Read kapsiki Ɛzɛkiyɛl 31 Bible Online

Ɛzɛkiyɛl 31 - kapsiki bible

Ɛzɛkiyɛl 31

¹Ma mbe kwa meŋe kwetɛŋeghəmbe ta va, mbe kwa ghate te tere kwa mahekene kwa sebe ta nya fəhwe ŋkwa mbeli ne, ma ke Mahwətə sha 'ya:

²«Wəndə ŋelɛ, ma pa na sha Farawon, meghea ka Ɛzhipte ba'a sha mbelia ŋkɛ nyi tipə tipə nyi: Wa yanza 'ya kayipəte ŋa le, gha nya wəba nya tse wa?

³Yipə yipə na le lekelekea ka Liban nya nza dzeve ta ŋkɛ kendeɗe ndeɗenji ba'a nya kemene shenaŋkwe ganyɛ. Kebiyanyɛ ŋkɛ kadzeme ghweme, kacɛme cɛame ləmbə ghəa ŋkɛ.

⁴Pa va kelete ŋkɛ, pa yɛmə nya mbe hɛɗi kelete ŋkɛ kadzeme yitea ghweme. Pa yɛmə tseneyite geva yitea slərəa ŋkɛ, kwa sebe ta ŋkɛ, ntake nde kahwɛ kalə sha kweci pɛtɛa wəfe nyi hwa gamba.

⁵Te zlaɓa ta yɛmə nya kwele kwele yite ne, biya ma ŋkɛ ke kweci wəfe nyi hwa gamba. Kwele kwele peslete geva yɛ dzeve te ba'a kebebiya bebiyanji dzevea shɛhɛ.

⁶Kase mama ta yɛ 'yɛ kapa ghɛa nci hwe, kase wəshi keseɗa nyi hwa gamba kaya ŋwalea nci yitea hwəa ŋkɛ, kwele kwele hwelefefi nyi kebeke yitea shenaŋkwe ta ŋkɛ.

⁷Kawəfe nya ndeɗe ŋkɛ laka kwelea ŋkɛ ba'a laka biya ta dzeve nyi te, kwa nza ŋkɛ ne, mbe hɛɗi nya behe va yɛmə slərəa ŋkɛ.

⁸Ma kwa ntsa ta Shala ne, lekeleke shɛ kala gheŋkɛ we, vɛ nya nza dzeve ganji te shɛ kala gheŋkɛ we, wəfe shɛ le shenaŋkwe yite kala gheŋkɛ we, wəfe shɛ ganyɛke kala gheŋkɛ we.

⁹Nahe 'ya kendeke nda dzeve ganji, pɛtɛ wəfe nyi kwa Ɛdɛn nya kantsa ta Shala kazlɛ ve.

¹⁰Vatse gɛ ne, wa nya ghena nya geze 'ya, 'ya Shala Mahwətə nya: Nahe lekelekea shɛ kekelenyɛ, kacɛme cɛame ləmbə ŋkɛ ba'a nahe ŋkɛ kezhɛrenyɛ kande kele ghə.

¹¹Vatse neghamte ŋkɛ 'ya ba'a vame ŋkɛ 'ya mbe dzeve ta meghe nya berete ma te hɛɗi lema. Katemene nda ŋkɛ kala wəsə kwa ndiremi nya menete ŋkɛ.

¹²Pa ka mentiɓə nyi 'yaghwa 'yaghwa hwa kweci hwelefefi tsaslemte ŋkɛ ba'a sərəakɛ ŋkɛ te ŋkwa shɛ. Pa yɛ dzeve ta ŋkɛ betenji kənəa yɛ ghweme ba'a yɛ zlərə nyi te hɛɗi. Pa pɛtɛa mbeli nyi te hɛɗi nyi kebeke yitea shenaŋkwe ta ŋkɛ slənji ba'a hwɛnji.

¹³Kase mama ta 'yɛ nyi yitea ghweme kame te dəŋwəa ŋkɛ, kadzeghwa wəshi keseɗa pɛtɛ nyi hwa gamba te yɛ dzeve ta ŋkɛ.

¹⁴Ma tsagha ne, kwete shɛ hwa wəfe nyi te ŋkwa yɛmə katekele we, kwete shɛ katekele kadzeme kacɛme cɛame ləmbə we, kwete shɛ katemene fege le biya ta ŋkɛ we. Kwa nza ŋkɛ pɛtɛ tempə wəfe ba'a mbeli te kwete hɛ, katedzawa hɛ sha mbelia kwahɛɗi.

¹⁵Wa nya ghena nya geze Shala Mahwətə nya: Ma te veci nya tedzawa lekeleke hwa mbelia kwahɛɗi ne, kateve nehwene 'ya hwa wəshi nyi te hɛɗi. Ma tewəmbəreke gheŋkɛ ne, kateghereŋe yɛmə nya mbe hɛɗi 'ya, katefɛa hwɛ ta yɛ hələa ŋkɛ 'ya ba'a yɛməa ŋkɛ nya wəba 'ya. Tewəmbəreke gheŋkɛ ne, katezhɛre ghweme ta Liban 'ya kaŋkwesle ba'a kateghwele pɛtɛa wəfe nyi hwa gamba 'ya.

¹⁶Ma vəa ŋkwa nya tenegha wəfea shɛ 'ya kadzawa ghɛa mbelia kwahɛɗi, zlaɓe le mbelia kwahɛɗi ne, katebare bare kweci hwelefefi va ghazlənə va gaka ta teɗe ta ŋkɛ. Ma kwa zeweve ta hɛɗi ne, katezlama wəfe nyi kwa ntsa ta Ɛdɛn nyi ganji ganji ma hwa wəfe ba'a nyi te ŋkwa yɛmə ma te hɛɗia Liban pɛtɛ.

¹⁷Ghenci perə ne, katedzawa hɛ sha mbelia kwahɛɗi, zlaɓe le mbeli nyi kempə hwa mpa. Nahe hɛ kekemanakɛ ŋkɛ ba'a kese kanza yitea shenaŋkwe ta berete ta ŋkɛ hwa kweci hwelefefi.

¹⁸Ma kwa ntsa ta Ɛdɛn ne, wəfe shɛ kese ganyɛke ba'a wəbake kala gha we. Ndagwara katekele ŋa 'ya kadzawa zeweve ta hɛɗi zlaɓe le wəfea shɛhɛ. Kwagha ne, meɓelahe tenza na hwa mbeli nyi keslamtema mɓɛta ba'a hwa mbeli nyi kempə hwa mpa. Nya ya kawəsə nya ketemene nda geva ke yɛ Farawon le mbelia ŋkɛ. 'Ya Shala Mahwətə nde gezete.»