Read kapsiki Ɛzɛkiyɛl 36 Bible Online

Ɛzɛkiyɛl 36 - kapsiki bible

Ɛzɛkiyɛl 36

¹Wəndə ŋelɛ, gezete nda ghena ta ɗa ke ghweme nyi mbe Israyɛl. Ma pa na sha geze: «Ghweme nyi mbe Israyɛl, fa mə ghena ta Mahwətə.

²Wa nya ghena nya geze Shala Mahwətə nya: Ma ke nde ghema na sha geze te ghəa ŋayɛ: ‹Yawa! Yawa! Te dzeve meha mehɛɗia ghweme nyi mbe Israyɛl va gheɓəmə tsetsenya.›

³Ma gha gɛ wəndə ŋelɛ, gezete nda ghena ta ɗa ke ka Israyɛl, ma pa na sha geze: Wa nya ghena nya geze Shala Mahwətə nya: Ma va nya ɗe mbeli kampə ŋayɛ ba'a kaghweze mɛ hwa gheyɛ shave mbe yayata ŋkwa, va nya nza yɛ mbe dzeve ta kweci hwelefefi, va nya dzeghwa hɛ le gheyɛ te mɛ ba'a nya ŋ'wəshi ŋayɛ hɛ ne,

⁴Vatse gɛ ghweme nyi mbe Israyɛl, ve mə sleme yitea ghena ta Shala Mahwətə. Wa nya ghena nya geze nda Shala Mahwətə ke yɛ ghweme, yɛ wəmbə, yɛ zlɛzlelɛŋwə, yɛ zlərə, ŋkwa nyi kakwəfi, meleme nyi wəfəyite mbeli, nyi fəmte geva wəshi nyi mbe ba'a nyi ŋ'wəshi kweci hwelefefi nyi dzeyi yite.

⁵Wa nya ghena nya geze 'ya, 'ya Shala Mahwətə nya mbe ghwə ta hwepe wənəa ɗa te ghəa pɛtɛa kweci hwelefefi, halama te ghəa pɛtɛa Ɛdom, va nya kelehwe hɛɗia ɗa hɛ. Mpɛafe se wənəa nci va zlama ba'a va ŋkele ntsə kezha fə ŋkwa keya wəshi nyi te.

⁶Vatse gɛ wəndə ŋelɛ, gezete nda ghena ta ɗa ke hɛɗia Israyɛl. Ma pa na sha yɛ ghweme, yɛ wəmbə, yɛ zlərə ba'a yɛ zlɛzlelɛŋwə: Wa nya ghena nya geze Shala Mahwətə nya: Mbe ghwə ta zlɛa ɗa ba'a hwepe ta wənəa ne, 'ya kageze ghena va nya pəliave ŋayɛ hawe kweci hwelefefi.

⁷Vatse gɛ, wa nya ghena nya geze Shala Mahwətə nya: Kazeme 'ya kafela le slete dzeve yitea ghweme: ma kweci hwelefefi nyi dzeyi yitea gheyɛ nyi ne, katenza hɛ bətə mbe hawe perə.

⁸Ma vəa ŋkwa shɛ hwa ghweme nyi mbe Israyɛl ne, gwəɗəmə teɗa slekea yɛ wəfe, kateya hɛ kezha gheyɛ ka Israyɛl, mbelia ɗa. Va nya nza ŋkɛ ne, takwa takwa yɛ katezhɛne geva kadzete hɛɗia ŋayɛ.

⁹Kaganda ne, 'ya kase sha gheyɛ, 'ya kazhɛre ŋayɛ geva: katezhɛne wəvea ŋayɛ kanza kewəza wəza, katetsawe felehwe mɛnɛfɛ mbeli te hɛɗi.

¹⁰Te hɛɗia Israyɛl pɛtɛ ne, kateya ŋayɛ 'ya kala repanja. Katezhɛne mbeli kanza mbe yɛ meleme, kwa nza ŋkɛ kateŋa ŋkwa nyi keŋzlanji mbeli.

¹¹Ma te yayata ŋkwa ne, kateya mbeli ba'a wəshi keseɗa kala repanja. Kwele kwele tenza yɛ ba'a kwele kwele teya hwelefe yɛ. Tipə tipə tezhɛre ŋayɛ 'ya kala nya vəashi, kwele ma tefə ŋayɛ mcɛlə 'ya ke nya kaghate. Ma tsagha, kateɗepete yɛ 'ya ya kaMahwətə.

¹²Katedzeghwa 'ya le gheyɛ te yayata ŋkwa nya te hɛɗi, gheyɛ ka Israyɛl, mbelia ɗa. Gheyɛ ka tesleke ŋkɛ, kaŋa ŋayɛ tenza ŋkɛ, katezhɛne ŋkɛ kampə ŋwalea ŋayɛ we.

¹³Wa nya ghena nya geze Shala Mahwətə nya: Ma va nya geze kweci mbeli hwa gheyɛ: ‹Hɛɗi nya kempə mbeli na, gha nde za sebe te ŋwalea mbeli ŋa› ne,

¹⁴se ɓeshi nya ne, katezhɛne na kaza sebe te mbeli we, katezhɛne na kampə ŋwalea mbelia ŋa we. 'Ya Shala Mahwətə nde gezete.

¹⁵Katezhɛne 'ya kapele ŋa kafa ba'a kazereghe yɛ ŋele ba'a yɛ ŋ'wəshia kweci hwelefefi we, katezhɛne na kaza sebe te mbelia ŋa we. 'Ya Shala Mahwətə nde gezete.»

¹⁶Ma ke Mahwətə sha 'ya:

¹⁷«Fate megela wəndə ŋelɛ: Ma kwa nza ka Israyɛl mba te hɛɗia nci ne, nahe hɛ kezhɛrete ghəa nci wale wale le dzeghwa ta nci ba'a le mene wəshi nyi ɗema ghə te. Wale wale se dzeghwa ta nci kwa kema ta ɗa kala male nya zhɛ nda wəshi.

¹⁸Vatse betaghe ghwə ta hwepe wənəa ɗa 'ya kənəa hɛ, va nya zhɛrete ŋkwa nya te hɛɗi hɛ wale wale le mpə ŋkwa ba'a le wəshi nyi zhɛrete hɛ kashala.

¹⁹Nahe 'ya ketazeyi hɛ kwetɛ kwetɛŋe hwa kweci hwelefefi nyi te kweci hɛɗi. Kala dzeghwa ta nci ba'a kala slene ta nci mehate ghwə 'ya te hɛ.

²⁰Ma te yayata hɛɗi nya tazeyi geva hɛ ne, nahe zləvə kekelemte geva te sləa ɗa nya keveyi geva tekeleke tewəmbəreke hɛ. Va nya nza ŋkɛ, ma ke mbeli sha geze te hɛ: ‹Ndagwara mbelia Mahwətə hɛ, ama ashɛ hɛ te hɛɗia nci we.›

²¹Tagha ne, keyirə yirə mehele ta ɗa, va nya kelemte zləvə ka Israyɛl te sləa ɗa nya keveyi geva tekeleke hwa kweci hwelefefi nyi nzanji hɛ hwa hɛ.

²²Vatse gɛ, ma pa na sha ka Israyɛl: Wa nya ghena nya geze Shala Mahwətə nya: Ma nda mene wəsə nya 'ya ne ka Israyɛl ne, kenza tewəmbəreke gheyɛ we, ama tewəmbəreke sləa ɗa nya keveyi geva tekeleke nya kelemte zləvə yɛ te hwa kweci hwelefefi nyi se yɛ hwa hɛ.

²³'Ya katencɛ 'ya ya kaShala nya kaganda te sləa ɗa nya kezhɛrete geva nya wale wale hwa kweci hwelefefi, slə nya kelemte zləvə nya yɛ te hwa hɛ. Ma tsagha, kateɗepete hwelefefia shɛhɛ 'ya ya kaMahwətə. 'Ya Shala Mahwətə nde gezete.

²⁴'Ya katefə ŋayɛ se hwa kweci hwelefefi ba'a se te hɛɗi nyi nza yɛ, 'ya katetsene ŋayɛ ba'a katefə ŋayɛ kadzete hɛɗia ŋayɛ.

²⁵'Ya kateyisə ŋayɛ le yɛmə nya lɛŋe yitea nza yɛ wɛŋe. 'Ya katepɛ ŋayɛ wɛŋe va reɗa ta ŋayɛ ba'a va wəshi nyi zhɛrete yɛ kashala.

²⁶Kateve ŋayɛ wənə mɛnɛfɛ 'ya, kateve mehele ganyɛ 'ya mbe gheyɛ. Katekelemte wənə nya ntɛaŋentɛa nya kala gela 'ya shave mbe gheyɛ yitea ve ŋayɛ nya kweɗekwe.

²⁷Sefəa ɗa le ghəa ɗa yateve 'ya mbe gheyɛ. Tsagha ne, katezhɛre ŋayɛ 'ya kaka hawe va wəshi mahalegəa ɗa, kaka ya ba'a kaka mene slene le wəshi nyi gezete 'ya.

²⁸Ma tsagha, katenza yɛ te hɛɗi nya ndeke nda nya 'ya ke ka shihɛ ŋayɛ. Kambelia ɗa tenza yɛ ba'a kaShala ta ŋayɛ tenza 'ya.

²⁹Katembele ŋayɛ 'ya shave hwa pɛtɛa wəshi reɗa ta ŋayɛ. Katezhɛne 'ya kaghwene ŋayɛ ma we, ama katepese marəwrə 'ya ba'a kateve ŋayɛ wəshi 'ya kwele kwele se te wəve.

³⁰Te zlaɓa ta ɗa ne, kateya yɛ wəfe kwele kwele, katemene wəshi wəvea ŋayɛ kwele kwele yitea ɗema hawe mba kazhɛ ŋayɛ kwa kema ta kweci hwelefefi va ma nya te gheyɛ.

³¹Tagha ne, katedzembe ghəa ŋayɛ dzeghwa kwa ndiremia ŋayɛ ba'a slene ta ŋayɛ nyi keɗema kehi. Kateheɗe kema yɛ va jaɗafa ta ŋayɛ ba'a va wəshi nyi ndiremi ndiremi kashasha nyi menete yɛ.

³²Ɗepete mə megela, tewəmbəreke gheyɛ temene 'ya we, 'ya Shala Mahwətə nde gezete. Nda yɛ kanza shewə va hawe ba'a keyirə yirə va dzeghwa ta ŋayɛ, ka Israyɛl!

³³Wa nya ghena nya geze Shala Mahwətə nya: Ma te veci nya tepɛ ŋayɛ 'ya va jaɗafa ta ŋayɛ ne, katefə mbeli 'ya kadzembe yɛ meleme, pɛtɛ teŋa geva ŋkwa nyi keŋzla ŋzla.

³⁴Kewəza wəza tenza wəve nyi kewəfəyite geva, katezhɛne mbeli nyi kedzeghwa kanakɛ wəve nyi keɗema kewəza we.

³⁵Ma tegeze mbeli: ‹Nahe hɛɗi nya kese nya ketaze taze kezhɛrenyɛ kala ntsa ta Ɛdɛn. Nahe meleme nyi kese nyi kakwəfi, kekweshale kweshale ba'a kaɗema mbeli mbe hɛ kezhɛne kaŋate geva ba'a mbeli ya mbe hɛ.›

³⁶Ma tsagha gɛ, kateɗepete ɗa meleme nyi ketene nyi dzeyi yitea gheyɛ kaMahwətə nya keŋa ŋkwa nya keŋzlamte geva, nya kemɓe wəfe nya kenteɗemte geva. 'Ya Mahwətə kegezete ghena 'ya ne, pa 'ya yipəyi kwa.

³⁷Wa nya ghena nya geze Shala Mahwətə nya: Wa nya wəsə nya temene 'ya nya ɓiyitsa: katepele nda hweŋkwa 'ya ke ka Israyɛl kasəkwə ɗa. Kateya hɛ 'ya kwele kwele kala wəvəsəa timɛti.

³⁸Ma te vecia gəsəkə nyi jama jama ne, mpɛafe se Zhɛrəzalɛm va wəshi keseɗa nyi fəke mbeli kadzeghe melɛ. Kewəvəsə kewəvəsə ŋka hɛ mbeli kase. Tsagha teviɗi geva meleme ta ŋayɛ nyi kakwəfi nyi tsetsenya va wəvəsəa mbeli. Ma tsagha gɛ, kateɗepete yayata wəndə 'ya ya kaMahwətə.»