Read kapsiki Ɛzɛkiyɛl 39 Bible Online

Ɛzɛkiyɛl 39 - kapsiki bible

Ɛzɛkiyɛl 39

¹Wəndə ŋelɛ, gezete nda ghena ta ɗa ke Gog, ma pa na shɛ: «Wa nya ghena nya geze Shala Mahwətə nya: 'Ya kateme te gha Gog, wəndə nya wəba te ghəa Mɛshɛk ba'a Təwbal.

²'Ya katekele ŋa shave mbe hɛɗia ŋa nya pelɛ kwa keɗaŋe ta ŋkwa nya laka bela kwa gwela, 'ya kateŋka ŋa le berete kalə kampa le ghweme nyi mbe Israyɛl.

³Katempa ŋa 'ya yitea teɗe rəgia ŋa sawa mbe dzeve kwa gwela ta ŋa ba'a katebete yɛ have ta ŋa 'ya sawa mbe dzeve kwa zeme ta ŋa.

⁴Ma gha le ghə ŋa, ka sewajɛa ŋa ba'a kweci hwelefefi nyi kwa sebe ta ŋa ne, mɛke tempə yɛ hwa ghweme nyi mbe Israyɛl. Ke yɛ zleŋa ba'a ke wəshi nyi hwa gamba tefə nda geva ta ŋayɛ 'ya kawəshi kezeme.

⁵Tahwepare teteɗe na te tepe ta gamba kala nya gezete 'ya, 'ya Shala Mahwətə.

⁶Katendə ghwə 'ya yitea hɛɗia Magog ba'a yitea mbeli nyi kenewe ghəa nci nyi kwelɛŋe te hɛɗi nyi kesləyi geva nyi te tepe ta yɛmə. Tsagha ne, kateɗepete hɛ 'ya ya kaMahwətə.

⁷Katencɛ sləa ɗa nya keveyi geva tekeleke 'ya hwa ka Israyɛl nyi kambelia ɗa, katezhɛne 'ya kasərə hɛ kakele zləvə te sləa ɗa we. Tsagha ne, kateɗepete kweci hwelefefi 'ya ya kaMahwətə Shala nya kaganda ta ka Israyɛl.

⁸Ma wəshia shɛhɛ ne, kaganda temene geva hɛ, gha yagha hɛ kamene geva. Gheŋkɛ ya kavecia meha ghwə nya gezete 'ya. 'Ya Shala Mahwətə nde gezete.

⁹Kateshave mbeli nyi mbe meleme nyi mbe Israyɛl, katemeha ghwə hɛ kezha tere wəshi kempa ta ka ghema. Gelə nyi jama jama ba'a nyi ɓɛhwɛ ɓɛhwɛ, yɛ rəgi ba'a yɛ have, yɛ kafayɛ ba'a yɛ megha yatetse ghwə daɗemə daɗemə te hɛ kava mberefaŋe.

¹⁰Katezhɛne mbeli kadzemte hwa gamba kapa sheghwə we, katezhɛne mbeli katsasle wəfe nyi mbe ghɛa wəfe we, va nya nza ŋkɛ le wəshi kempa shɛhɛ temeha ghwə mbeli. Katezləgwə ba'a katefə wəshia mbeli nyi kese kazləgwə ba'a kafə ŋa nci hɛ. 'Ya Shala Mahwətə nde gezete.

¹¹Ma te vecia shɛ ne, pelɛ hɛɗia Israyɛl teve nda ŋkwa kwele 'ya ke Gog. Kwa zlərəa mbeli nyi kedzeghwa laka ŋkwa kesame veci yitea ndərə kwa Ghwənəghwə tenza ŋkɛ. Katefɛa nda hweŋkwa kwelea shɛ ke mbeli nyi kedzeghwa. Tagha tela yɛ Gog le mbeli nyi kwa sebe ta ŋkɛ mbeli. Ma teheka ŋkwa shɛ mbeli ne, ‹Zlərəa mbelia Gog nyi kwele kwele.›

¹²Gare tere mberefaŋe temene ka Israyɛl kezha la mbelia shɛhɛ pɛtɛ nda nza ŋkwa nya te hɛɗi kanza wɛŋe.

¹³Pɛtɛa mbeli nyi mbe hɛɗia shɛ katela hɛ, kwele kwele tezlama hɛ te veci nya tencɛ zləvəa ɗa 'ya. 'Ya Shala Mahwətə nde gezete.

¹⁴Kwetere wəmbəa tere mberefaŋe ne, katenta mbeli nyi kedzedzeghwa dzeyi te hɛɗi mbeli kezha zele ba'a kezha la mbeli nyi ketene kempə mpə dzeyi te hɛɗi.

¹⁵Kwetɛ kwetɛŋe tedzeghwa hɛ dzeyi te hɛɗi. Ma nahe kenakɛ 'yɛ'yɛa wəndə ŋelɛ kwete wəndəa nci ne, pa pate pelɛ terasle yite, kezha ncɛ nda ke ka la ŋkwa nyi ketese kafə kezha la hɛ kwa zlərəa mbelia Gog.

¹⁶Katenza kwete meleme nya tenza sləa ŋkɛ kaHamona, geze ta ŋkɛ ‹Mbeli kwele kwele›. Tsetse tezhɛre hɛɗi mbeli wɛŋe.»

¹⁷Ma ke Shala Mahwətə sha 'ya ɓiyitsa: «Wəndə ŋelɛ, hekake mama ta 'yɛ ba'a wəshi keseɗa nyi hwa gamba, ma pa na sha hɛ: Se mə te yayata ŋkwa, tseneke mə geva kezha melɛ nya tedzeghe 'ya kezha gheyɛ. Melɛ nya wəba nde tedzeghe geva hwa ghweme nyi mbe Israyɛl. Sli yatezeme yɛ ba'a mimi yatesa yɛ.

¹⁸Slia ka katsala kɛfia ka sewajɛ ba'a mimia mbeli nyi te ghə te hɛɗi lema, nyi dzeghekɛ melɛ mbeli le hɛ te ŋkwa gamea lɛmə, zhɛgwəa lɛməa timɛti, zhɛfa lɛmə, mcɛmcɛlia ka Bashan nyi dɛɓedɛa dɛɓedɛa yatezeme yɛ ba'a yatesa yɛ.

¹⁹Behe behe tenza yɛ va merege ta nci ba'a keghwəyi ghwəyi va mimia nci: gheŋkɛ ya kamelɛ nya tedzeghe 'ya kezha gheyɛ.

²⁰Ma wəshi kezeme ta ɗa nyi tezeme yɛ behe behe ne, gədəwəa lɛmə ba'a mbeli nyi kezleɗe hɛ, ka katsala kɛfia ka sewajɛ ba'a mama ta mbeli nyi kempa. 'Ya Shala Mahwətə nde gezete.

²¹Katencɛ nda zləvəa ɗa 'ya ke kweci hwelefefi. Katenewe hɛ tsema tsema temeha ghwə 'ya te hɛ ba'a tencɛ berete ta ɗa 'ya te hɛ.

²²Se mɛa vəa shɛ gɛ ne, kateɗepete ka Israyɛl 'ya ya kaMahwətə Shala ta nci.»

²³Tsagha ne, kateɗepete kweci hwelefefi nahe ka Israyɛl kefəghe geva kadzete kwete hɛɗi tewəmbəreke nya ɗema hɛ kese kafa ɗa ghena. Vatse zhɛrave nda wəmbə 'ya ke hɛ ba'a peleyi hɛ 'ya mbe dzeve ta ka ghema ta nci yitea mpənji hɛ pɛtɛ va kafayɛ.

²⁴Nahe 'ya kemenete nda ke hɛ kala slene nyi wale walea nci ba'a fama ghena ta nci. Vatse zhɛrave nda wəmbə 'ya ke hɛ.

²⁵Ma gɛ ne, wa nya ghena nya geze Shala Mahwətə nya: «Tsetsenya ne, 'ya katezhɛre nza ta Zhakob, 'ya katezhɛ heli yitea ka Israyɛl ba'a 'ya katencɛ zlɛa ɗa tewəmbəreke sləa ɗa nya keveyi geva tekeleke.

²⁶Tsagha ne, katezaghə wəsə hawe nya kekesame hɛ mbe beze ghena nyi menete ɗa hɛ hɛ. Mbe kwelɛŋe tezhɛne hɛ kanza te hɛɗia nci, wəndə shɛ katezhɛne kadake hɛ we.

²⁷Ma vəa ŋkwa nya tefə hɛ 'ya shave hwa kweci hwelefefi, nya tetsene hɛ 'ya se te hɛɗia ka ghema ta nci ne, katencɛ 'ya, 'ya ya kaShala nya kaganda hwa hɛ kwa kema ta kweci hwelefefi.

²⁸Tsagha ne, kateɗepete hɛ 'ya ya kaMahwətə Shala ta nci. Va nya nza ŋkɛ, kwetere wəmbəa nya fəghe hɛ 'ya kadzete kweci hɛɗi ne, katetsene hɛ 'ya te hɛɗia nci, katesərə wəndəa nci 'ya ya kwetɛŋe pelɛagha we.

²⁹Katezhɛne 'ya kazhɛre nda wəmbə ke hɛ we, va nya nza ŋkɛ ne, sefəa ɗa yatevɛ 'ya kadzeghəa ka Israyɛl. 'Ya Shala Mahwətə nde gezete.»