Read kapsiki Ɛzɛkiyɛl 17 Bible Online

Ɛzɛkiyɛl 17 - kapsiki bible

Ɛzɛkiyɛl 17

¹Ma ke Mahwətə sha 'ya:

²«Wəndə ŋelɛ, gezete nda ghena ŋela ke ka Israyɛl, ɓelate nda ghena keyipə pa ke hɛ.

³Ma pa na sha tegeze nda ke hɛ: Wa nya ghena nya geze Shala Mahwətə nya: Pa kwete zele kewəbanyɛ, nya nza bidzə kejama jamanji, shinti kebiya biyanji ba'a kendeɗe ndeɗenji te. Ntəŋə nde le zlə kadzeme ghweme ta Liban, pa nde ɓeleve dzeve nya biya ma hwa dzeve ta wəfe ta lekeleke.

⁴Pa nde keleghe kadzete hɛɗia ka zhɛre dzeve ba'a mɓeyi mbe meleme ta ka pamte wəshi.

⁵Kwa sebe ta ŋkɛ, laŋe nde kelete kwete dzeve ta wəfe te hɛɗia ka Israyɛl, gepe nde mɓeyi kwa ntsa laka wəfe nya keɗe yɛmə, te ŋkwa nya nza yɛmə kwele kwele.

⁶Pa dzeve ta wəfea shɛ ɗanyɛ ba'a zhɛrenyɛ kawəfe ta rɛzɛŋe nya ndeɗe, nya peslete geva dzeve ta ŋkɛ. Jive laka zele nyagha pesle geva yɛ dzeve ta ŋkɛ ba'a dzeyi mbe hwəa ŋkɛ ha geva slərəa ŋkɛ. Pa nde zhɛrenyɛ kawəfe ta rɛzɛŋe nya kehate dzeve nyi ɓɛhwɛ ɓɛhwɛ ba'a nyi jama jama.

⁷Ama kwa bake ta zele ya shɛ kewəbanyɛ, nya nza bidzə kejama jamanji ba'a shinti kebiya biyanji te. Pa wəfe ta rɛzɛŋe nyagha zhɛreghe yɛ slərəa ŋkɛ ba'a yɛ dzeve ta ŋkɛ laka gheŋkɛ. Ma zəzə nde ne, kwele ma tekemave yɛmə nde kenya te ŋkwa nya mɓeyi geva nde.

⁸Ndagwara mbe wəve ganyɛ mɓete geva nde, mɛa hələ nya nza yɛmə kwele kwele kwa, kezha pesle yɛ dzeve, kezha ya yɛ ya ba'a kezha nza kawəfe ta rɛzɛŋe nya ndeɗe.

⁹Ma 'ya, 'ya Shala Mahwətə 'yɛwete: Katemene wəfe ta rɛzɛŋea shɛ na? Ashɛ nde ghate ta zele nyagha katenteɗe yɛ slərəa ŋkɛ yitea bete ya ta ŋkɛ ba'a yitea ghwele yɛ dzeve kwateɗa ta ŋkɛ wəka? Kezha nteɗe same kwa hɛɗi ne, kazele berete ba'a mbeli kwele kwele nde we.

¹⁰Megela mɓete geva wəfe ta rɛzɛŋea shɛ, ama katemene ŋkɛ na? Vɛkema geva ta sefə same kwa ghweme ne, ashɛ helɛŋe teghwele nde wəka? Te ŋkwa nya hi nde kaɗa teghwele nde.»

¹¹Ma ke Mahwətə sha 'ya:

¹²«'Yɛwakɛ va ka ntɛaŋentɛa ghə nyi kenza ŋkɛ nahe hɛ kefave ghena nya mbe ghena nya. Zəzəte nda ke hɛ tsema tsema dzembenyɛ meghea ka Babilone mbe Zhɛrəzalɛm, keseve meghe ba'a mbeli nyi te ghə ŋkɛ kezha fə hɛ kajive hɛɗia ŋkɛ.

¹³Kwa sebe ta ŋkɛ, pa kelete wəndə mbe hwelefe ta meghe, menete jikə geva le ba'a gezete nda kazeme fela kenza dɛŋe dɛŋe te ghena ta ŋkɛ. Pa ŋkɛ fəhwe mbelia jama nyi te hɛɗi,

¹⁴yitea nza hɛɗia meghea nci ɓɛhwɛ, kadewə berete ba'a yitea hawe nde megela va jikə geva nya menete hɛ.

¹⁵Ama pa meghea ka Zhəwda ɗema ghena ta ŋkɛ, pa ghweneghe nda mbeli ke Ɛzhipte kezha 'yɛwe yɛ gədəwə ba'a ka sewajɛ kwele kwele. Katekemave berete ŋkɛ ba'a katejive ŋkɛ mbe kema va nya menete ŋkɛ tsagha na? Ewə, katepesle ŋkɛ yite va nya ɗema ŋkɛ kese kahawe va jikə geva nya kemenete geva we.

¹⁶Kazeme 'ya kafela 'ya Shala Mahwətə nya teghweme: Katemte meghea shɛ te hɛɗia meghea ka Babilone nya keveyi ŋkɛ te meghe, va nya ɗema ŋkɛ kese kaɓela fela nya zemete ŋkɛ, kese ŋkɛ kahawe va jikə geva nya kemenete geva we. Pelɛ Babilone temte meghea ka Israyɛl.

¹⁷Ya le ka sewajɛa ŋkɛ nyi kwele kwele ba'a nyi berete berete ne, katekemanakɛ ŋkɛ Farawon vəa ŋkwa nya tseneyite hɛɗi ka Babilone yitea zli ba'a nya late ki hɛ kezha mpə mbeli kwele kwele we.

¹⁸Ma kwa ɓelama fela nya zemete ŋkɛ meghea ka Israyɛl ne, kehawete nda hawe ŋkɛ ke jikə geva nya kemenete geva we. Ma kwa menete ŋkɛ tsagha kwa sebe ta nya səkwəte dzeve hɛ ne, katembele ŋkɛ we.

¹⁹Vatse gɛ, wa nya ghena nya geze Shala Mahwətə nya: Kazeme 'ya kafela kave zhɛme ta fete nyi menete ŋkɛ kwa ghəa ŋkɛ, kwa ɓelama fela nya zemete ŋkɛ meghe ba'a kwa pelemte jikə geva nya kemenete geva ŋkɛ.

²⁰Kateŋa keleŋa 'ya kezha kese ŋkɛ. Katekele ŋkɛ 'ya kajive Babilone, pelɛagha temeha ghwə 'ya te, va nya sema ŋkɛ dɛŋe dɛŋe te ghena ta ɗa.

²¹Katempəmte ka katsala ka sewajɛa ŋkɛ 'ya kwamte mpa ba'a katetazemte mbeli nyi ketene teghweme 'ya laka yayata bela. Ma tsagha, kateɗepete yɛ 'ya ya kaMahwətə nya kese kageze ŋayɛ ghena.»

²²Wa nya ghena nya geze Shala Mahwətə nya: «'Ya le ghəa ɗa nde teɓele dzeve nya pelɛ ghəa wəfe ta Lekeleke kezha mɓe te ŋkwa ŋkɛ. Kateɓele dzeve kwateɗa 'ya pelɛ ghəa yɛ dzeve ta ŋkɛ kezha mɓe le ghəa ɗa kwa ghəa ghweme nya biya.

²³Pelɛ ghəa ghweme ta ka Israyɛl nya biya temɓe ŋkɛ 'ya. Kateha yɛ dzeve ŋkɛ, kateya ŋkɛ ba'a katezhɛre ŋkɛ kasɛdre ganyɛ. Katese mama ta 'yɛ kapa ghɛ dzeyi te dzeve ta ŋkɛ ba'a kanza mbe shenaŋkwe ta ŋkɛ.

²⁴Ma tsagha, kateɗepete pɛtɛa wəfe nyi kwamte 'ya ya kaMahwətə. Katempə wəfe nyi jama jama 'ya ba'a katekele nyi ɓɛhwɛ ɓɛhwɛ 'ya. Kateghwele wəfe nyi njaɓa njaɓa 'ya ba'a kategə yɛmə 'ya mbe nyi keghwele ghwele. 'Ya Mahwətə nde gezete ba'a 'ya nde teyipə ghena shɛ kadzawa.»