Read kapsiki Ɛzɛkiyɛl 33 Bible Online

Ɛzɛkiyɛl 33 - kapsiki bible

Ɛzɛkiyɛl 33

¹Ma ke Mahwətə sha 'ya:

²«Wəndə ŋelɛ, geze nda ghena ke ka Israyɛl! Ma pa na sha hɛ: Ya kwete pa keghweneke mpa 'ya kadzete hɛɗi. Ya kwete nahe mbeli nyi te hɛɗia shɛ kentave kwete wəndə hwa ghəa nci kaveyi kande newe ŋkwa.

³Nakɛma ta ŋkɛ ke ka sewajɛa ka ghema kase ne, kavɛ tereme ŋkɛ yitea fa mbeli.

⁴Ya kwete pa kefate vɛ ta tereme kwete wəndə, nda zhɛrete ŋkɛ katsewe va mədəŋə, ma kesenji ka ghema peslekɛ ne, kwa ghəa wəndəa shɛ fete ta mte ta ŋkɛ.

⁵Nahe ŋkɛ kefate vɛ ta tereme nda zhɛrete ŋkɛ katsewe va mədəŋə. Kwa ghəa ŋkɛ tenza mte ŋkɛ. Ama nda nahe ŋkɛ keveyite sleme megela yitea vɛ ta teremea shɛ ne, katembelete mpia ŋkɛ ŋkɛ.

⁶Ama kenakɛ ka ghema nde newe ŋkwa kase, nda nzanyɛ ŋkɛ kevɛ tereme yitea fa mbeli, ma kesenji ka ghema peslekɛ wəndə ne, fete ta nde newe ŋkwa ŋkɛ. Kwa ghəa ŋkɛ tenza mte ta wəndə nya peslekɛ mbeli.

⁷Gha gɛ wəndə ŋelɛ yanteyi 'ya kande newe ka Israyɛl. Katefa ghena nyi kesame kwa mɛa ɗa na ba'a kategame ka Israyɛl na le ghena shɛhɛ.

⁸Ya kwete ghena ya va 'ya kageze nda ke nde ndiremia mehele nya ketemte: ma keɗema na kagame ŋkɛ kezha sərəakɛ hweŋkwa ta ŋkɛ nyagha ŋkɛ ne, mtiwə tenza ŋkɛ va fete ta ŋkɛ, ama kwa ghəa ŋa tenza mte ta ŋkɛ.

⁹Ama kegezete nda na ke wəndəa shɛ kezha samenyɛ ŋkɛ kwa hweŋkwa shɛ, nda zhɛrete ŋkɛ katsewe va mədəŋə ne, mtiwə tenza ŋkɛ va fete ta ŋkɛ, ama gha le ŋa ŋa ne, pələsə tembele mpia ŋa na.»

¹⁰Gha wəndə ŋelɛ, ma pa na sha ka Israyɛl nyi kegeze nyi: Keɗaŋeɗa fete ta n'yɛ ba'a jaɗafa ta n'yɛ kwa ghə va ghen'yɛ, deke va hɛ ne, daɗə yadaɗə n'yɛ. Tsema nza ghen'yɛ kanza n'yɛ teghweme wa?

¹¹Ma pa na sha hɛ: Le nza ta ɗa, 'ya Shala Mahwətə teghweme ne, kazlama 'ya yitea mte ta nde 'yaghwa mehele we, ama wəsə nya mawe 'ya ne, zhɛre geva ta ŋkɛ same kwa hweŋkwa kwa ndiremia ŋkɛ, yitea nza ŋkɛ teghweme. Zhɛreke mə geva, zhɛreke mə geva same kwa hweŋkwa kwa ndiremia ŋayɛ: yitea wa ɗe yɛ kampə wa ka Israyɛl?

¹²Gha wəndə ŋelɛ, ma pa na sha hwelefe ta ŋa ɓiyitsa: Ma kedzembe mene wəsə kwa ndiremi wəndə nya tiɗiɗi ne, katembelete ŋkɛ wəshi ganji nyi se ŋkɛ kamene vəashi we. Ma kesərəakɛ hweŋkwa kwa ndiremia ŋkɛ nde 'yaghwa mehele ne, kateza ŋkɛ wəsə kwa ndiremi nya se ŋkɛ kamene vəashi we. Ma vəa ŋkwa nya menete wəsə kwa ndiremi wəndə nya tiɗiɗi ne, katenza mpia ŋkɛ pələsə tewəmbəreke slene ganji nyi se ŋkɛ kamene we.

¹³Ma ke geze 'ya sha wəndə nya tiɗiɗi katenza ŋkɛ teghweme, kwa sebe ta ŋkɛ, ntəŋə ŋkɛ kamene wəsə kwa ndiremi, va nya vate ghə ŋkɛ te dzeghwa tiɗiɗia ŋkɛ nya vəashi nda menete wəsə kwa ndiremi ŋkɛ ne, kwete shɛ hwa wəshi ganjia ŋkɛ katenza yitea ghəa ɗa we, mtiwə tenza ŋkɛ va wəsə kwa ndiremi nya menete ŋkɛ.

¹⁴Ama katemte na kegeze nda 'ya ke nde 'yaghwa mehele. Kwa sebe ta ŋkɛ, pa zhɛrave nda wəmbə ke jaɗafa, menete wəsə nya tiɗiɗi ba'a nya kaganda,

¹⁵ŋkikɛ zhɛme nya kənəa wəsə nya nzəɓəve ŋkɛ, zhɛneke wəsə nya ghərəve ŋkɛ, hawete nda hawe ke wəshi mahalegə nyi keve ŋkwa teghweme, sərəakɛ mene fete ne, fəyitekeghə tenza wəndəa shɛ teghweme, katemte ŋkɛ we.

¹⁶Mba kwete kwetɛŋe hwa fete nyi menete ŋkɛ vəashi kakese ŋkɛ te ghwə we. Ma kemenete wəsə nya tiɗiɗi ba'a nya kaganda ŋkɛ ne, teghweme tenza ŋkɛ.

¹⁷Ma ke hwelefe ta ŋa sha geze: Kehi wəsə nya mene nya Mahwətə we. Ashɛ ŋa nci wəshi nyi mene hɛ ka hitema geva wəka?

¹⁸Ma kewəfəyite dzeghwa tiɗiɗia ŋkɛ wəndə nya tiɗiɗi, kelənyɛ ŋkɛ kamene wəsə kwa ndiremi ne, mtiwə tenza ŋkɛ va fete ta ŋkɛ.

¹⁹Ama kesərəakɛ hweŋkwa kwa ndiremia ŋkɛ nde 'yaghwa mehele kezha mene wəsə nya tiɗiɗi ba'a nya kaganda ne, teghweme tenza ŋkɛ te zlaɓa ta dzeghwa ta ŋkɛ nyagha.

²⁰Ma ke gheyɛ ka Israyɛl sha geze: «Ghə te wəsə nya mene nya Mahwətə we. Ɗepete mə megela, kala slene ta ŋayɛ temeha ghwə 'ya te gheyɛ.»

²¹Ma te kwa meŋe bakeghəmbe ta va, mbe hɛ kwa mcɛfe te tere kwa meŋe kwetere wəmbəa nya fəhwe n'yɛ mbeli ne, hwa'a kwete wəndə nya kembelenyɛ piyahe shave pelɛ Zhɛrəzalɛm sha 'ya, ma ke: «Nahe meleme keŋzlanyɛ!»

²²Ma mbeɗa nda tentsehe ŋkɛ ne, nahe berete ta Mahwətə kedzembe 'ya yitea geze ghena 'ya. Ma kwa ntsehe wəndəa shɛ sha 'ya te hendɛ ta ŋkwa ne, werete ghɛnia ɗa pelemte geva, mba 'ya kaɓeɓə we.

²³Ma ke Mahwətə sha 'ya:

²⁴«Wəndə ŋelɛ, ma ke mbeli nyi ketene pelɛ Israyɛl mbe meleme nyi keŋzla ŋzla nyi sha geze: ‹Kwetɛŋenyɛ se Abraham, ama nahe hɛɗi nya kese pɛtɛ kaŋa ŋkɛ. Gheɓəmə nyi kwele kwele nyi ne, kaŋa ɓəmə ndeke ɓəmə geva hɛɗi tsetsenya.›

²⁵Vatse gɛ ne, ma pa na sha hɛ: Wa nya ghena nya geze Shala Mahwətə nya: Le mimi zeme sli yɛ, shala tseŋwə yahawe yɛ ve, kampə ŋkwa yɛ. Tsema ɗe gheyɛ kanza kaka sleke hɛɗi wa?

²⁶Dɛŋe yɛ vate ghəa ŋayɛ te wəshi kempa ta ŋayɛ, ntəŋə yɛ yitea mene wəshi nyi ndiremi ndiremi kashasha, yitea ɓelahe le mia ka ghedəkwəa ŋayɛ. Tsema nza gheyɛ kaslekete hɛɗi wa?

²⁷Ma pa na shɛ: Wa nya ghena nya geze Shala Mahwətə nya: Le nza ta ɗa, 'ya Shala Mahwətə teghweme ne, katempə mbeli nyi ketene nyi mbe meleme nyi keŋzla ŋzla nyi va kafayɛ. Katezeme nyi kwamte wəshi nyi hwa gamba. Katempə nyi hwa ghweme ba'a nyi late zlera va ba.

²⁸Kaɓerama tezhɛre ŋkwa nya te hɛɗi nya 'ya. Ma berete nya keve nda kele ghə nya ke hɛ ne, zlɛcɛ tenza sebe te. Kaɓerama tezhɛre ghweme nyi mbe Israyɛl, va nya ɗema mbeli katedzeghwa hwa hɛ.

²⁹Pɛtɛ tezhɛre hɛɗia shɛ 'ya kaɓerama, va wəshi nyi shɛma mbeli geze nyi menete hɛ. Ma vəa ŋkwa shɛ ne, kateɗepete hɛ 'ya ya kaMahwətə Shala.

³⁰Gha le ŋa ŋa gɛ wəndə ŋelɛ, gha yaŋwashɛ ŋwashɛ ŋa hwelefe ta ŋa dzeyi vare zlia meleme ba'a dzeyi kwa yɛ degha. Ma ke hɛ sha geze kwelɛ ghəa nci: ‹Nde mə təhwə təhwə kafa ghena nya geze Mahwətə gi!›

³¹Mpəɗə tese hwelefe ta ɗa kantishɛ kwa kema ta ŋa kala nya hwa tsene. Katefa ghena nyi geze na hɛ, ama katemene slene hɛ le we, va nya nza ŋkɛ wəsə nya ɗe ghəa nci yatemene slene hɛ le ba'a wəsə nya nza zhɛme mbe yatezele wənəa nci.

³²Ma newe ŋa hɛ mbe wənəa nci ne, kala nde gha cimə ganyɛ nya gaka ŋwələa ŋkɛ kala njɛrekə ba'a nya dzawa dimə ndeɗekə yite. Kafa ghena ta ŋa hɛ, ama wəndə shɛ kamene slene le we.

³³Ama vəa ŋkwa nya teme wəshi nyi zlapete nyi na kənəa hɛ, wəshi nyi takwa takwa nyi kase ne, kateɗepete hɛ nahe nde mɛ ŋkwa kese hwa hɛ.»