Read kapsiki Ɛzɛkiyɛl 40 Bible Online

Ɛzɛkiyɛl 40 - kapsiki bible

Ɛzɛkiyɛl 40

¹Ma te gha ta va kwa bakemsə mcɛfeghəmbe nya fəhwe n'yɛ mbeli, mbe kwa meŋe ta hɛa tere, va meŋe wəfaɗeghəmbe kape kape ghala ŋzlamte geva Zhɛrəzalɛm ne, pa berete ta Mahwətə dzeghənyɛ kənəa 'ya ba'a keleghe ɗa kajive pelɛagha.

²Ma newe 'ya ne, laŋe Shala te 'ya kajive hɛɗia Israyɛl. Pa ŋkɛ veyi ɗa kwa ghəa ghweme nya biya nya nza kweci ghɛ dzeɓakwe kala ghɛ nyi mbe meleme laka bela kwa zeme ta ŋkɛ.

³Pa ŋkɛ keleghe ɗa kajive, dəkwə 'ya te kwete wəndə nya nza geva ta ŋkɛ kala mze kwa ghwə ghwə. Zewe pawa kedzeghe wəsə ba'a cafecɛ kedzeghe wəsə ya yitea dzeve ta ŋkɛ. Meslete nzanyɛ ŋkɛ mɛa ŋkwa kedzeki.

⁴Ma ke sha 'ya: «Wəndə ŋelɛ, ghwenemte ntsə ta ŋa ba'a sleme ta ŋa megela! Vate mehele ta ŋa ndeɗekə te wəshi nyi tencɛ ŋa nyi 'ya. Kwa nza ŋkɛ kezha veregheve hɛ ndeɗekə keleke geva na teke. Kwetere wəmbəa ŋkɛ, kateɓela nda wəshi nyi nakɛ na na pɛtɛ ke ka Israyɛl.»

⁵Newe 'ya: dzasle zli yitea ghɛa Shala. Ma yitea dzeve ta wəndəa shɛ ne, zake cafecɛge kedzeghe ŋkwa nya nza biya ta ŋkɛ kadzeghe ŋkwaŋe. Ma yayata dzeghe[1] ne, gare slə yitea fegwele hwa'a mɛa ŋwalea dzeve, biya ma ke dzeghe nya tsetsenya, va nya nza kwete yite gare bezlea hwəa dzeve. Pa ŋkɛ dzeghete deɓedea zlia shɛ kadzeghe ŋkwaŋe ba'a biya ta ŋkɛ kadzeyitea ghweme kadzeghe ŋkwaŋe ɓiyitsa.

⁶Ntəŋə ŋkɛ kadzeyi laka ŋkwa kedzeki nya laka ŋkwa kesame ta veci. Tarame tarame ŋkɛ dzemenyɛ te taŋa nyi mɛ. Zhibədikə ŋkɛ kadzeghe ŋkwa nya mɛa ŋkwa kedzeki shɛ: dzeghe ŋkwaŋe bezlea ŋkɛ, dzeghe ŋkwaŋe dzekidze ta ŋkɛ.

⁷Yayata cɛa ka ya ŋkwa nya dzeki kwa hweŋkwa nya wəba ne, kwete kwete te cafecɛge yɛ biya le bezlea ŋkɛ. Ma dadəwə nyi kwelɛ hɛ ne, dzeghe mcɛfe ɓəsəɓəa nci. Ma ŋkwa nya mɛa ŋkwa kedzeki nya te kema ta cɛ nya kwa kema ta ghɛa Shala ne, dzeghe ŋkwaŋe biya ta ŋkɛ.

⁸Pa ŋkɛ dzeghete teɓe keshi nya mɛa ŋkwa kedzeki:

⁹dzeghe deghese kadzeki dzekidze, dzeghe bake ɓəsəɓəa dewe ta ŋkɛ. Ma dzekidze ne, teɓe keshia shɛ ya dekwe ma yitea ghɛa Shala.

¹⁰Ma cɛa ka ya ŋkwa nyi laka ŋkwa kedzeki nya laka ŋkwa kesame ta veci ne, yipə yipə wəba ta nci. Ma te yayata bela ta ŋkwa kedzeki nya wəba nya ne, mahekene teke, mahekene teke. Kanya kwetɛŋe ɓəsəɓəa dadəwə nyi kwelɛ hɛ.

¹¹Zhibədikə wəndəa shɛ kadzeghe ŋkwa nya kwa ŋkwa kedzeki shɛ: dzeghe meŋe bezlea ŋkɛ ba'a meŋe mahekeneghəmbe dzekidze ta ŋkɛ.

¹²Ma dzeyi mɛa cɛa ka ya ŋkwa nyi nza nyi dzeghe ta nci ŋkwaŋe teke ŋkwaŋe teke ba'a dzeyi mɛa yayata bela ta hweŋkwa nya wəba ne, kwete dadəwə nya nza biya ta ŋkɛ gare dzeghe kwetɛŋe ya shɛ.

¹³Pa wəndəa shɛ dzeghete ŋkwa nya keslə talɛ wəmbala ta kwete hwa cɛa shɛhɛ hwa'a talɛ ŋa cɛ nya kwa kema ta ŋkɛ nya: dzeghe bakemsə mcɛfeghəmbe sləyi ŋkɛ.

¹⁴Ntəŋə kadzeghe nza ta cɛ nya dzaslete nya ŋwela nya pelɛke pelɛke: dzeghe bakemsə bezlea ŋkɛ.

¹⁵Ghala slə nde mɛa ŋkwa kedzeki nya pelɛke pelɛke hwa'a mɛa ŋkwa nya mɛa ŋwela nya ki ghɛ ki ghɛ ne, dzeghe mcɛfemsə dzeghete ŋkɛ.

¹⁶Wəfela nyi nza wəshi mɛ kala lareya ya dzate te cɛa shɛhɛ ba'a dzeyi te dadəwə nyi kwelɛ hɛ. Tsagha dzeyi te dewe nyi mbe cɛ mbe cɛ va cɛa shɛ. Ma dzeme vare dewe ta ŋkwa kedzekia shɛ ne, slekea peha yarerafeyi mbeli.

¹⁷Pa wəndəa shɛ kelakave ɗa kashave te ŋwela ta ghɛa Shala. Ma ŋwela nya kemɗɛ mɗɛa shɛ ne, dzasle ŋkɛ kwa kweci cɛ mahekenemsə.

¹⁸Kemɗɛ mɗɛ ŋkwa nya te hɛɗi dzeyi mɛa ŋkwa nyi dzeki mbeli kwa. Sawase ma mɗɛ ta ŋkwa nyi pelɛ te ŋwela ke nyi mbe cɛ mbe cɛ.

¹⁹Dzeghakwe wəndəa shɛ sha ŋkwa nya kwelɛ yɛ dewe ta ŋkwa kedzembe ghɛa Shala nya kejive te ŋwela hwa'a mɛa dewe ta ŋwela nya ki ghɛ ki ghɛ: kadzeghe gwəmsə ɓelate ŋkɛ laka bela kesame ta veci. Kwetere wəmbəa ŋkɛ ne, ntəŋə ŋkɛ laka bela kwa gwela.

²⁰Dzeghakwe ŋkɛ dzeghete biya ba'a bezlea gelembe nya mɛa ŋkwa keshave pelɛke te ŋwela laka bela kwa gwela.

²¹Ɓawe hweŋkwa nya beŋwe te tepe ve ba'a mahekene teke mahekene teke cɛa ka ya ŋkwa vare yayata bela ta hweŋkwa shɛ. Yipə yipə wəba ta yɛ dadəwə shɛhɛ ba'a cɛ shɛ le nyi laka gelembe kwa ghate: dzeghe mcɛfemsə biya ta ŋkɛ ba'a dzeghe bakemsə mcɛfeghəmbe bezlea ŋkɛ.

²²Ma cɛ shɛ, yɛ wəfela nyi te ba'a peha nyi dzeme vare, yipə yipə wəba ta nci le ŋa nyi laka ŋkwa kedzeki kwa ghate. Ma kezha ntsehe mɛa gelembe nya laka bela kwa gwela ne, taŋa mberefaŋe yadzeme wəndə. Kwa kema ta taŋa nyagha cɛa shɛ.

²³Ma kwa kema ta gelembe nya laka bela kwa gwela ne, kwete ŋkwa kedzeki kadzete ŋwela nya ki ghɛ ki ghɛ ya shɛ, yipə yipə ŋkɛ le nya laka ŋkwa kesame ta veci. Ntake wəndəa shɛ kadzeghe ŋkwa nya keslə mɛa kwete ŋkwa kedzeki hwa'a mɛa kwete: kadzeghe gwəmsə dzeghete ŋkɛ.

²⁴Kwetere wəmbəa ŋkɛ, ntəŋə keleghe ɗa dzawa laka bela kwa zeme. Tagha ɓiyitsa ne, ŋkwa kedzeki ya shɛ. Zhibədikə ŋkɛ kadzeghe yɛ cɛa ka ya ŋkwa, yɛ dadəwə ba'a cɛ. Yipə yipə wəba ta nci le nyi laka kweci ŋkwa kedzeki nyighɛ.

²⁵Tagha ɓiyitsa ne, dzasle wəfela dzeyi yitea ŋkwa kedzeki ba'a yitea cɛ nyagha. Yipə yipə wəfela shɛhɛ le nyi laka ŋkwa kesame ta veci ba'a nyi laka bela kwa gwela. Ma ŋkwa kedzeki nya laka bela kwa zemea shɛ ne, dzeghe mcɛfemsə biya ta ŋkɛ ba'a dzeghe bakemsə mcɛfeghəmbe bezlea ŋkɛ.

²⁶Ma kezha dzeme hwa'a mɛa ŋkwa kedzeki nya laka bela kwa zemea shɛ ne, taŋa mberefaŋe yadzeme wəndə. Ma kwa kema ta taŋa nyighɛ ne, kwete cɛ kewəbanyɛ ya shɛ. Dzeve ta peha yarerafeyi mbeli dzeyi vare dewe mbe cɛ mbe cɛ va cɛa shɛ kezha pesa ŋkɛ laka yayata bela ta hweŋkwa nya beŋwe.

²⁷Ma te kema ta ŋkwa kedzeki ne, kwete ŋkwa kedzeki kadzete ŋwela nya ki ghɛ ki ghɛ ya shɛ. Ntake wəndəa shɛ kadzeghe ŋkwa nya kwelɛ hɛ: kadzeghe gwəmsə sləyi ŋkɛ.

²⁸Zhɛne ne, ntəŋə wəndəa shɛ le 'ya kadzeki te ŋwela nya ki ghɛ ki ghɛ dzeki kwa mɛ ŋkwa nya laka bela kwa zeme. Zhibədikə ŋkɛ kadzeghe gelembe nyagha: yipə yipə wəba ta ŋkɛ le kweci gelembe nyi mɛa ŋkwa nyi pelɛ pelɛ te ŋwela nya kwa degha.

²⁹Ma yɛ cɛa ka ya ŋkwa, dadəwə nyi kwelɛ hɛ ba'a teɓe keshia shɛ ne, yipə yipə wəba ta nci le nyi laka kweci ŋkwa kadzeki. Kawəfela kawəfela ŋkwa nya dzeyi vare cɛa shɛ. Ma gelembe nya laka bela kwa zemea shɛ ne, dzeghe mcɛfemsə biya ta ŋkɛ ba'a dzeghe bakemsə mcɛfeghəmbe bezlea ŋkɛ.

³⁰Dandelaŋe kweci cɛ nyi nza biya ta nci kadzeghe bakemsə mcɛfeghəmbe ba'a bezlea nci kadzeghe mcɛfe dzeyi yite.

³¹Ma mɛa cɛa shɛ wəndə ne, dararahwe newe ŋkwa nya pelɛ te ŋwela wəndə. Dzeve ta peha yarerafeyi mbeli dzeyi vare dewe nya mbe cɛ mbe cɛ kezha hi. Ma kezha ntsehe mɛa cɛa shɛ ne, taŋa deghese yadzeme wəndə.

³²Kwa sebe ta ŋkɛ, ntəŋə wəndəa shɛ le 'ya dzeki kwa ŋkwa kedzeki nya laka ŋkwa kesame ta veci. Ntake ŋkɛ kadzeghe ŋkwa kedzekia shɛ, yipə yipə wəba ta ŋkɛ le kweci ŋkwa kedzeki.

³³Ma yɛ cɛa ka ya ŋkwa, dadəwə nyi kwelɛ hɛ ba'a teɓe keshia shɛ ne, yipə yipə wəba ta nci le nyi laka kweci ŋkwa kedzeki. Dandelaŋe wəfela dzeyi te gelembea shɛ ba'a dzeyi te cɛa shɛ. Ma pɛtɛ biya ta ŋkwa kedzekia shɛ ne, dzeghe mcɛfemsə. Ma bezlea ŋkɛ ne, dzeghe bakemsə mcɛfeghəmbe.

³⁴Ma mɛa cɛa shɛ wəndə ne, dararahwe newe ŋkwa nya pelɛ te ŋwela wəndə. Dzeve ta peha yarerafeyi mbeli dzeyi vare dewe nya mbe cɛ mbe cɛ kezha pesa. Ma kezha ntsehe mɛa cɛa shɛ ne, taŋa deghese yadzeme wəndə.

³⁵Kwa sebe ta ŋkɛ, ntəŋə wəndəa shɛ le 'ya dzeyi laka ŋkwa kedzeki nya laka bela kwa gwela. Ntake ŋkɛ kadzeghe ŋkwa kedzeki shɛ. Yipə yipə wəba ta ŋkɛ le nyi laka kweci bela.

³⁶Ma nde perə ne, yɛ cɛa ka ya ŋkwa, yɛ dadəwə ba'a teɓe keshi ya mɛ, tsagha wəfela nyi dzasle dzeyi yitea teɓe keshia shɛ. Ma biya ta ŋkwa kedzekia shɛ ne, dzeghe mcɛfemsə. Ma bezlea ŋkɛ ne, dzeghe bakemsə mcɛfeghəmbe.

³⁷Ma mɛa cɛa shɛ wəndə ne, darahwe newe ŋkwa nya pelɛ te ŋwela wəndə. Dzeve ta peha yarerafeyi mbeli dzeyi vare dewe mbe cɛ mbe cɛ kezha hi. Ma kezha ntsehe mɛa cɛa shɛ ne, taŋa deghese yadzeme wəndə.

³⁸Kwete cɛ ya shɛ mɛa ŋkwa kedzeki nya laka bela kwa gwela nya. Mbe cɛa shɛ pɛ wəshi keseɗa nyi tedzeghe melɛ kwa tere tere mbeli le hɛ mbeli.

³⁹Ma te yayata bela ta cɛa shɛ ne, tabele ya shɛ bake. Te tabele shɛhɛ sla ghə mbeli te wəshi keseɗa kezha dzeghe melɛ kwa tere tere ba'a kezha kweci melɛ nyi dzeghe mbeli kezha jaɗafa ba'a kezha dimə ghə.

⁴⁰Ma pelɛke te ŋwela ta teɓe keshi ne, tabele ya shɛ wəfaɗe. Ma kenza wəndə kadzeki laka bela kwa gwela ne, wərə wəndə kanakɛ hɛ bake nyi teke bake nyi teke.

⁴¹Tabele deghese yamene slene mbeli le pɛtɛ kezha hene wəshi keseɗa kedzeghe melɛ: wəfaɗe laka nya bela, wəfaɗe laka kwete ɓiyitsa.

⁴²Ma tabele nyi wəfaɗe nyi mene slene nyi mbeli te kezha melɛ kwa tere tere ne, le pelɛ tsehete hɛ mbeli. Yipə yipə yɛ biya ta nci le bezlea nci. Kadzeghe kwetɛŋe ba'a kwete gasle yite yayata bela ta ŋkɛ ba'a dzeghe kwetɛŋe dzeme ta ŋkɛ yitea ghweme. Te hɛ bete wəshi kehene wəshi keseɗa kedzeghe melɛ kwa tere tere ba'a kweci melɛ mbeli.

⁴³Ma dzeyi yitea tabelea shɛhɛ ne, nahe mbeli kelate ŋkwa hweɗakwe gare bezlea dzeve bezlea ŋkɛ. Te tabelea shɛhɛ bete sli kedzeghe melɛ mbeli.

⁴⁴Ma kwetere wəmbəa ŋkɛ ne, pa wəndəa shɛ keleghe ɗa kadzeki kadzete ŋwela nya ki ghɛ ki ghɛ. Ma kiagha ne, yɛ cɛa ka gha cimə ya shɛ: mɛa ŋkwa kedzeki nya laka bela kwa gwela kwete, keghwene ghwene mɛa ŋkɛ laka bela kwa zeme. Ma kwete ne, mɛa ŋkwa kedzeki nya laka bela kwa zeme ŋkɛ, keghwene ghwene mɛa ŋkɛ laka bela kwa gwela.

⁴⁵Ma ke wəndəa shɛ sha 'ya: «Ma cɛ nya nza nya mɛa ŋkɛ laka bela kwa zeme ne, ŋa ka dzeghe Shala nyi kemene slene mbe ghɛa Shala ŋkɛ.

⁴⁶Ma cɛ nya nza mɛa ŋkɛ laka bela kwa gwela ne, ŋa ka dzeghe Shala nyi kemene slene ta reghwetɛ ŋkɛ. Deke ŋwalea Sadok hwa hwelefefia Lɛvi ka nza kahendave nda geva ke Mahwətə kezha dzeghe nda melɛ.»

⁴⁷Dzeghakwe wəndə shɛ dzeghete ŋwela nya ki ki, kanya kwetɛŋe yɛ biya ta ŋkɛ le bezlea ŋkɛ, kadzeghe gwəmsə. Kwa kema ta ghɛa Shala veyi geva reghwetɛ.

⁴⁸Pa wəndə shɛ keleghe ɗa kadzembe cɛ nya kwa ŋkwa kedzeki, dzeghakwe ŋkɛ dzeghete ɓəsəɓəa yɛ dewe kadzeghe mcɛfe ba'a ŋkwa kadzeki kadzeghe meŋe wəfaɗeghəmbe. Kadzeghe mahekene ɓəsəɓəa dewe nya laka yayata bela.

⁴⁹Ma biya ta cɛ shɛ ne, dzeghe bakemsə, dzeghe meŋe bakeghəmbe bezlea ŋkɛ. Ma kezha ntsehe mɛa mɛa ŋkɛ ne, taŋa meŋe yadzeme wəndə. Ma laka yayata bela ta ŋkwa kedzeki ne, kwetɛŋe teke kwetɛŋe teke selə.