Read kapsiki Ɛzɛkiyɛl 41 Bible Online

Ɛzɛkiyɛl 41 - kapsiki bible

Ɛzɛkiyɛl 41

¹Ma kwetere wəmbəa ŋkɛ ne, pa wəndəa shɛ keleghe ɗa kadzembe cɛ nya wəba mbe ghɛa Shala. Ntəŋə ŋkɛ kadzeghe ŋkwa nya mbe: dzeghe ŋkwaŋe bezlea ŋkɛ laka kwete bela, dzeghe ŋkwaŋe bezlea ŋkɛ laka kwete ɓiyitsa.

²Ma bezlea ŋkwa kedzeki ne, dzeghe meŋe. Ma ɓəsəɓəa dewe nyi dzeme vare yayata bela ta ŋkɛ ne, dzeghe mcɛfe. Ma cɛ nya wəba shɛ ne, dzeghe wəfaɗemsə biya ta ŋkɛ ba'a dzeghe bakemsə bezlea ŋkɛ.

³Kwa sebe ta ŋkɛ ne, shilimə wəndəa shɛ kwa via cɛa shɛ. Zhibədikə ŋkɛ kadzeghe ŋkwa kedzeki: dzeghe bake dzeki ghɛ ta ŋkɛ, dzeghe ŋkwaŋe bezlea ŋkɛ ba'a dzeghe mberefaŋe ɓəsəɓəa dewe ta ŋkɛ.

⁴Zhibədikə ŋkɛ kadzeghe cɛa shɛ: dzeghe bakemsə biya ta ŋkɛ ba'a dzeghe bakemsə bezlea ŋkɛ. Ma ke sha 'ya: «Nya ya kaŋkwa nya keveyi geva tekeleke tsape.»

⁵Dzeghakwe wəndə shɛ dzeghete ɓəsəɓəa dewe nya mbe cɛ mbe cɛ va ghɛa Shala kadzeghe ŋkwaŋe. Dzasle ŋeyite kweci cɛ mbeli dzeyi yite: kadzeghe wəfaɗe dzeghe bezlea nci.

⁶Ma cɛ nyi dzeyi yite nyi ne, mahekene ncikə ta nci kadzeme yitea ghweme. Ma yayata bela ta cɛ nyi dzeyi yitea shɛ ne, mahekenemsə kweci cɛ mbe. Ma yayata cɛ nyi mbe nyi ne, kwele ma vare dewe nya pelɛke pelɛke te ŋwela ndeɓeyi geva hɛ, kaɗema kejikə le dewe ta ghɛa Shala.

⁷Kala ncikə ta cɛ mbake geva wəba ta cɛa shɛhɛ kadzeme dzemedze, va nya mentɛawe geva ɓəsəɓəa dewe kala ncikə ta cɛ, dzasle ghɛa Shala kwa. Vatse nza ŋkɛ, ma kadzeme cɛ nya te ghə wəndə ne, kamtsehe geva beŋwea ŋkwa nya mbe cɛa shɛ. Slə te cɛ nya kwa zeweve ne, tarame dzeme nya pelɛghə wəndə dzeme kwa nya mbe tepe.

⁸Ma dzeyi yitea ghɛa Shala ne, pa 'ya nakɛ kweci cɛa nyi bebiya ma kadzeyitea ghweme ke kweci. Kadzeghe ŋkwaŋe kelehwe biya hɛ va kweci.

⁹Ma ɓəsəɓəa dewe nya pelɛke pelɛke va cɛ nyi dzeyi yitea shɛhɛ ne, dzeghe mcɛfe. Ama ŋkwa nya tenakɛ mbeli ɓawe kwelɛ yɛ cɛ nyi dzeyi yitea ghɛa Shala

¹⁰le kweci cɛ nyighɛ ne, dzeghe bakemsə bezlea ŋkɛ dzeyi yitea ghɛa Shala.

¹¹Kadzete ŋkwa nya ɓawea shɛ pele geva gelembe nyi bake te cɛ nyi dzeyi yitea shɛhɛ: kwetɛŋe laka bela kwa gwela, kwetɛŋe ɓiyitsa laka bela kwa zeme. Ma deɓedea dewe nya dzeyi yitea ŋkwa nya ɓawe shɛ ne, dzeghe mcɛfe.

¹²Ma cɛ nya laka ŋkwa kepəkwə ta veci va ghɛa Shala, kwa kema ta ŋkwa nya ɓawe nya ne, dzeghe meslimsə biya ta ŋkɛ, dzeghe mberefaŋemsə bezlea ŋkɛ ba'a dzeghe mcɛfe deɓedea dewe ta ŋkɛ.

¹³Ntake wəndəa shɛ kadzeghe wəba ta ghɛa Shala: dzeghe gwəmsə biya ta ŋkɛ. Ma ŋkwa nya ɓawe dzeyi yite, cɛ nya laka ŋkwa kepəkwə ta veci ba'a yɛ dewe ta ŋkɛ ne, dzeghe gwəmsə biya ta nci.

¹⁴Ma bela ta ghɛa Shala nya laka ŋkwa kesame ta veci ba'a ŋkwa nya ɓawe laka yayata bela ne, dzeghe gwəmsə bezlea nci.

¹⁵Dzeghakwe wəndəa shɛ sha biya ta ghɛa Shala laka ŋwela nya kwetere wəmbə ba'a ŋkwa nyi ɓawe ɓawe laka yayata bela kadzeghe gwəmsə. Ma dzeme vare dewe ta ŋkwa kedzeki, ŋa cɛ nya wəba nya ba'a ŋa vi nya ne, sheghwə yaslesleɓeyi mbeli.

¹⁶Tsagha shɛ slesleɓeyi sheghwə mbeli perə te yɛ sheghwəa wəfela ba'a te ŋkwa nyi dzeyi yitea cɛ nyi mahekene nyi mencikə mencikə. Pɛtɛa ŋkwa shɛhɛ kasheghwə, ghala slə nde te hɛɗi hwa'a pelɛagha te wəfela. Ma dzeyi te wəfela shɛhɛ perə ne, sheghwə nyi feɗete mbeli slɛapeslɛa slɛapeslɛa yasleslapeyi mbeli.

¹⁷Ma pelɛke te ŋwela ta ghɛa Shala ba'a mbe cɛ mbe cɛ, ghala slə nde mɛa gelembe nya kwa ŋkwa kedzeki hwa'a kwa vi ne, pɛtɛ ŋkwa nyi dzeme vare yɛ dewe kepesa pesa.

¹⁸Pa ta ka shɛrəbɛŋe ba'a yɛ dzeve ta peha yarafeyi mbeli dzeme vare: zlezlaŋele dzeve ta peha kwelɛ ka shɛrəbɛŋe nyi bake nyighɛ. Kema ya bake kwa yayata shɛrəbɛŋe shɛ:

¹⁹kema ta wəndə ŋelɛ nya kenewe ŋkwa laka kwete dzeve ta peha, kema ta nivɛrə nya kenewe ŋkwa laka kwete. Dzasle ghɛa Shala shɛ kwa wəshia shɛhɛ.

²⁰Ma ghala slə nde te hɛɗi hwa'a pelɛagha te ghəa gelembe ba'a dzeme vare dewe ta cɛ nya wəba nya ne, ka shɛrəbɛŋe ba'a yɛ dzeve ta peha yarerafeyi mbeli.

²¹Ma gelembe nya mɛa cɛ nya wəba nya ne, kanya kwetɛŋe yɛ biya ta sheghwə nyi sawa vare le bezlea ŋkɛ nya te ghəa ŋkɛ. Ma kwa kema ta ŋkwa nya keveyi geva nya tekeleke ne, kwete wəsə ya shɛ kala

²²reghwetɛ sheghwə nya nza dzeme ta ŋkɛ yitea ghweme kadzeghe mahekene ba'a bezlea ŋkɛ kadzeghe bake bezlea ŋkɛ. Ma wəsəa shɛ ne, kasheghwə megwekwe nyi te, shihəa ŋkɛ ba'a yɛ bela ta ŋkɛ. Ma ke wəndəa shɛ sha 'ya: «Nya ya katabele nya keveyi geva kwa kema ta Mahwətə.»

²³Ma ghɛa Shala ba'a ŋkwa nya keveyi geva tekeleke ne, bake mɛa nya, bake mɛa nya gelembe mɛa hɛ.

²⁴Ma gelembea shɛhɛ ne, bake bela keŋzle te yayata ŋkɛ.

²⁵Ma te gelembe nyi mɛa cɛ nya wəba nya ne, ka shɛrəbɛŋe ba'a yɛ dzeve ta peha yarerafeyi mbeli kala nyi dzeme vare dewe. Ma pelɛke pelɛke ne, sheghwə kwa feɗe feɗe yazlaŋele te ghəa ŋkwa kedzeki.

²⁶Ma dzeme vare dewe ta ŋkwa kedzeki ne, wəfela nyi nza lareya mɛ ba'a pa ta yɛ dzeve ta peha ya shɛ.