Read kapsiki Ɛzɛkiyɛl 42 Bible Online

Ɛzɛkiyɛl 42 - kapsiki bible

Ɛzɛkiyɛl 42

¹Ntəŋə wəndəa shɛ le 'ya kashave te ŋwela nya pelɛ pelɛ shave laka bela kwa gwela. Pa ŋkɛ keleghe ɗa kadzembe cɛ nyi mɛa ŋwela ba'a nyi kwa kema ta ghɛa Shala laka bela kwa gwela.

²Ma te bela nya nza nya ŋkwa kedzeki nya laka bela kwa gwela nya ne, dzeghe gwəmsə biya ta cɛa shɛ, mcɛfemsə ŋa bezlea ŋkɛ.

³Ma te kwete bela ne, kwa kema ta ŋkwa nya nza bezlea ŋkɛ kadzeghe bakemsə dzeyi yitea ghɛa Shala ŋkɛ. Ma laka kwete ɓiyitsa ne, mɛa ŋkwa nya kemɗɛ mɗɛ mɛa ŋwela nya pelɛ pelɛ ŋkɛ. Ŋkwa ya shɛ ɓawe ɓawe dzeyi yitea cɛ nyi mahekene nyi mencikə mencikə.

⁴Ma dzeyi mɛa cɛa shɛhɛ, laka ŋwela nya ki ghɛ ki ghɛ ne, kwete hweŋkwa nya nza bezlea ŋkɛ kadzeghe meŋe ba'a biya ta ŋkɛ kadzeghe gwəmsə ya shɛ. Dzembe laka bela kwa gwela dzembe cɛa shɛhɛ mbeli.

⁵Ma cɛ nyi pelɛ kwa mahekene ta cɛ nyi mencikə mencikə nyi ne, ɓɛhwɛ ɓɛhwɛ ma ŋkwa nya mbe hɛ ke nyi mbe cɛ nyi kwake kwake, kwa nza ŋkɛ ne, bahetsaŋe ma ŋahwe ŋkwa hweŋkwa nya dzeyi yite ke nyi kwake kwake.

⁶Kacɛ mahekene cɛ nyighɛ mencikə mencikə kaɗema selə yitea hɛ kala nya nza ŋkɛ yitea kweci cɛ nyi dzeyi te ŋwela shɛ. Ma kadzeme cɛ nyi pelɛghə wəndə ne, kamtɛawe geva cɛa shɛhɛ.

⁷Ma zli nya dzeyi yitea cɛa shɛhɛ pelɛke pelɛke te ŋwela ne, dzeghe mcɛfemsə biya ta ŋkɛ,

⁸va nya nza biya ta cɛ nyi mɛa ŋwela nyi pelɛ pelɛ nya kadzeghe mcɛfemsə. Ama cɛ nyi nza nyi mɛa nci laka ghɛa Shala ne, dzeghe gwəmsə biya ta nci.

⁹Mbeyitere hwəa cɛa shɛhɛ, laka ŋkwa kesame ta veci ne, ŋkwa kedzeki ya shɛ kaŋa mbeli nyi kesəaki pelɛ pelɛ.

¹⁰Ma ŋkwa kedzekia shɛ ne, te ŋkwa nya gha geva zli nya yitea ŋwela ŋkɛ. Ma laka bela kwa zeme, kweci cɛ ya shɛ kwa kema ta ŋkwa nya ɓawe ba'a cɛ nyi kwetere wəmbəa ghɛa Shala.

¹¹Dzeyi mɛa cɛa shɛhɛ ne, kwete hweŋkwa ya shɛ. Yipə yipə cɛa shɛhɛ le nyi laka bela kwa gwela nyi: wəba ta nci, nza ta nci, ŋkwa kedzeki ta nci ba'a ŋkwa keshave ta nci.

¹²Ma gelembe nyi mɛa cɛ nyi laka bela kwa zeme ne, yipə yipə hɛ le ŋa nyi laka bela kwa gwela. Ma te ŋkwa nya gha geva ŋkwa nya ɓawe ne, ŋkwa kedzeki ya shɛ kwa kema kwa kema le dewe nya keya ŋkwa nya keveyi geva tekeleke. Dzeki laka ŋkwa kesame ta veci dzeki mbeli.

¹³Ma ke wəndəa shɛ sha 'ya: «Ma cɛ nyi laka bela kwa gwela ba'a nyi laka bela kwa zeme nyi ne, ghenci ya kacɛ nyi keveyi geva tekeleke. Kwa nza ŋkɛ ne, mbe cɛ shɛhɛ zeme wəshi nyi keveyi geva tekeleke ka dzeghe Shala nyi kehende nda geva ke Mahwətə. Mbe cɛa shɛhɛ bete wəshi nyi keveyi geva tekeleke hɛ: wəshi gəmə ba'a wəshi keseɗa kedzeghe melɛ keyaɓe jaɗafa ba'a kedimə ghə, va nya nza ŋkwa shɛ kaŋkwa nya keveyi geva tekeleke.

¹⁴Ma nahe kedzembe ŋkwa nya keveyi geva tekelekea shɛ ka dzeghe Shala ne, kashavenji hɛ kata kata pelɛ te ŋwela we. Ama pa hɛ seɗeyi lekwesa slene ta nci mbe cɛa shɛhɛ, va nya nza lekwesa shɛhɛ kalekwesa nyi keveyi geva tekeleke. Seɗakwe hɛ sha kweci lekwesa nda tejive hɛ hwa mbeli.»

¹⁵Ma kwa nahemte dzeghe ŋkwa nyi mbe cɛ mbe cɛ wəndəa shɛ va ghɛa Shala ne, pa kelakave ɗa shave te gelembe nya laka ŋkwa kesame ta veci. Zhibədikə ŋkɛ kadzeghe ŋkwa nya dzeyi yitea ghɛa Shala.

¹⁶Ntəŋə ŋkɛ kadzeghe ŋkwa nya laka ŋkwa kesame ta veci le cafecɛge kedzeghe wəsə: kadzeghe gwəmsə mcɛfe dzeghete biya ta ŋkɛ ŋkɛ le cafecɛge.

¹⁷Pa ŋkɛ dzeghete nya laka bela kwa gwela kadzeghe gwəmsə mcɛfe le cafecɛge kedzeghe wəsə.

¹⁸Zhɛne ne, dzeghakwe ŋkɛ dzeghete nya laka bela kwa gwela kadzeghe gwəmsə mcɛfe le cafecɛge kedzeghe wəsə.

¹⁹Pa ŋkɛ keɗaŋete le bela ŋkwa kepəkwə ta veci kadzeghe gwəmsə mcɛfe le cafecɛge kedzeghe wəsə.

²⁰Tsetse dzeghemte ŋkwa nya pelɛ pelɛ ŋkɛ yitea ghɛa Shala te bela nyi wəfaɗe nyi. Yipə yipə yɛ biya ta zlia shɛ le bezlea ŋkɛ. Ma zli shɛ ne, gheŋkɛ nde nehemte ŋkwa nya keveyi geva tekeleke le nya gəmə gəmə.