Read kapsiki Ɛzɛkiyɛl 43 Bible Online

Ɛzɛkiyɛl 43 - kapsiki bible

Ɛzɛkiyɛl 43

¹Ntəŋə wəndəa shɛ le 'ya kadzemɛa ŋkwa kedzeki nya laka ŋkwa kesame ta veci.

²Ma newe 'ya ne, kashave zləvəa Shala ta ka Israyɛl shave laka ŋkwa kesame ta veci, kala gaka ta kwamewədzərəa ghwa gaka ŋkɛ. Waŋe zhɛrenyɛ ŋkwa nya te hɛɗi va zləvəa ŋkɛ shɛ.

³Ma wəsə nya nakɛa shɛ 'ya ne, yipə yipə ŋkɛ le nyi nakɛ nyi 'ya vəa ŋkwa nya se nya Shala kaza sebe te Zhɛrəzalɛm ba'a vəa ŋkwa nya nza 'ya mɛa hələa Kɛbar. Tagha ne, ntiŋə 'ya ŋame ghə mbe hɛɗi.

⁴Shilimə zləvəa Mahwətəa shɛ dzekinyɛ mbe ghɛa Shala dzeki te ŋkwa kedzeki nya laka ŋkwa kesame ta veci.

⁵Tseɗake Sefəa Shala kelakate ɗa sate te hɛɗi, ntəŋə ŋkɛ keleghe ɗa kadzeki te ŋwela nya ki ghɛ ki ghɛ. Newe 'ya ne, mpɛafe zləvəa Mahwətə kempɛafekɛ ghɛa Shala.

⁶Kafefa 'ya nda geze ɗa ghena kwete wəndə shave mbe ghɛa Shala, vəa ŋkwa nya nza wəndə nya kebegheke ɗa meslete dzeme vare 'ya.

⁷Ma ke sha 'ya: «Wəndə ŋelɛ, nya ya kaŋkwa pasla ta ɗa, kaŋkwa keve seɗa ta ɗa. Teke tenza 'ya hwa ka Israyɛl kaghala ghala. Katezhɛne ka Israyɛl ba'a ka meghea kɛfia nci kakele zləvə seyi te sləa ɗa nya keveyi geva nya tekeleke laka mene mefətekwəa nci ba'a laka la ka meghea kɛfia nci nyi kempənji teke we.

⁸Nahe ka meghea kɛfi keveyi mɛa cɛa nci ba'a yɛ seɗa ta gelembe nyi mɛa ghɛa nci terasle yitea mɛa ghɛa ɗa ba'a yitea seɗa ta gelembe nyi mɛ. Deke zli ya kwelɛ 'ya le hɛ. Nahe hɛ kezhɛrete sləa ɗa nya keveyi geva tekeleke wale wale laka mene wəshi nyi ndiremi ndiremi kashasha. Vatse zamte sebe 'ya te hɛ le wənə le wənə.

⁹Ma tsetsenya ne, katehende mefətekwəa nci ka Israyɛl cakeɗake le 'ya, tsagha geva ta ka meghea kɛfia nci nyi kempənji. Ma tsagha ne, te tepe ta nci tenza 'ya kaghala ghala.

¹⁰Ma gha le ŋa ŋa gɛ wəndə ŋelɛ, ɓelate nda ghena ta ghɛa ɗa nya ke ka Israyɛl. Zhɛ nda hawe ke hɛ va fete ta nci ba'a ɗepete nza ta ghɛa shɛ hɛ megela.

¹¹Ma kezhɛte nda hawe kaganda kaganda ke hɛ va slene ta nci ne, ncɛte nda nza ta ghɛa shɛ ke hɛ: nza ta ŋkɛ, yɛ ŋkwa nyi kedzembe ba'a yɛ ŋkwa keshave, pɛtɛa nza ta pa ta ŋkɛ. Rafete nda wəshi mahalegə ba'a wəshi nyi hi hɛ kahawe ve mbe cɛa shɛ ke hɛ, veyi hɛ kwa kema ta nci. Ma tsagha ne, katehawe hɛ va hɛ ba'a katemene slene le hɛ.

¹²Wa nya wəsə mahalegə nya wəba nya kaŋa ghɛa Shala: ma yayata ŋkwa nya dzeyi yitea ghɛa shɛ pelɛ ghəa ghweme ne, kaŋkwa nya keveyi geva tekeleke tenza ŋkɛ.»

¹³Wa nya wəba ta reghwetɛ nya. Ma dzeghe nyi teke ne, bebiya ma hɛ ɓɛhwɛ ɓɛhwɛ, kwa nza ŋkɛ kaslə yitea fegwele hwa'a mɛa ŋwalea dzeve ba'a kwete yite gare bezlea hwə dzeve. Dzasle ki nya nza lɛamea ŋkɛ kadzeghe kwetɛŋe ba'a bezlea ŋkɛ kadzeghe kwetɛŋe dzeyi yitea reghwetɛa shɛ. Ma ŋkwa nya dzeyi mɛa kia shɛ ne, kakwa bake ta bela ta dzeghe ŋkɛ kadzeme ghweme. Wa nya dzeme ghweme ta reghwetɛa shɛ nya:

¹⁴kadzeghe bake dzeme ghweme ta ŋkɛ ghala slə nde te hɛɗi hwa'a te kwa ghate ta ŋkwa keve nya kwake kwake. Ma yayata bela nya pelɛghə va ŋkwa kevea shɛ ne, mentɛawe ma ŋkɛ kadzeghe kwetɛŋe ke nya kwake kwake te hɛɗi. Ma kənəa kwa ghate ta ŋkwa keve nyagha ne, kwa bake nya nza dzeme ghweme ta ŋkɛ kadzeghe wəfaɗe ya shɛ. Ma yayata bela ta kwa bake ta ŋkwa keve nya ne, mentɛawe ma ŋkɛ kadzeghe kwetɛŋe ke kwa ghate.

¹⁵Ma reghwetɛ nya nza keseɗe ghwə pelɛ ne, dzeghe wəfaɗe dzeme ghweme ta ŋkɛ ba'a tereme wəfaɗe ya te yɛ sleme ta ŋkɛ.

¹⁶Ma keseɗe ghwə ne, dzeghe meŋe bakeghəmbe biya ta ŋkɛ, tsagha bezlea ŋkɛ, yipə yipə bela ta ŋkɛ nyi wəfaɗe.

¹⁷Ma kwa bake ta ŋkwa kentare ŋkɛ ne, yipə yipə yɛ biya ta ŋkɛ le bezlea ŋkɛ: kadzeghe meŋe wəfaɗeghəmbe te yayata bela. Ma ŋkwa nya dzeyi mɛ ne, dzegharake menete mbeli gare kwa bake ta bela ta dzeghe. Hweɗakwe mbeli hweɗakweyite ŋkwa dzeyi yite kadzeghe kwetɛŋe. Kezha ntsehe yitea zeweve ta reghwetɛa shɛ ne, taŋa nyi laka bela kesame ta veci yadzeme mbeli.

¹⁸Ma ke wəndəa shɛ sha 'ya: «Wəndə ŋelɛ, wa nya ghena nya geze Shala Mahwətə nya: Wa nyi wəshi nyi temene mbeli vəa ŋkwa nya tepate geva reghwetɛ kezha dzeghe melɛ kwa tere tere ba'a kezha yisə mimia wəshi keseɗa nyi:

¹⁹Kateve nda mca na ke ka dzeghe Shala nyi kahwelefefia Lɛvi, kwa yita ta Sadok. Deke ghenci ka hende ɗa geva kezha mene ɗa slene, 'ya Shala Mahwətə nde gezete. Katedzeghe melɛ mbeli le mca shɛ kezha yaɓe jaɗafa.

²⁰Katekele mimia ŋkɛ na ba'a katefi na dzeyi te tereme nyi wəfaɗe te reghwetɛ, dzeyi te megwekwe nyi wəfaɗe te kwa bake ta ŋkwa kentare reghwetɛ ba'a dzeyi te ŋkwa nya dzəgwəɗəmə nya dzasle mɛa mɛa ŋkɛ. Ma tsagha ne, kateyaɓe reghwetɛ na wɛŋe ba'a kateve ŋkɛ na tekeleke.

²¹Kwa sebe ta ŋkɛ ne, katekele mca nya dzeghekɛ melɛ nya mbeli le, te ŋa ŋkɛ ŋkwa tekeleke tere mbeli mbe ghɛa Shala, kaɗema mbe ŋkwa nya keveyi geva tekeleke.

²²Ma te kwa bake ta hɛ ne, katekele zhɛfa nya ɗema beze te na. Katedzeghe melɛ na le kezha yaɓe jaɗafa perə. Kateyaɓe reghwetɛ na kala nya menete na le mca.

²³Ma nahe kekiɗimte dzeghe melɛ na ne, katekese mca nya ɗema fete te ba'a game nya ɗema fete te na.

²⁴Katefə hɛ na kase kadzawa kema ta ɗa, 'ya Mahwətə. Kateŋkisə ghwene ka dzeghe Shala kənəa hɛ ba'a katedzeghe ɗa melɛ kwa tere tere hɛ le hɛ.

²⁵Kahɛ mberefaŋe ne, keveci keveci tedzeghe melɛ na le zhɛfa kezha yaɓe jaɗafa. Kwa sebe ta ŋkɛ, katedzeghe melɛ mbeli le mca nya ɗema fete te ba'a game nya ɗema fete te.

²⁶Ma kahɛ mberefaŋe tsagha gɛ ne, kateyaɓe reghwetɛ mbeli wɛŋe ba'a kateve ŋkɛ mbeli tekeleke kezha slene.

²⁷Ma nahe kekiɗinji hɛ nyi, se te kwa deghese ta hɛ kajive mbe kema ne, wərə ka dzeghe Shala kadzeghe melɛ kwa tere tere ba'a melɛ kejikə ghə te reghwetɛa shɛ. Ma tsagha gɛ, ganyɛke tenza 'ya laka gheyɛ. 'Ya Shala Mahwətə nde gezete.»