Read kapsiki Yɛ Ŋgaɗe ghə 4 Bible Online

Yɛ Ŋgaɗe ghə 4 - kapsiki bible

Yɛ Ŋgaɗe ghə 4

¹Ayaga! Kezhɛne mze kwa tere tere keslesla we, kezhɛne mze ganyɛa shɛ kaɓayɛ ɓayɛ we. Nahe pelɛ nyi keveyi geva tekeleke kenza ketaze taze dzeyi kwa yɛ hweŋkwa gɛ wa!

²Tsema zhɛrenji ŋwalea Siyon, ghenci nyi kese kala mze kwa tere tere ganyɛ, gəmə kala ghwelepe rekɛ nyi ŋate kwa ŋa ghene gɛ wa?

³Ya yɛ kelɛ gamba ne, kasa nda ŋ'wa hɛ ke ŋwalea nci. Ama nahe hwelefe ta ɗa kenza kala ma nya ndiremia mehele, kala zhenɛgə nya te ɓerama.

⁴Kandeɓe ghɛnia velɛnjɛ yitea meghena va ndere. Ka'yɛwe wəsə kezeme ŋwale, ama wəndə keve nda ŋkɛ shɛ ke hɛ we.

⁵Ma mbeli nyi kese kazeme wəshi ganji ne, dzeyi kwa yɛ hweŋkwa mpə hɛ. Ma mbeli nyi kekele mbe mcɛlə ne, kəsə yamese hɛ le dzeve ta nci.

⁶Nahe fete ta hwelefe ta ɗa kenza wəba ma ke fete ta mbeli nyi mbe Sodome. Kala metɛ ta ntsə zamte geva melemea shɛ. Wəndə shɛ keslave kasate te ŋkwa yite we.

⁷Welɛlɛ ma se mbeli nyi te ghəa n'yɛ ke kwacakelɛ, tɛawetɛa ma hweta ta geva ta nci ke ŋ'wa ba'a ghɛmɛ ma geva ta nci ke pelɛ kwa ghɛmɛ. Yipə yipə se hweŋkwa ta mimi nyi dzeyi te hɛ le pelɛ kwa lɛa lɛa ghweme.

⁸Ama tsetsenya ne, ɗɛkeɗɛ ma kema ta nci ke wəvene, kazhɛne mbeli kaɗepe hɛ kwa hweŋkwa we. Deke hweta nde tene kənəa 'yɛ'yɛa nci, hweta nya keghwele ghwele kala sheghwə.

⁹Megela ma mte kwamte mpa ke mte va ma, ke nza kedene dene va titikwə wəsə kezeme.

¹⁰Nahe mi nyi keɗehwe ŋwalea nci fate fate ketahwe ŋwalea nci. Nahe hɛ kezhɛrenji kawəsə kezeme ta nci vəa ŋkwa nya me ndiremi te hwelefe ta ɗa.

¹¹Nahe Mahwətə keterekete hwepe wənəa ŋkɛ, nahe ŋkɛ kebeteyi ghwə ta hwepe ta wənəa ŋkɛ. Ma mbe Siyon ne, nahe ŋkɛ kendəte ghwə nya keteremte yɛ shihəa ŋkɛ.

¹²Meghe shɛ kwake te hɛɗi keɗema wəndə shɛ te hɛɗi lema kese kazəzə wərə katsala nde ghema kadzeki Zhɛrəzalɛm we.

¹³Ma nda menete geva wəsə nya ne, va jaɗafa ta ka mɛ ŋkwa ta ŋkɛ, va fete ta ka dzeghe Shala ta ŋkɛ. Nahe hɛ kempəmte mbeli nyi tiɗiɗi mbe.

¹⁴Ndeŋe yandeŋe hɛ dzeyi kwa yɛ hweŋkwa kala ka ghwələa kɛfi. Nahe hɛ kenza wale wale va mimi, kakwaɗakɛ lekwesa ta nci mbeli we.

¹⁵Ma ke mbeli sha tsa nda lewela ke hɛ: «Hendemte mə geva, nahe hɛ kenza wale wale! Hendemte mə geva! Hendemte mə geva! Kwaɗema wəsə yɛ ma!» Ma vəa ŋkwa nya hwɛ ba'a nya ndeŋe hɛ ne, ma ke kweci hwelefefi gezete: «Katenzanji hɛ hwa ghen'yɛ we.»

¹⁶Mahwətə le ghəa ŋkɛ nde tazemte hɛ, kazhɛne ŋkɛ kaɗe kanewe hɛ we. Kahawe mbeli va ka dzeghe Shala we, kazhɛ heli mbeli yitea meha mehɛɗi we.

¹⁷Nda leɓe yaleɓe ntsə ta n'yɛ va neghe kemane nya keɗema kase. Nahe n'yɛ kese kaneghe se ta hwelefe nya kesema kezha mbele n'yɛ mɛa ghweme.

¹⁸Yɛ ŋkeɗe ta seɗa ta n'yɛ yanewe mbeli kezha fɛa n'yɛ kadzete yɛ ŋkwa kebeke ta n'yɛ. Nahe kiɗi ta n'yɛ kehendeke geva, nahe nza ta n'yɛ ketereke, nahe kiɗi ta n'yɛ kese.

¹⁹Ma mbeli nyi kekeka n'yɛ ne, wɛrewɛ ma hɛ ke zele nyi yitea ghweme. Kakeka n'yɛ hɛ dzeme hwa yɛ ghweme, kaŋsle n'yɛ ghweɓe hɛ te ɓerama.

²⁰Ma wəndə nya kese kampia n'yɛ, meghe nya ntave Mahwətə ne, nahe ŋkɛ keteɗe te keleŋa ta nci. Ma ke ghen'yɛ sha se kageze te ghəa ŋkɛ: «Kwa ghwədərəa ŋa ne, katenza n'yɛ hwa kweci hwelefefi.»

²¹Hwelefe ta Ɛdom, zlama ba'a wetse, gha nya kenza te hɛɗia Əws gɛ! Katesa hwepe wənə ta Shala na perə. Kateghwəyi na ba'a katenza na mederelaŋe.

²²Meleme ta Siyon, nahe fete ta ŋa ketereke. Katezhɛne mbeli kakele ŋa kadzete kwete hɛɗi we. Meleme ta Ɛdom, kateɗa ŋa Shala te fete ta ŋa, katencɛ yɛ jaɗafa ta ŋa ŋkɛ.