Read kapsiki Ɛzɛkiyɛl 38 Bible Online

Ɛzɛkiyɛl 38 - kapsiki bible

Ɛzɛkiyɛl 38

¹Ma ke Mahwətə sha 'ya:

²Wəndə ŋelɛ, zhɛrete kema laka Gog, wəndə nya wəba te ghəa ka Mɛshɛk ba'a ka Təwbal, te hɛɗia Magog shɛ na gezete nda ghena ta ɗa.

³Ma pa na shɛ: Wa nya ghena nya geze Shala Mahwətə nya: 'Ya kateme te gha Gog, wəndə nya wəba te ghəa ka Mɛshɛk ba'a ka Təwbal.

⁴'Ya katen'yi yɛ dzara yitea meghena ta ŋa kezha ntsehe ŋa le berete. 'Ya katefəmte ŋayɛ te hɛɗia ŋa zlaɓe le ka sewajɛa ŋa pɛtɛ: yɛ gədəwə, ka zleɗe gədəwəa lɛmə nyi nza lekwesa ganji mbe, wəvəsəa ka sewajɛ nya wəba nya nza nya yɛ gelə ba'a yɛ kafayɛ yitea dzeve va hɛ.

⁵Kwa sebe ta nci tenza ka sewajɛa ka Pɛrse, ka Ɛtiyopi ba'a ŋa ka Pəwt, pɛtɛa nci le yɛ gelə ba'a yɛ kwenə,

⁶hɛɗia Gomɛr le ka sewajɛa ŋkɛ, Bɛt-Togarma nya pelɛ kwa keɗaŋe ta hɛɗi nya laka bela kwa gwela le ka sewajɛa ŋkɛ: kwele kwele tenza mbeli kwetere wəmbəa ŋa.

⁷Hite geva megela, gha le mbeli nyi ketsenete geva nyi yitea gha, gha nde tenza kande ya hɛ.

⁸Ma kwa sebe ta va kwele kwele ne, kateghwene ŋa 'ya kampa le Israyɛl. Ma vəa ŋkwa shɛ ne, nahe mbeli nyi mbe ketembelenji va mpa ba'a keteshavenji mbe kweci hɛɗi nyi se hɛ. Nahe hɛ ketsenete geva dzeyi hwa ghweme nyi mbe Israyɛl nyi keteməakɛ temə keŋzla ŋzla. Ma kwa sebe ta nya shavenji hɛ hwa kweci hwelefefi ne, mbe kwelɛŋe tenza hɛ.

⁹Ma gha, ka sewajɛa ŋa ba'a kweci hɛɗi nyi dzeyi yitea gha ne, kateha nda mpa yɛ ke hɛ. Kala sefə nya wəba tedzeghəa hɛ yɛ, kala meləkwə ləkwə tenza yɛ kənəa hɛɗia nci.

¹⁰Wa nya ghena nya geze Shala Mahwətə nya: Ma te vecia shɛ ne, kwele kwele tedzembe mehele ta ŋa zəzə, ghena kwa ndiremi yatezəzə na.

¹¹Katezəzə na kaha nda mpa ke mbeli nyi kwelɛŋe ba'a nyi gwezlayɛ te hɛɗi nya ɗema zli yitea meleme nyi te, nya ɗema yɛ gelembe mɛa hɛ keɗema nya ɗema kale te hɛ.

¹²Katese na kazləgwə ba'a kafə wəshi, kateha nda mpa na ke mbeli nyi kezhɛneyi geva mbe meleme nyi kese kakwəfi. Nahe hɛ ketsenete geva ba'a keshavenji mbe kweci hɛɗi, nahe hɛ kekemave wəshi keseɗa ba'a mcɛlə. Te wədəa hɛɗi lema nzanji hɛ.

¹³Ma te'yɛwe ka Saba, ka Dɛdan, ka zhɛre dzeve ta ka Tarsis ba'a kweci meleme dzeyi yite va gha: Gha se kezha fə wəshia mbeli na? Kezha zləgwə wəshia mbeli tseneke ka sewajɛa ŋa na na? Yitea fə yɛ mze kwa tɛawetɛa ba'a mze kwa tere tere, wəshi keseɗa ba'a mcɛlə kawəshi nyi fə mbeli kwele kwele hwa mpa se na na?

¹⁴Vatse gɛ, gezete ghena ta ɗa wəndə ŋelɛ. Ma pa na sha Gog: Wa nya ghena nya geze Shala Mahwətə nya: Ma vəa ŋkwa nya tenza ka Israyɛl, mbelia ɗa mbe kwelɛŋe ne, peleŋeɗe teslə na.

¹⁵Katesawa na pelɛ kwa keɗaŋe ta hɛɗia ŋa nya laka bela kwa gwela, gha le ka sewajɛa kweci hɛɗi. Pɛtɛ tenza yɛ pelɛ gədəwəa lɛmə. Kambeli nyi kwele kwele ba'a kawəvəsəa ka sewajɛ nya wəba tenza yɛ.

¹⁶Kateha nda mpa na ke ka Israyɛl, mbelia ɗa, katenza na kənəa hɛɗia ŋkɛ kala meləkwə ləkwə nya kenza dibə dibə kənəa hɛɗi. Te kwa keɗaŋe ta və temene geva ŋkɛ. Kateghwene ŋa 'ya kase kampa le hɛɗia ɗa. Ma tsagha ne, kateɗepete kweci hwelefefi 'ya ya kaShala nya kaganda. Katencɛ nda 'ya ke hɛ laka slene nya menete ɗa na Gog.

¹⁷Wa nya ghena nya geze 'ya, 'ya Shala Mahwətə nya: «Ma vəashi ne, nahe 'ya kegezete ghena te gha laka ka mene slene ta ɗa nyi kaka mɛ ŋkwa ta ka Israyɛl. Kava kwele kwele ne, nahe hɛ kezlapete kateghwene ŋa 'ya kampa le mbelia ɗa.

¹⁸Ama te veci nya teha nda mpa na, gha Gog ke Israyɛl ne, kwele kwele tebeze wənəa ɗa. 'Ya Shala Mahwətə nde gezete.

¹⁹Va ghwə ta hwepe wənəa ɗa ne, kazeme 'ya kafela: Ma te vecia shɛ ne, gaŋkəɗə ta hɛɗi nya wəba nde temene geva te hɛɗia Israyɛl.

²⁰Keyirə yirə tenza kelepe nyi kwa ndərə, 'yɛ nyi yitea ghweme, wəshi keseɗa nyi hwa gamba, wəshi nyi kentsehe dzate te hɛɗi ba'a mbeli nyi te hɛɗi lema va ghazlənə kwa kema ta ɗa. Kateŋzleŋzlanji yɛ ghweme, yɛ kələŋə ba'a pɛtɛa dewe nyi ŋate mbeli.

²¹Kateghwene ŋa mpa 'ya kezha ya yɛ ghweme ta ɗa Gog, 'ya Shala Mahwətə nde gezete. Katempempəmte ghəa nci ka sewajɛa ŋa.

²²Ma gha le ŋa ŋa ne, ba ba'a mte kwamte mpa yatemeha ghwə 'ya te gha le. Va nya wəba, kwacakelɛ ba'a laɗe ta ghwə yateghwene 'ya kadzeghəa gha, kadzeghəa ka sewajɛa ŋa ba'a kadzeghəa kweci hwelefefi nyi yitea gha.

²³Tsagha ne, katencɛ nda 'ya ke kweci hwelefefi 'ya ya kaShala nya kaganda. Tagha gɛ, kateɗepete hɛ 'ya ya kaMahwətə.»