Read kapsiki Ɛzɛkiyɛl 37 Bible Online

Ɛzɛkiyɛl 37 - kapsiki bible

Ɛzɛkiyɛl 37

¹Pa berete ta Mahwətə dzeghənyɛ kənəa 'ya. Ntəŋə Sefəa ŋkɛ slə le 'ya, pa veyi ɗa kwelɛ kwete zlərə nya nza 'yɛ'yɛ hwempa hwempa kwelɛ.

²Ntəŋə ŋkɛ yitea ndeŋe le 'ya dzate hwa 'yɛ'yɛa shɛhɛ. Hwempa hwempa 'yɛ'yɛa shɛhɛ kwelɛ zlərəa shɛ, keghwele ghwele hɛ helɛŋe helɛŋe.

³Ma ke sha 'ya: «Wəndə ŋelɛ, wərə 'yɛ'yɛ nyi kazhɛne kanza le mpi tse na?» Ma 'ya zhɛnete nda: «Shala Mahwətə, deke gha nde ɗepe!»

⁴Ma ke sha 'ya ɓiyitsa: «Gezete nda ghena ta ɗa ke 'yɛ'yɛ nyi. Ma pa na sha hɛ: 'Yɛ'yɛ nyi keghwele ghwele, fa mə ghena ta Mahwətə.

⁵Wa nya ghena nya geze ŋayɛ Shala Mahwətə nya: 'Ya kateve sefə mbe gheyɛ yitea nza yɛ teghweme.

⁶Katebete berete 'ya ba'a katepa sli 'ya te gheyɛ, bətə tedəpə ŋayɛ 'ya mbe hweta. Kwa sebe ta ŋkɛ, katevɛsə sefə 'ya kadzembe gheyɛ yitea nza yɛ le mpi. Tsagha ne, kateɗepete yɛ 'ya ya kaMahwətə.»

⁷Cape 'ya kazlape nda ghena ke 'yɛ'yɛa shɛhɛ kala nya gezete ɗa Shala. Ma tewə 'ya kekiɗimte ghena kageze ne, pa 'ya fate gaka ta wəsə kala gwezlare ta wəshi: zhibədikə 'yɛ'yɛ nyighɛ kajejikə ghəa nci.

⁸Ma newe 'ya ne, kapa geva berete ba'a sli te hɛ, zhiɓə hweta zhiɓəaghe geva kənəa hɛ. Ama sefəa mpi shɛ mbe hɛ we.

⁹Ma ke Mahwətə sha 'ya: «Wəndə ŋelɛ, gezete nda ghena ta ɗa ke sefəa mpi, kaganda ne, gezete nda ghena ta ɗa. Ma pa na shɛ: Wa nya ghena nya geze Shala Mahwətə nya: ‹Sefəa mpi, vɛke geva shave mbe bela nyi wəfaɗe nyi, vɛaghe geva kənəa mbeli nyi kempə mpə nyi yitea nza hɛ le mpi.›»

¹⁰Ntake 'ya kageze ghena shɛhɛ kala nya gezave ɗa Shala, shilimə sefəa mpi mbe mbeli nyi kempə mpə nyi, ntake hɛ kazhɛne mpi. Pepelɛhetɛme hɛ sate te ŋkwa: kawəvəsəa ka sewajɛ nya wəba ŋkɛ.

¹¹Ma ke sha 'ya ɓiyitsa: «Kafa na wəndə ŋelɛ, ma 'yɛ'yɛ nyi ne, nza ta pɛtɛa ka Israyɛl yancɛ hɛ. Kwa nza ŋkɛ, ma ke hɛ sha geze: ‹Kala 'yɛ'yɛ nyi keghwele ghwele n'yɛ, rayɛ sebe te mbele ta n'yɛ, kencɛhwe ncɛhwe n'yɛ.›

¹²Vatse, gezete nda ghena ta ɗa ke hɛ, ma pa na sha hɛ: Wa nya ghena nya geze Shala Mahwətə nya: 'Ya kateghwene yɛ kwele ta ŋayɛ yitea fə ŋayɛ kasame, gheyɛ mbelia ɗa. Kadzete hɛɗia Israyɛl tefə ŋayɛ 'ya.

¹³Ma vəa ŋkwa nya teghwene yɛ kwele ta ŋayɛ 'ya, nya tefə ŋayɛ 'ya kasame gheyɛ mbelia ɗa ne, kateɗepete yɛ 'ya ya kaMahwətə.

¹⁴Kateve sefəa ɗa 'ya mbe gheyɛ yitea nza yɛ le mpi, katefə ŋayɛ 'ya kadzete hɛɗia ŋayɛ. Ma tsagha gɛ, kateɗepete yɛ kegezete ghena 'ya, 'ya Mahwətə ne, pa 'ya yipəyi kwa. 'Ya Mahwətə nde gezete.»

¹⁵Ma ke Mahwətə sha 'ya:

¹⁶«Wəndə ŋelɛ, kelete geta shɛ na rafete ghena nyi te: ‹Yɛ Zhəwda le ka Israyɛl nyi jikə le.› Kwetere wəmbəa ŋkɛ, kelete kwete geta ɓiyitsa, rafete ghena nyi te: ‹Zhozɛf keɗema Ɛfrayim le ka Israyɛl nyi jikə le.›

¹⁷Jikəte ghəa geta shɛhɛ yitea nza hɛ kageta kwetɛŋe mɛa dzeve ta ŋa.

¹⁸Ma te'yɛwe hwelefe ta ŋa va gha: ‹Va wa ɗema na ncɛ n'yɛ zeweve ta wəsə nya mene nya na wa?›

¹⁹Ma pa na sha tezhɛne nda ke hɛ: Wa nya ghena nya geze Shala Mahwətə nya: 'Ya katekele geta ta Zhozɛf nya mbe dzeve ta Ɛfrayim ba'a ka Israyɛl nyi jikə le. 'Ya katejikə vare geta ta Zhəwda yitea nza hɛ bake nci kageta nya kwetɛŋe mɛa dzeve ta ɗa.

²⁰Mɛa dzeve ta ŋa tenza geta nyi rafate wəshi nyi na te kwa kema ta nci.

²¹Ma pa na sha hɛ: Wa nya ghena nya geze Shala Mahwətə nya: 'Ya katefə ka Israyɛl se hwa kweci hwelefefi nyi lənji nyi hɛ hwa hɛ, 'ya katetsene hɛ se te yayata ŋkwa ba'a katezhɛne hɛ kadzete hɛɗia nci.

²²Kahwelefe nya kwetɛŋe tezhɛre hɛ 'ya te hɛɗi, hwa ghweme nyi mbe Israyɛl. Meghe nya kwetɛŋe nde tesleke hɛ pɛtɛ. Katezhɛne hɛ kanza kahwelefefi bake keɗema kahɛɗi bake we.

²³Katezhɛne hɛ kazhɛre ghəa nci wale wale laka wəshi nyi zhɛre hɛ kashala, wəshi nyi ndiremi ndiremi kashasha ta nci keɗema fama ghena ta nci we. Katembele hɛ 'ya se te ŋkwa nyi se hɛ, te ŋkwa nyi se hɛ kaka jaɗafa. Katepɛ hɛ 'ya wɛŋe, katenza hɛ kambelia ɗa ba'a katenza 'ya kaShala ta nci.

²⁴Nde mene slene ta ɗa David nde tenza kameghea nci, deke gheŋkɛ nde tenza kande ya hɛ pɛtɛa nci. Katedzeghwa hɛ kala nya gezete nda 'ya ke hɛ, katehawe hɛ va wəshi mahalegəa ɗa ba'a katemene slene hɛ le hɛ.

²⁵Mbe hɛɗi nya ndeke nda 'ya ke nde mene slene ta ɗa Zhakob tenza hɛ, hɛɗi nya nzahwe nza ka shihɛ ŋayɛ mbe. Kaghala ghala tenza hɛ le ghəa nci, ŋwalea nci ba'a hwelefefia nci te hɛɗia shɛ. Nde mene slene ta ɗa David nde tenza kameghea nci kaghala ghala.

²⁶Katemene jikə geva ta kwelɛŋe 'ya le hɛ, kajikə geva nya kaghala ghala tenza ŋkɛ. Kateve hɛ 'ya te hɛɗia nci, kateya hɛ 'ya kwele kwele. Te tepe ta nci teve ghɛa ɗa 'ya kaghala ghala.

²⁷Hwa hɛ tenza 'ya. KaShala ta nci tenza 'ya ba'a kambelia ɗa tenza hɛ.

²⁸Ma vəa ŋkwa nya tenza ghɛa ɗa te tepe ta nci kaghala ghala ne, kateɗepete kweci hwelefefi 'ya ya kaMahwətə nya keveyi Israyɛl tekeleke kezha mene ɗa slene.»