Read kapsiki Ɛzɛkiyɛl 22 Bible Online

Ɛzɛkiyɛl 22 - kapsiki bible

Ɛzɛkiyɛl 22

¹Ma ke Mahwətə sha 'ya:

²«Wəndə ŋelɛ, hite geva kameha ghwə te Zhɛrəzalɛm nya kempə ŋkwa, gezleŋema ghə na ma! Ncɛte nda wəshi nyi ndiremi ndiremi kashasha nyi menete ŋkɛ.

³Ma pa na sha geze: Wa nya ghena nya geze Shala Mahwətə nya: Meleme nya mpə ŋkwa mbeli nyi mbe na. Ma tsagha ne, vəa ŋzla ta ŋa yahi hɛ. Wəshi nyi zhɛrete mbeli kashala yamene hɛ ba'a hɛɗia ŋa yazhɛre hɛ wale wale.

⁴Nde beze ghena na va mimia mbeli nyi kempə mpə nyi, nahe na kezhɛre ŋa wale wale va wəshi nyi zhɛre mbeli kashala nyi mene mbeli nyi mbe gha. Tsagha ne, nahe na kentamte hɛa ŋa ba'a kentsehe te kwa keɗaŋe ta hɛa ŋa. Vatse vate hawe 'ya te gha kwa kema ta kweci hwelefefi ba'a ŋ'wəshi ŋa mbeli nyi te kweci hɛɗi.

⁵Pɛtɛa mbeli nyi dekwe ba'a nyi cakeɗake yitea gha kaŋ'wəshi ŋa va nya kelemte zləvə na te ghəa ŋa ba'a va wəba ta zlerea ŋa.

⁶Yayata wəndə nya te ghə hwa ka Israyɛl kamene berete ba'a kampə ŋkwa mbe gha Zhɛrəzalɛm.

⁷Ma mbe gha ne, kaɓela yita ba'a ma mbeli we, berete ta ka se se yazeme mbeli, yaka yasa nda mbeli ke ka mezhɛtiti ba'a ka wedidi.

⁸Kahawe mbeli va ŋkwa nyi keveyi ɗa geva tekeleke we, kave zləvə mbeli te veci kezhɛne mpi we.

⁹Ma mbe gha ne, ŋwashɛ ŋwashɛ kempə ŋkwa yamene kweci mbeli. Slia wəshi nyi dzeghekɛ melɛ mbeli le hɛ hwa kələŋə yazeme mbeli nyi mbe gha. Wəshi nyi ɗema zləvə te yave nda ghə hɛ.

¹⁰Male ta yite nci yavale kweci keɗema mi nyi zhɛ nda wəshi yaɓelahe kweci le hɛ kaberete.

¹¹Wəshi nyi ndiremi ndiremi kashasha yamene kweci mbeli le mia ka ghedəkwəa nci. Makwa keɗema wəzha ta yita yaghwete ba'a yakese kweci kaberete kezha vale.

¹²Ma mbe gha ne, kakele cɛdɛ kweci mbeli kezha pesle ŋkwa, le yɛmə kwele kwele nzəɓə nda təmə hɛ ke mbeli, berete ta ka ghedəkwəa nci yazeme hɛ kezha mene ghəa nci. Ama 'ya ne, fəyitekeghə zaghəyite ɗa mbeli, 'ya Shala Mahwətə.

¹³Wa nya 'ya kapɛawe dzeve va zhɛme nyi kemave na le mbəɗəkwə ba'a va mbeli nyi mpəmte na.

¹⁴Ma te veci nya teme 'ya te gha ne, katenza berete ba'a hwepe ghə va gha kezha ghereŋe na? Ma wəsə nya gezete 'ya, 'ya Mahwətə ne, kateyipə 'ya kadzawa.

¹⁵Katetaze mbelia ŋa 'ya dzeyi hwa kweci hwelefefi ba'a katenza yɛ tahe dzeyi te kweci hɛɗi, kateza sebe 'ya te slene nyi wale walea ŋa.

¹⁶Kateve hawe kweci hwelefefi te gha, ama kateɗepete na 'ya ya kaMahwətə.»

¹⁷Ma ke Mahwətə sha 'ya:

¹⁸«Wəndə ŋelɛ, kala wevɛa gezla zhɛrenji ka Israyɛl sha 'ya. Kala wevɛa mze kwa tɛawetɛa, wevɛa mze kwa gheme, wevɛa kwekwərə, wevɛa lɛ keɗema wevɛa dalema nyi kwa ghwə ta gezla hɛ.

¹⁹Vatse gɛ, wa nya ghena nya geze Shala Mahwətə nya: Ma va nya zhɛrete ghəa ŋayɛ yɛ pɛtɛ kala wevɛa gezla ne, 'ya katetsene ŋayɛ te tepe ta Zhɛrəzalɛm.

²⁰Tsene yatsene veyizəa mze kwa tɛawetɛa, mze kwa gheme, lɛ, dalema ba'a ŋa kwekwərə mbeli kwa gezla nya kwetɛŋe. Kwa sebe ta ŋkɛ, pa mbeli meheyi ghwə kwa kezha keɓe hɛ. Kala nyagha tetsene ŋayɛ 'ya va wəba ta beze ta wənəa ɗa, katebete ŋayɛ 'ya kwa gezla kezha vɛsə ŋayɛ.

²¹Mbe Zhɛrəzalɛm tetsene ŋayɛ 'ya, kateve ghwə ta hwepe wənəa ɗa 'ya te gheyɛ yitea rɛɗɛ yɛ kala mze.

²²Kala nya rɛɗɛ mze kwa tɛawetɛa mbe ghwə ne, tsagha terɛɗɛ yɛ te tepe ta Zhɛrəzalɛm. Ma tsagha, kateɗepete yɛ 'ya Mahwətə nde vate hwepe wənəa ɗa te gheyɛ.»

²³Ma ke Mahwətə sha 'ya zhɛkwa:

²⁴«Wəndə ŋelɛ, ma pa na sha ka Israyɛl: kala hɛɗi nya keghwele ghwele hɛɗia ŋayɛ, nya ɗema va kese kame te te vecia hwepe wənəa ɗa.

²⁵Kala nivɛrə nyi keghwəghwə ba'a nyi kempeɗe wəsə nya keseve hɛ mbeli nyi te ghəa nci. Kampə ŋkwa hɛ, kafə cɛdɛ ba'a wəshia mbeli hɛ ba'a kamtsehe ka wedidi hɛ mbe meleme.

²⁶Nahe ka dzeghe Shala keɗema hawe va wəshi mahalegəa ɗa ba'a va ŋkwa nyi keveyi ɗa geva tekeleke. Yipə yipə newe wəsə nya keveyi geva tekeleke hɛ le nya wale wale. Kateke nda neghe nya kwelɛ yɛ wəsə nya wɛŋe le nya wale wale hɛ ke mbeli we. Kaɓela veci kezhɛne mpi hɛ we. Ŋ'wəshi ya te 'ya te tepe ta nci.

²⁷Kala makwagwele nyi keslekwe wəsə nya keseve hɛ mpə ŋkwa mbeli nyi te ghəa mbeli. Mpia mbeli yaza hɛ kezha ndəkwə ghəa nci.

²⁸Pa ka mɛ ŋkwa ta nci dəpəaghe wəsə kənəa pɛtɛa wəshi nyi kala cɛ nya fikɛ mbeli le teɓehwe. Wəshi nyi ncake hɛ yageze hɛ, ghena tseŋwə yaɓela nda hɛ ke mbeli. ‹Wa nya ghena nya geze Mahwətə nya› ke hɛ sha geze. Ndagwara kegezete nda ghena 'ya, 'ya Mahwətə ke hɛ we.

²⁹Te yayata ŋkwa te hɛɗi ne, yaka yasa nda mbeli ke mbeli, wəshia mbeli yafə mbeli kaberete, berete ta ka titikwəa kɛfi ba'a ŋa ka dewə ŋeli yazeme mbeli ba'a yaka nya kehitema geva yasa nda mbeli ke ka se se.

³⁰Ntake 'ya kazele wəndə nya kenza kaŋate zli, nya kenza kaghereŋe kwelɛ ŋzla nyi te zli kezha ya hɛɗi yitea ɗema 'ya kaŋzlamte, ama wəndə shɛ kekemave 'ya we.

³¹Vatse pelaghe hwepe wənəa ɗa 'ya kənəa hɛ, pa 'ya zamte sebe te hɛ le wənə le wənə. Pa 'ya veyi nda zhɛme nyi mbe slene ta nci kwa ghə ke hɛ. 'Ya Shala Mahwətə nde gezete.»