Read kapsiki Ɛzɛkiyɛl 25 Bible Online

Ɛzɛkiyɛl 25 - kapsiki bible

Ɛzɛkiyɛl 25

¹Ma ke Mahwətə sha 'ya:

²«Wəndə ŋelɛ, zhɛrete kema laka ka Amon shɛ na gezete nda ghena ta ɗa ke hɛ.

³Ma pa na sha ka Amon: fa mə ghena ta Shala Mahwətə. Wa nya ghena nya geze Shala Mahwətə nya: Ma va nya se yɛ kaŋ'wəshi ghɛa ɗa nya kezhɛrenyɛ wale wale, hɛɗia Israyɛl nya ketazemte geva ba'a ka Zhəwda nyi fəhwe mbeli ne,

⁴'ya kateve ŋayɛ mbe dzeve ta mbeli nyi laka ŋkwa kesame ta veci. Kateve yɛ ghedəkwəa nci hɛ te hɛɗia ŋayɛ, katemɓe yɛ cɛ lekwesa ta nci hɛ te ɓiyitsa. Ghenci ka tezeme yɛ ya ta wəfe ta ŋayɛ ba'a ka tesa ŋ'wa ta ŋayɛ.

⁵Katezhɛre Raba, meleme ta ŋayɛ nya wəba 'ya kaŋkwa keya zlegweməa lɛmə ba'a hɛɗia Amon kaŋkwa kehɛ ta timɛti. Tsagha ne, kateɗepete yɛ 'ya ya kaMahwətə.

⁶Wa nya ghena nya geze 'ya, 'ya Shala Mahwətə nya: Nahe yɛ kese kampi dzeve ba'a kampereke va zlama yitea ndiremi nyi te hɛɗia Israyɛl. Ma tsagha ne, nahe yɛ kencɛte yiɗə nya yiɗə mbelia ɗa yɛ.

⁷Vatse gɛ ne, 'ya katencɛ berete ta ɗa te gheyɛ ba'a kateve ŋayɛ mbe dzeve ta kweci hwelefefi nyi ketefə wəshia ŋayɛ pɛtɛ. Kateza sebe 'ya te hwelefe ta ŋayɛ, rayɛ tenza sebe hɛɗia ŋayɛ ba'a pɛtɛ tempə ŋayɛ 'ya. Tsagha ne, kateɗepete yɛ 'ya ya kaMahwətə.»

⁸Wa nya ghena nya geze 'ya, 'ya Shala Mahwətə nya: Ma ke ka Mowab sha geze: Nahe ka Zhəwda kezhɛrenji kala kweci hwelefefi.

⁹Vatse gɛ ne, 'ya kateɗa meleme nyi kefɛa hweŋkwa kedzembe Mowab, Kateŋzla hɛ ka ghema ta nci yite yite, ya meleme nyi ganji ganji kala Bɛt-Yeshimot, Ba'al-Mɛyon ba'a Kiriyatayim.

¹⁰Katesərə mbeli nyi laka ŋkwa kesame ta veci 'ya kakele Mowab, kala nya kelehwe Amon hɛ, yagha mbeli katezhɛne kazəzə hɛɗia Mowab hwa kweci hwelefefi.

¹¹Katemeha ghwə 'ya te ka Mowab. Tsagha ne, kateɗepete hɛ 'ya ya kaMahwətə.

¹²Yewə, wa nya ghena nya geze 'ya, 'ya Shala Mahwətə nya: «Nahe ka Ɛdom kewate dewa te ka Zhəwda. Vatse nza hɛ kaka beze ghena.

¹³Vatse gɛ, wa nya ghena nya geze 'ya, 'ya Shala Mahwətə nya: Katencɛ berete ta ɗa 'ya te ka Ɛdom, kateza sebe 'ya te mbeli ba'a wəshi keseɗa te hɛɗia shɛ, katezhɛre ŋkɛ 'ya kaɓerama, slə mbe meleme ta Tɛman hwa'a mbe Dɛdan. Katempə mbeli nyi mbe va kafayɛ.

¹⁴Katewa ɗa dewa ka Israyɛl nyi kambelia ɗa te ka Ɛdom. Kala nya ɗe ghwə ta hwepe wənəa ɗa temene nda ka Israyɛl ke hɛ. Ma tsagha, katefave ghwene nya mbe mene ɗa jaɗafa ka Ɛdom. 'Ya Shala Mahwətə nde gezete.

¹⁵Wa nya ghena nya geze 'ya, 'ya Shala Mahwətə nya: Kezha wa dewa menete ka Filisti tsagha. Nahe hɛ kewate dewa te ka ghema ta nci nyi ɗema ntsə ta nci hɛ se vəashi le ŋkele ntsə nya wəba ba'a nahe hɛ kempəmte hɛ.

¹⁶Vatse gɛ, wa nya ghena nya geze 'ya, 'ya Shala Mahwətə nya: Katencɛ berete ta ɗa 'ya te ka Filisti. Rayɛ teza sebe 'ya te ka Kaftor nyi kenzanji nyi mɛa ndərə.

¹⁷Ɗa nyi dzawe dzawe yateve 'ya te hɛ, le wənə le wənə teve yaka 'ya te hɛ. Ma tsagha, kateɗepete hɛ 'ya ya kaMahwətə.»