Read kapsiki Ɛzɛkiyɛl 30 Bible Online

Ɛzɛkiyɛl 30 - kapsiki bible

Ɛzɛkiyɛl 30

¹Ma ke Mahwətə sha 'ya:

²«Wəndə ŋelɛ, gezete ghena ta ɗa, ma pa na sha geze: Wa nya ghena nya geze Shala Mahwətə nya: Tsa mə lewela va veci nya ketese nya!

³Kwa nza ŋkɛ se yase ŋkɛ, takwa takwa vecia Mahwətə kase. Kavecia ləmbə tenza vecia shɛ, kavə kemeha ghwə te kweci hwelefefi.

⁴Ma ketedzembe Ɛzhipte mpa ne, katebare bare mbeli kwa Ɛtiyopi va ghazlənə. Selekə lekə tempə ka Ɛzhipte mbeli, katefə wəshia nci mbeli ba'a katezhɛre hɛɗia nci mbeli kakwəfi.

⁵Katempə ka Ɛtiyopi, ka Pəwt, ka Ləwd, ka Arab ba'a ka Libi, pa le mbelia ɗa katempə hwa mpa.

⁶Wa nya ghena nya geze 'ya, 'ya Mahwətə nya: Slə mbe Migdol nya laka bela kwa gwela hwa'a kwa Asəwan nya laka bela kwa zeme ne, katempə mbeli nyi ketawe ka Ɛzhipte mbe mpa ba'a kateteɗe berete nya mene fege nya ŋkɛ le. 'Ya Shala Mahwətə nde gezete.

⁷Kaɓerama nya ndiremi ma hwa kweci ɓerama tezhɛre Ɛzhipte. Kakwəfi tenza meleme nyi mbe.

⁸Ma vəa ŋkwa nya tendəyite ghwə 'ya yitea Ɛzhipte ba'a nya tezamte sebe 'ya te mbeli nyi kekemane ŋkɛ ne, kateɗepete mbeli 'ya ya kaMahwətə.

⁹Ma vəa ŋkwa nya teza sebe 'ya te Ɛzhipte ne, kateslə ka ghwene le kwambelə. Katedzawa hɛ kadake ɗa Ɛtiyopi nya kenewe ghəa ŋkɛ gweɗakwe, katebare bare mbeli nyi mbe va ghazlənə perə. Takwa takwa hɛa shɛ kase!

¹⁰Wa nya ghena nya geze 'ya, 'ya Shala Mahwətə nya: Kateza sebe 'ya te mbeli nyi tipə tipə nyi mbe Ɛzhipte laka Nabəkodonozor, meghea ka Babilone.

¹¹Katese ŋkɛ le mbelia ŋkɛ nyi ghyana ghyana ma nyi ke mbeli pɛtɛ kaza sebe te hɛɗi nya. Kateha nda mpa hɛ ke ka Ɛzhipte ba'a kateviɗi ŋkwa nya te hɛɗi hɛ le mbeli nyi kempə mpə.

¹²Katehase hələa Nil 'ya ba'a kateve hɛɗia shɛ 'ya mbe dzeve ta ka 'yaghwa mehele. Katepele nda hweŋkwa 'ya ke ka mentiɓəa sli kataze hɛɗia shɛ ba'a kafə wəshi nyi mbe. 'Ya Mahwətə nde gezete.

¹³Wa nya ghena nya geze Shala Mahwətə nya: Kateza sebe 'ya te wəshi nyi zhɛrete mbeli kashala ba'a te shala tseŋwə nyi mbe Mɛmfis. Katezhɛne mbeli nyi te ghə kanza mbe Ɛzhipte we, kateve ghazlənə 'ya te hɛɗia shɛ.

¹⁴Katebeze Patros 'ya, katendə ghwə 'ya yitea meleme Sowan ba'a katemeha ghwə 'ya te meleme ta Tɛbɛs.

¹⁵Kateve ghwə ta hwepe wənəa ɗa 'ya te Sin, meleme nya ta Ɛzhipte nya berete. Kateza sebe 'ya te mbeli nyi kwele kwele nyi mbe Tɛbɛs.

¹⁶Katendə ghwə 'ya yitea Ɛzhipte. Katebare bare mbeli nyi mbe Sin va ghazlənə. Katentsa wəfela mbeli te zli nya yitea Tɛbɛs, heveci tekele Mɛmfis ka jaga.

¹⁷Ma mempɛhwetɛti nyi mbe On ba'a nyi mbe Pi-Bɛsɛt ne, katempə hɛ mbeli le kafayɛ, katefə mbeli nyi ketene mbeli kaka mavashi.

¹⁸Ma mbe Tapanɛs ne, kaŋkwesle tenza ŋkwa vəa ŋkwa nya kiɗimte berete ta Ɛzhipte 'ya. Katekiɗi berete nya mene fege nya ŋkɛ le 'ya. Zhiɓə tenza ŋkwa nya mbe va ləmbə ba'a katefəhwe mbeli nyi mbe meleme nyi dzeyi yite mbeli kaka mavashi.

¹⁹Ma vəa ŋkwa nya temeha ghwə 'ya te Ɛzhipte ne, kateɗepete mbeli 'ya ya kaMahwətə.»

²⁰Mbe kwa meŋe kwetɛŋeghəmbe ta va, te hɛ kwa mberefaŋe mbe tere kwa ghate kwa sebe ta nya fəhwe ŋkwa mbeli ne, ma ke Mahwətə sha 'ya:

²¹«Wəndə ŋelɛ, nahe 'ya keɓelemte dzeve ta Farawon, meghea ka Ɛzhipte. Wəndə shɛ kepeɗete nda keɗema kemenave nda ghwɛ we. Wəndə shɛ kese kahwepe nda kezha kemave berete dzeve ta ŋkɛ kakese kafayɛ we.

²²Vatse gɛ ne, wa nya ghena nya geze Shala Mahwətə nya: Kateme 'ya te Farawon, meghea ka Ɛzhipte. Kateɓele dzeve ta ŋkɛ 'ya bake nci: kala nya keɓele ɓele nya tenza nya mba nya ganyɛke. Katenegha kafayɛ 'ya sawa mbe dzeve ve.

²³Katetaze ka Ɛzhipte 'ya dzeyi hwa kweci hwelefefi nyi dzeyi te kweci hɛɗi.

²⁴Katemtsehe nda berete 'ya ke meghea ka Babilone ba'a kateve kafayɛa ɗa 'ya mbe dzeve ta ŋkɛ. Kateɓele dzeve ta Farawon nya keteŋələvə kala wəndə nya ɗakɛ zhi kemte 'ya.

²⁵Katemtsehe nda berete 'ya ke meghea ka Babilone vəa ŋkwa nya tempə dzeve te Farawon. Ma tsagha ne, kateɗepete mbeli 'ya ya kaMahwətə te və nya teve kafayɛa ɗa 'ya mbe dzeve ta meghea ka Babilone, katenteɗe ŋkɛ yitea Ɛzhipte.

²⁶Katetaze ka Ɛzhipte 'ya dzeyi hwa kweci hwelefefi nyi dzeyi te kweci hɛɗi. Ma tsagha ne, kateɗepete mbeli 'ya ya kaMahwətə.»