mbelia ɗa we. Kwa nza ŋkɛ ne, kampə ŋwalea fəshi dzeyi te ŋkwa kebeke nyi mbe meleme.

¹²Ma ke hɛ sha 'yɛwe va megheyɛa nci: «Tema wəsə kezeme ba'a wəsə kesa wa?» Bete yabete hɛ kala mbeli nyi ɗakɛ zhi dzeyi te ŋkwa kebeke nyi mbe meleme ba'a mpə yampə hɛ kwa seɗa va megheyɛa nci.

¹³Meleme ta Zhɛrəzalɛm, keɗepe ghena kegeze 'ya ŋa zhɛkwa we. Wəsə shɛ kayipəte geva nza ta ŋa le we. Meleme ta Siyon nya ganyɛ, wa wəsə keyipə pa nya geze ŋa 'ya kezha gweɗakwete ŋa wa? Nahe ndiremia ŋa kenza wəbake kala ndərə. Wa nde nza kambete ŋa wa?

¹⁴Deke wəshi tseŋwə ba'a nyi ɗema zləvə te hɛ yanakɛ ka mɛ ŋkwa ta ŋa kezha gha. Kencɛte fete ta ŋa nya kenza kazhɛrete nza ta ŋa hɛ we. Nahe hɛ ketegheke yɛ tseŋwə ba'a yɛ ghena keghwete ŋkwa kezha gha.

¹⁵Ma mbeli pɛtɛ kedzeghwa kwa hweŋkwa ne, kampi dzeve hɛ yitea ŋzla ta ŋa. Kavɛ figwə hɛ ba'a kakeɗeŋe ghə hɛ yitea gha meleme ta Zhɛrəzalɛm, ma ke hɛ: «Meleme nya se nya mbeli kaheka kaNdeɗe nya ganyɛ ba'a kaZlama ta hɛɗi lema nya tse na?»

¹⁶Kageze ghena pɛtɛa ka ghema ta ŋa te gha. Kavɛ figwə hɛ ba'a kanca slene hɛ. Ma ke hɛ sha geze: «Nahe gheɓəmə kendahwe ŋkɛ. Yawa, wa nya veci nya neghe gheɓəmə nya: nahe gheɓəmə kesləyi ŋkɛ, nahe gheɓəmə kenakɛ ŋkɛ!»

¹⁷Nahe Mahwətə kemenete wəsə nya zəzəte ŋkɛ, nahe ŋkɛ keyipəyi ghena ta ŋkɛ kwa, ghena nya tarete ŋkɛ vəashi. Nahe ŋkɛ keŋzlamte ŋa kakwa zhɛma heli. Nahe ŋkɛ kendeke nda zlama ke nde ghema laka ndiremia nya te gha, nahe ŋkɛ kemtsehete berete ke ka jaga ta ŋa.

¹⁸Meleme ta Siyon, tsa nda lewela ke Shala le wənə kwetɛŋe. Zli nya yitea meleme, bete nehwene kala ghwa veci le viɗi. Zhɛnema mpi na ma, sərəakɛma nehwene na ma.

¹⁹Sate meslete, tsa lewela kevə kevə heviɗi. Vənəhwəyi ghena nyi kwa wənəa ŋa kala yɛmə kwa kema ta Shala. Kafe dzeve ta ŋa dzeme laka gheŋkɛ kezha mbele ŋwalea fəshia ŋa nyi kempə va ma dzeyi kwa yɛ baŋwa ta hweŋkwa ŋkɛ.

²⁰Mahwətə, neweve ba'a veregheve wəndə nya mene nda nya na kala nya gi! Nahe ŋkɛ kehi kazeme ŋwalea nci, ŋwalea fəshia nci nyi ɗehwe hɛ mi na? Nahe ŋkɛ kehi kampə ka dzeghe Shala ba'a ka mɛ ŋkwa mbeli mbe ghɛa ŋa na?

²¹Nahe megelɛshi ba'a meha mehɛɗi kenza ɓeɓelayɛ dzeyi kwa yɛ hweŋkwa. Nahe deghelɛshia ɗa ba'a mempɛhwetɛtia ɗa kenza selekə lekə kempə mpə va kafayɛ. Ma te vecia hwepe wənəa ŋa ne, nahe na kempəmte hɛ ba'a keghazlemte hɛ kakwa zhɛma heli.

²²Nahe na kehekakɛ ka ghedəkwəa ɗa nyi ghazlənə 'ya va hɛ kala nya te vecia gəsəkə. Mahwətə, ma te veci nya hwepenyɛ wənəa ŋa ne, wəndə shɛ kembelenyɛ we, wəndə shɛ ketene teghweme we. Ma ŋwalea nyi dəkwəte 'ya ba'a nyi ɗehwe 'ya kwele kwele ne, nahe nde ghema ta ɗa kezamte sebe te hɛ.