Read kapsiki Ɛzɛkiyɛl 12 Bible Online

Ɛzɛkiyɛl 12 - kapsiki bible

Ɛzɛkiyɛl 12

¹Ma ke Mahwətə sha 'ya:

²«Wəndə ŋelɛ, hwa ka ntɛaŋentɛa ghə nza ŋa na. Ntsə ya te hɛ, ama kanakɛ ŋkwa hɛ we, sleme ya te hɛ, ama kafate ghena hɛ va nya nza hɛ kaka ntɛaŋentɛa ghə we.

³Vatse gɛ wəndə ŋelɛ, tsehete wəshi nyi kehi kala wəndə nya keleghe mbeli kadzete kwete hɛɗi shɛ na slə kwa ghə veci, kwa ntsə ta nci. Slə ŋa te ŋkwa nya nza nya na kadzete kwete ŋkwa. Menete kwa ntsə ta mbeli pɛtɛ nda kwete katefave hɛ kaka ntɛaŋentɛa ghə hɛ.

⁴Ma kwa ghə veci ne, katefə wəshia ŋa kashave kwa ntsə ta nci. Ma hetɛhwɛɗi, kateslə na kwa ntsə ta nci kala nya slə mbeli nyi fə mbeli kadzete ŋkwa.

⁵Ma kwa ntsə ta nci ne, katentsa wəfela na te zli nya yitea meleme kezha fə wəshia ŋa shave te.

⁶Ma kwa ntsə ta nci ne, katefə wəshia ŋa na kwelɛ welɛ, katefə hɛ na kashave heviɗi. Katedəpə kema ta ŋa na yitea ɗema na ɗepe ŋkwa nya lə na te, kwa nza ŋkɛ nahe 'ya keveyi ŋa kawəsə nya kencɛ nda wəsə nya ketemene geva ke ka Israyɛl.»

⁷Pa 'ya menete wəsə nya gezave ɗa Shala. Pa 'ya fəakave wəshia ɗa kala wəndə nya kele mbeli kadzete kwete ŋkwa kwa ghə veci. Ma hetɛhwɛɗi ne, mpahwe 'ya ntsate wəfela te zli le dzeve. Nahe mbeli kenakɛ ɗa nda slə 'ya heviɗi le wəshia ɗa kwelɛ welɛ.

⁸Te hendɛ ta ŋkwa ne, ma ke Mahwətə sha 'ya:

⁹«Wəndə ŋelɛ, kese ka Israyɛl nyi ntɛaŋentɛa ghə nyi ka'yɛwe wəsə nya menete nya na va gha tse yi?

¹⁰Ma pa na sha zhɛne nda ke hɛ: ‹Wa nya ghena nya geze Shala Mahwətə nya: Kaŋa wəndə nya te ghə mbe Zhɛrəzalɛm ba'a kaŋa ka pɛtɛ Israyɛl nyi mbe gezete geva ghena nya.›

¹¹Ma pa na sha geze nda ke hɛ: Wəsə nya ketemene geva yancɛte ŋayɛ 'ya. Ma wəsə nya menete nya 'ya ne, gheŋkɛ yatemene ŋayɛ mbeli, kwa nza ŋkɛ katekesehwe ŋayɛ mbeli, katedzete ŋayɛ kadzete kwete hɛɗi.

¹²Ma wəndə nya te ghəa ŋayɛ ne, katefə wəshia ŋkɛ ŋkɛ kwelɛ welɛ heviɗi kezha slə shave mbe meleme. Katentsa wəfela mbeli te zli kezha jive ŋkɛ te. Katedəpə wəsə ŋkɛ kwa kema yitea ɗema kanakɛ ŋkwa nya telə ŋkɛ te.

¹³Ma 'ya Mahwətə ne, kateŋa keleŋa 'ya kezha kese ŋkɛ. Katekele ŋkɛ 'ya kajive Babilone nya te hɛɗia Kaldɛ. Katemte ŋkɛ te hɛɗia shɛ kaɗema ŋkɛ kenakɛ ŋkɛ.

¹⁴Kwetɛ kwetɛŋe tetaze mbeli nyi yite, mbeli keya ba'a ka sewajɛa ŋkɛ 'ya laka yayata bela, kwa sebe ta ŋkɛ, katekeka hɛ 'ya le kafayɛ.

¹⁵Ma tsagha, kateɗepete hɛ 'ya ya kaMahwətə, vəa ŋkwa nya tetazeyi hɛ 'ya dzeyi hwa kweci hwelefefi ba'a dzeyi te kweci hɛɗi.

¹⁶Ama katetene kweci mbeli nyi kembelenji va mpa, ma ba'a ba 'ya kezha geze wəshi nyi ndiremi ndiremi kashasha nyi menete hɛ hwa kweci hwelefefi nyi tenza hɛ hwa hɛ hɛ. Ma tsagha, kateɗepete hɛ 'ya ya kaMahwətə.»

¹⁷Ma ke Mahwətə sha 'ya:

¹⁸«Wəndə ŋelɛ, zeme ɗafa ta ŋa le bare bare ba'a sa yɛməa ŋa le ghazlənə ba'a heɗe kema.

¹⁹Ma pa na sha geze nda ke mbeli nyi te hɛɗi: Wa nya ghena nya geze nda Shala Mahwətə ke ka Zhɛrəzalɛm nyi te hɛɗia Israyɛl nya: Katezeme ɗafa ta nci hɛ le kema teheɗe ba'a katesa yɛməa nci hɛ le ghazlənə. Kwa nza ŋkɛ ketaze taze tenza hɛɗia nci kaɗema kwete wəsə katenza te, va slene berete nyi mene mbeli nyi te pɛtɛ.

²⁰Kakwəfi tenza meleme nyi nza mbeli mbe, kaɓerama tenza ŋkwa nya te hɛɗi. Ma tsagha, kateɗepete yɛ 'ya ya kaMahwətə.»

²¹Ma ke Mahwətə sha 'ya:

²²«Wəndə ŋelɛ, wa raberə gegeze ghena mbeli kaghena ŋela: ‹Jive yajive və te kema, ama ghena ta nde mɛ ŋkwa shɛ keyipəyi geva kwa we›, ke mbeli te ghəa hɛɗia Israyɛl wa?

²³Ma pa na sha hɛ: Wa nya ghena nya geze Shala Mahwətə nya: 'Ya kateza sebe te ghena ŋela nya, mba mbeli kategeze mbe Israyɛl we. Ama pa sha hɛ: ‹Takwa takwa və nya teyipə geva pɛtɛa ghena ta nde mɛ ŋkwa kwa.›

²⁴Kwa nza ŋkɛ ne, katezhɛne yɛ wəshi tseŋwə, ya yɛ ghena ghwete ŋkwa kanza hwa ka Israyɛl we.

²⁵Ma yayata ghena nya gezete 'ya Mahwətə ne, kateyipə geva ŋkɛ kadzawa kaɗema dera yite. Mba ŋayɛ yɛ teghweme, gheyɛ ka ntɛaŋentɛa ghə nda teyipə ghena nya gezete 'ya 'ya kadzawa. 'Ya Shala Mahwətə nde gezete.»

²⁶Ma ke Mahwətə sha 'ya:

²⁷«Wəndə ŋelɛ, wa nya ghena nya geze ka Israyɛl nya: ‹Ma ghena nyi geze nyi wəndə nya ne, kenza kaghena nyi hendɛ hendɛ we. Ghena nyi ketemene geva te kwete hɛ yageze ŋkɛ.›

²⁸Vatse gɛ ne, ma pa na sha hɛ: Wa nya ghena nya geze Shala Mahwətə nya: Kwete shɛ hwa ghena nyi gezete 'ya katedera we. Kateyipə geva ghena nyi gezete 'ya kadzawa. 'Ya Shala Mahwətə nde gezete.»