Read kapsiki Ɛzɛkiyɛl 16 Bible Online

Ɛzɛkiyɛl 16 - kapsiki bible

Ɛzɛkiyɛl 16

²«Wəndə ŋelɛ, ncɛte nda wəshia ŋkɛ nyi ndiremi ndiremi kashasha ke Zhɛrəzalɛm.

³Ma pa na sha geze: Wa nya ghena nya geze nda Shala Mahwətə ke Zhɛrəzalɛm nya: Hɛɗia Kanan ya kahɛɗia ka shihɛ ŋa, te yake geva na. Nde Amor yiteyɛ ŋa ba'a wəzha ta ka Hɛt meyɛ ŋa.

⁴Ma te veci nya yake ŋa mbeli ne, keslamte zemele ta ŋa mbeli we, kepɛkɛ ŋa mbeli hwa yɛmə yitea nza na wɛŋe we, kebehwekɛ geva ta ŋa mbeli le ghwene ba'a kepeɗeyi ŋa mbeli mbe lekwesa we.

⁵Wəndə shɛ kese kanewe ŋa le zhɛ heli kezha menete ŋa kwete hwa wəshi nyi we. Ama dewə se ghəa mbeli te gha ba'a nahe mbeli keneghamte ŋa hwa gamba te veci nya yake geva na.

⁶Ma kwa dzeyi 'ya vare gha ne, dəkwə 'ya te gha patsa patsa mbe mimi. Pa 'ya gezete ŋa kanza teghweme ya kwela nza na bətə mbe mimi. Kaganda ne, pa 'ya gezete ŋa kanza teghweme.

⁷Pa 'ya kelete ŋa kala wəsə nya kepese kwamte mbe wəve. Pa na pese, pa geva ta ŋa tsa ba'a pa na zhɛre ŋa kawəzha nya ndeɗe. Pa ŋ'wa shave te gha ba'a pa na hate shinti. Ama derelɛŋe lɛŋe na.

⁸Ma te kwete hɛ kwa dzeyi 'ya vare gha ne, pa 'ya nakɛ nahe na kemene male. Tagha, pa 'ya pelakaghe karalamea ɗa kənəa gha kezha dəpə nza ta ŋa mederelaŋe. Pa 'ya meɗeyi ŋa mɛ ba'a menete jikə geva le gha. Ma tagha gɛ, kaŋa ɗa na, 'ya Shala Mahwətə nde gezete.

⁹Pa 'ya pɛmte mimi nya te gha le yɛmə, kwa sebe ta ŋkɛ, pa 'ya fikɛ ŋa le n'yi nya nza 'wərdə hwe.

¹⁰Pa 'ya ndeke ŋa lekwesa kwa tsa tsa, tsahwa hweta nya shɛanɛa, zlave pawa ba'a pa 'ya pelakaghe wəsə nya nza zləvə te kənəa ghəa ŋa.

¹¹Pa 'ya pesakɛ geva ta ŋa le wəshi kepesa geva. Pa 'ya seɗeyi ŋa takase kwa dzeve ba'a zhɛɗa kwa welɛ.

¹²Pa 'ya veyi geɗə mbe mɛ va gha, wəshi kedzembe sleme mbe sleme va gha ba'a derə meghe mbe ghəa ŋa.

¹³Kamze kwa tere tere ba'a kamze kwa tɛawetɛa wəshi kepesa geva ta ŋa, lekwesa pawa nyi slɛahe slɛahe, lekwesa nyi nza zləvə te ba'a nyi ketsa tsa ya va gha. Hə kwa mɗɛ mɗɛ, yɛməa mze ba'a n'yi ya kawəshi kezeme ta ŋa. Tagha gɛ, pa na zhɛre ŋa kendeɗe ŋa, tserame kamale ta meghe.

¹⁴Va ndeɗea ŋa gɛ ne, pa zləvəa ŋa nya zlahe zlahe dzemtenyɛ te hɛɗi lema, va nya pesakɛ ŋa 'ya zlahe. 'Ya Shala Mahwətə nde gezete.»

¹⁵Ama nahe na kevate ghə te ndeɗea ŋa ba'a te dzemte ta zləvəa ŋa kezha mene mefətekwə. Nahe na kendeke nda ghəa ŋa ke mene vale tahe le pɛtɛa mbeli nyi kedzeyi vare gha, kaŋa nci na.

¹⁶Pa na fəte lekwesa ta ŋa nyi nza mama ta yirə kwele kwele te kezha pesa ŋkwa nyi hwa kələŋəa ŋa le hɛ ba'a pa na menete mefətekwə pelɛagha. Kegha wəsə nya kala nya kamenete geva we, katezhɛne ŋkɛ kamene geva we.

¹⁷Pa na fəte wəshi kepesa geva ta ŋa nyi kamze kwa tere tere ba'a kamze kwa tɛawetɛa nyi fəave ŋa 'ya kezha vɛsə wəshi nyi zhɛrete mbeli kashala nyi kazhili. Kwa sebe ta ŋkɛ, ntəŋə na yitea mene mefətekwə le hɛ.

¹⁸Pa na pepelakaghe lekwesa ta ŋa nyi ketsa tsa kənəa hɛ, pa na veyi 'wərdəa ɗa ba'a n'yia ɗa kwa kema ta nci.

¹⁹Ma ɗafa, hə kwa mɗɛ mɗɛ, n'yi ba'a yɛməa mze nyi ndeke ŋa nyi 'ya kezha zeme na ne, nahe na kedzeghekɛ melɛ le hɛ kezha gwəfə nda ghə ke hɛ. 'Ya Shala Mahwətə nde gezete.

²⁰Pa na dzeghekɛ nda melɛ ke hɛ le ŋwale tezhili ba'a ŋwalea kwɛa nyi yake ɗa na kezha zeme hɛ hɛ. Dewə newe mene mefətekwəa ŋa nya na na?

²¹Nahe na keslamte ghə te ŋwalea ɗa ba'a nahe na kedzeghekɛ nda melɛ le hɛ ke wəshi nyi zhɛrete na kashala!

²²Ma mbe wəshi nyi ndiremi ndiremi kashasha pɛtɛ ta ŋa ba'a mbe mene mefətekwəa ŋa nyi ne, nahe na kezaghəyite nza ta ŋa nya kawəzege, vəa ŋkwa nya se na derelɛŋe lɛŋe ba'a nya se na kadevələ geva hwa mimi.

²³Kwa sebe ta wəsə kwa ndiremi nya menete nya na ne, ɗa ya te gha. Aya, wa nya ɗa te gha gɛ! 'Ya Shala Mahwətə nde gezete.

²⁴Tərəsə tərəsə na kevevaɗete hɛɗi, nahe na keŋate nda ŋkwa nyi dzəgwəɗəmə dzəgwəɗəmə ke ghəa ŋa dzeyi te yɛ ŋkwa kebeke.

²⁵Nahe na keŋate ŋkwa nya dzəgwəɗəmə dzeyi mɛa yayata baŋwa ta hweŋkwa, nahe na kezhɛremte ndeɗea ŋa wale wale, nahe na kepelave nda ghəa ŋa ke yayata wəndə nya kedzeghwa kwa hweŋkwa ba'a kemtsehete mene mefətekwəa ŋa.

²⁶Nahe na kemenete mefətekwə le ka Ɛzhipte, ka ghedəkwəa ŋa nyi deke deke. Tsagha ne, nahe na hwepete ɗa wənəa ɗa le kwelea mene mefətekwəa ŋa.

²⁷Vatse ncɛte berete ta ɗa 'ya te gha: nahe 'ya kedewəmte ŋa wəshi kezeme ba'a kepelave nda ŋa ke mawe ta ka jaga ta ŋa nyi kaŋwalea kwɛa ka Filisti, nyi se hawe kazhɛ nda ke hɛ va gwaya ta ŋa.

²⁸Ma kwa behema na ne, ntəŋə na yitea mene mefətekwə le ka Asiri. Ya kwela nza ŋkɛ tsagha ne, kekete na shanda we.

²⁹Kwele kwele menete mefətekwə na te hɛɗia ka zhɛre dzeve, mbe Babilone. Ya le mbelia shɛhɛ ne, kenaka na kabehe we.

³⁰Ayaga, kewəba gwaya va gha! Ma kwa nza na kamene wəshia shɛhɛ ne, kala male nya keɗepemte mene mefətekwə na. 'Ya Shala Mahwətə nde gezete.

³¹Tərəsə tərəsə na kevevaɗete hɛɗi dzeyi mɛa yayata baŋwa ta hweŋkwa ba'a nahe na kehite ŋkwa nya dzəgwəɗəmə dzeyi te yɛ ŋkwa kebeke, ama kese na ka'yɛwe zhɛme kala male nya kemene mefətekwə we.

³²Kala male nya kemene vale tahe nya keɗehwe kweci mbeli sərə za nta na.

³³Wəshi yafə nda mbeli ke pɛtɛa mi nyi kemene mefətekwə, ama gha nde ɗa nda wəshi ke ka meghwateshia ŋa. Pa na ɗave nda wəshi ke hɛ, yitea se hɛ te yayata ŋkwa kaɓelahe le gha.

³⁴Ama gha mbe mene mefətekwəa ŋa ne, tekeleke le ŋa kweci mi mene na. Kese mbeli kazele ŋa we, kese mbeli kaɗa ŋa wəsə we, ama gha nde ŋki nda zhɛme ke hɛ. Vatse gɛ ne, tekeleke menete na le ŋa ŋa.

³⁵Yawa, gha Zhɛrəzalɛm nya kamale mefətekwə, fa ghena ta Mahwətə.

³⁶Wa nya ghena nya geze 'ya, Shala Mahwətə nya: Ma va nya nza ŋa na mederelaŋe ba'a nya ghweneyite zeweve ta ŋa na yitea sefə mbe mene mefətekwəa ŋa le ka meghwateshia ŋa ba'a le pɛtɛa wəshi ndiremi ndiremi kashasha ta ŋa nyi zhɛrete nyi na kashala, tewəmbəreke mimia ŋwalea ŋa nyi fəave nda na ke hɛ ne,

³⁷vatse gɛ, 'ya katetsene ka meghwateshia ŋa nyi vate ghə nyi na te, pɛtɛa mbeli nyi ɗehwe nyi na ba'a nyi ɗema nyi na. Katetseneke ŋa hɛ 'ya se te yayata ŋkwa, kateve nda zeweve ta ŋa 'ya yitea sefə ke hɛ. Pɛtɛ tenewemte zeweve ta ŋa hɛ.

³⁸Katemeha ghwə 'ya te gha kala mi nyi kemene vale tahe ba'a nyi kempə ŋkwa. Katedevələ ŋa 'ya mbe mimi va hwepe ta wənəa ba'a va zlɛa ɗa.

³⁹Kateve ŋa 'ya mbe dzeve ta nci. Katedase hɛɗi nyi tsenete na hɛ ba'a kateŋzlamte ŋkwa nyi dzəgwəɗəmə dzəgwəɗəmə nyi ŋate na hɛ. Kateseɗemte lekwesa hɛ kənəa gha ba'a katefəhwe wəshi kepesa geva ta ŋa nyi ganji ganji hɛ. Derelɛŋe lɛŋe tesərə ŋa hɛ.

⁴⁰Kwa sebe ta ŋkɛ, kateghwene mbeli hɛ yitea gha. Katejɛwə ŋa hɛ le pelɛ, katenzere ŋa hɛ le kafayɛ,

⁴¹katetere yɛ ghɛa ŋa hɛ le ghwə, katesla ghwə ta ŋa hɛ kwa kema ta mi kwele kwele. Kateza sebe 'ya te nza ta ŋa kamale mefətekwə, katezhɛne na kaŋki nda zhɛme ke ka meghwateshia ŋa we.

⁴²Katetereke hwepe wənəa ɗa 'ya te gha. Ma vəa ŋkwa tekelemte geva zlɛa ɗa seyi kənəa gha ne, kategweɗakwe 'ya, katezhɛne wənəa ɗa kabeze we.

⁴³Ma kwa ɗema na kezəzəte və nyi se na kawəzege ba'a kwa bezemte ɗa wənə na le slene ta ŋa nyi ne, ma 'ya le ŋa ɗa gɛ, kateve dzeghwa ta ŋa 'ya kwa ghəa ŋa. 'Ya Shala Mahwətə nde gezete. Ashɛ wəsə nya wale wale nya zhɛ ŋkwa hawe ve yajikəave na vare wəshi nyi ndiremi ndiremi kashasha ta ŋa wəka?

⁴⁴Zhɛrəzalɛm, ma tegeze ka geze ghena ŋela te gha: Kala nza ta meghekɛ nza wəzha makwa.

⁴⁵Wəzha ta male nya keɗema ntsə ta za nta ba'a ŋwalea nta na. Yipə yipə na le ŋwalea kwɛa meyɛ ŋa nyi keɗema ntsə ta zhilia nci ba'a ŋwalea nci. Wəzha ta ka Hɛt se meyɛ ŋayɛ ba'a nde Amor se yiteyɛ ŋayɛ.

⁴⁶Yɛ Samari nya laka bela kwa gwela ta ŋa le meleme nyi dzeyi yite ya kawəzha ta meyɛ ŋa nya wəba. Ma wəzha ta meyɛ ŋa nya ɓɛhwɛ, nya laka bela kwa zeme ta ŋa ne, gheŋkɛ yɛ Sodome le meleme nyi dzeyi yite.

⁴⁷Dzeghwa ta nci ba'a wəshi nyi ndiremi ndiremi kashasha ta nci yadambeghə ŋa na kateke, dewə ŋa newe na gɛ na! Ndiremi ma nza ta ŋa ke ŋa nci.

⁴⁸Kazeme ŋa 'ya kafela 'ya Shala Mahwətə kaɗema yɛ wəzha ta meyɛ ŋa Sodome le meleme nyi dzeyi yite kemenete kala gha ba'a meleme nyi dzeyi yitea gha.

⁴⁹Wa nyi fete ta yɛ wəzha ta meyɛ ŋa Sodome le meleme nyi dzeyi yite nyi: kwele kwele se hɛ kakele ghə, megela se hɛ kazeme wəshi kezeme, kese hɛ kagezleŋe ghə we, kese hɛ kakemane ka titikwəa kɛfi ba'a ka dewə ŋeli we.

⁵⁰Nahe hɛ kezhɛrenji kambeli nyi keɗema mbeli kaɓela ŋkwa ba'a kemenete wəshi nyi ndiremi ndiremi kashasha kwa kema ta ɗa. Tagha gɛ, pa 'ya zamte sebe te hɛ te hɛɗi kala nya ɗepe nya na.

⁵¹Ma Samari le ŋa ŋkɛ ne, kemenete bela ta jaɗafa nyi menete na ŋkɛ we. Nahe na kemenete wəshi nyi ndiremi ndiremi kashasha kwele ma ke ŋa ŋkɛ. Nahe na kezhɛrete ŋwalea kwɛa meyɛ ŋa kambeli nyi tiɗiɗi laka wəshi nyi ndiremi ndiremi kashasha nyi menete na.

⁵²Ma tsetsenya gɛ, katezereghe hawe ta ŋa na, gha nya kezhɛrete ŋwalea kwɛa meyɛ ŋa kambeli nyi tiɗiɗi laka wəshi nyi ndiremi ndiremi kashasha nyi menete na. Kambeli nyi tiɗiɗi ma hɛ ke gha. Ma gha perə ne, nza shewə va hawe ba'a kelete ŋ'wəshi nya te gha, va nya zhɛrete ŋwalea kwɛa meyɛ ŋa na kambeli nyi tiɗiɗi.

⁵³Katezhɛne meleme nyi 'ya te ŋkwa nci, katezhɛre nza ta yɛ Sodome le meleme nyi dzeyi yite 'ya, tsagha ŋa yɛ Samari le meleme nyi dzeyi yite. Kakwa keɗaŋe, katezhɛne ŋa 'ya te ŋkwa ŋa kala hɛ.

⁵⁴Ma tsagha gɛ, katenza na shewə va hawe, katezhɛ ŋa hawe va wəshi nyi menete na pɛtɛ, kategweɗakwe nda wənə hɛ ke hɛ.

⁵⁵Katenza Sodome, Samari ba'a meleme nyi dzeyi yitea hɛ te ŋkwa nci nya vəashi. Tsagha tenza na le meleme nyi dzeyi yitea gha perə.

⁵⁶Ma vəa ŋkwa nya nza na mba kazlama te ghəa ŋa ne, ghena ŋkele ntsə yase na kageze te Sodome.

⁵⁷Ma vəa ŋkwa shɛ ne, kenaka 'yaghwa mehele ta ŋa kancɛte geva we. Ma tsetsenya ne, ŋ'wəshi ya te gha va yɛ meleme ta ka Ɛdom le meleme nyi dzeyi yitea hɛ, tsagha va yɛ meleme ta ka Filisti nyi keɗema keɓela shinti mbe ghə va gha.

⁵⁸Ɗaŋeɗa ta wəshi hawe ba'a wəshi nyi ndiremi ndiremi kashasha nyi menete na ya kənəa gha. 'Ya Shala Mahwətə nde gezete.

⁵⁹Wa nya ghena nya geze Shala Mahwətə nya: Kese na kaɓela fela nya zemete na we, ama nahe na kepelemte jikə geva nya menete mə, vatse temene ŋa 'ya kala nya menete ɗa na.

⁶⁰Ama katezaghə jikə geva nya menete 'ya le gha, vəa ŋkwa nya se na kadegheli 'ya we: katemene jikə geva nya kaghala ghala 'ya le gha.

⁶¹Gha perə ne, katezəzə dzeghwa ta ŋa na ba'a katenza na shewə va hawe vəa ŋkwa nya tekemaneve ŋwalea meyɛ ŋa nyi jama jama ba'a nyi ɓɛhwɛ ɓɛhwɛ na. Kateve ŋa hɛ 'ya kaŋwalea kwɛa ŋa, ama kanza hɛ hwa jikə geva ta ɓə we.

⁶²Zhɛrəzalɛm, katezhɛne 'ya kamene jikə geva le gha, ma tsagha, kateɗepete na 'ya ya kaMahwətə.

⁶³Katezəzə wəshi nyi menete na na yitea nza na shewə va hawe ba'a yitea nza mɛa ŋa teŋzle va nya ɗema zləvə te gha. Ama 'ya ne, katekelemte wəshi nyi menete na 'ya te wənə. 'Ya Shala Mahwətə nde gezete.