Read kapsiki Ɛzɛkiyɛl 4 Bible Online

Ɛzɛkiyɛl 4 - kapsiki bible

Ɛzɛkiyɛl 4

¹Ma ke Mahwətə sha 'ya: «Wəndə ŋelɛ, kelete brəki shɛ na veyi te kema ta ŋa. Rafate nza ta meleme ta Zhɛrəzalɛm te.

²Kwa sebe ta ŋkɛ, ncɛte tsema tsema dzaslete ŋkɛ ka ghema, late ki kase kadzembe, tsenete hɛɗi dzeyi yite, menete ghedəkwəa ka sewajɛ ba'a yɛ wəmata kempa dzeyi yite.

³Kwa sebe ta ŋkɛ kelete lɛ kwa slapesla shɛ na mɓete kala zli lɛ kwelɛ gheyɛ le meleme. Pelaghe ntsə kənəa meleme: keɗa ɗa ŋkɛ, gha nde ɗate ŋkɛ. Wəsəa shɛ ya kawəsə kencɛ nda ntsehwele ke ka Israyɛl.

⁴Ɓelahe ŋa laka bela kwa gwela, nya teve jaɗafa ta ka Israyɛl na. Kala hɛ nyi temene na laka bela nyagha ne, ɗaŋeɗa ta jaɗafa ta nci nde tenza kənəa gha.

⁵Kateɓela ŋa hɛ 'ya yipə yipə le yɛ va ta jaɗafa: hɛ gwəmsə mahekene ba'a meslimsə. Ma tsagha gɛ, katenza ɗaŋeɗa ta jaɗafa ta ka Israyɛl kənəa gha.

⁶Ma kenahenji hɛ nyighɛ ne, zhɛne ɓelahe ŋa laka bela kwa zeme kezha kelehwe ɗaŋeɗa ta jaɗafa ta ka Zhəwda kahɛ wəfaɗemsə. Hɛ kwetɛŋe yave ŋa 'ya mbe yayata va nya menete jaɗafa ka Zhəwda.

⁷Ma kwa sebe ta ŋkɛ ne, zhɛreghe kema laka Zhɛrəzalɛm nya ɗa mbeli. Haghe dzeve nya ɗema lekwesa kənə laka gheŋkɛ shɛ na gezete nda ghena ta ɗa.

⁸Ma 'ya le ŋa ɗa gɛ ne, katehwepe ŋa 'ya le zewe kezha ɗema na kazhɛrete geva te kwete bela pa te və kiɗimte hɛ nyi ɗa Zhɛrəzalɛm na te na.

⁹Ntave marəwrə, megi, tsə, tsə kwa gheme, ha ba'a haŋwaya shɛ na beteyi hɛ kwa dəghwə kezha takɛ kaɗafa. Gheŋkɛ nde tenza kawəsə kezeme ta ŋa mbe hɛ nyi gwəmsə mahekene ba'a meslimsə nya nza nya na meɓelahe te bela nya kwetɛŋe.

¹⁰Gare kwa bake ta bela ta kiləwə tezeme na kavəghwə: gheŋkɛ yatezeme na pa va hendɛ.

¹¹Dzeghe dzeghe tedzeghe yɛmə kesa na kavəghwə perə, gare litrə kwetɛŋe tesa na.

¹²Kala ɗafa kwalekwala ta megi tenza wəsə kezeme ta ŋa, le wevɛa wəndə ŋelɛ temeha ghwə nya teta na te kwa ntsə ta mbeli pɛtɛ.»

¹³Ma ke Mahwətə mtsehete: «Tsagha tezeme wəshi kezeme nyi wale wale ka Israyɛl hwa kweci hwelefefi nyi tetaze hɛ 'ya kadzehwe hɛ.»

¹⁴Ma 'ya zhɛnete nda: «Shala Mahwətə yawe, kegha 'ya kanza wale wale we. Ghala yake ɗa mbeli pa ɓeshi ne, kegha 'ya kazehwe slia wəsə keseɗa kwa mte mte keɗema nya peslekɛ wəsə nya hwa gamba we. Kegha sli nya wale wale kwa mɛa ɗa we.»

¹⁵Ma ke zhɛnete ɗa: «Ma tsagha ne, nahe 'ya kepelave ŋa hweŋkwa kave regea sla te ŋkwa wevɛa wəndə ŋelɛ kezha ta wəsə kezeme ta ŋa.»

¹⁶Ma ke zhɛne kamtsehete: «Wəndə ŋelɛ, 'ya kateza sebe te wəshi kezeme nyi wəmbəyi mbeli mbe Zhɛrəzalɛm. Dzeghe dzeghe tezhɛne mbeli kadzeghe wəshi kezeme ba'a yɛmə kesa, kwetɛ kwetɛŋe tenza mehele ta mbeli tewəmbəreke gheŋkɛ.

¹⁷Ma va nya nza wəshi kezeme ba'a yɛmə dewə ne, kwetɛ kwetɛŋe tenza mehele ta mbeli kwelɛ ghəa nci ba'a katepepahe hɛ va jaɗafa ta nci.»