Read kapsiki Ɛzɛkiyɛl 44 Bible Online

Ɛzɛkiyɛl 44 - kapsiki bible

Ɛzɛkiyɛl 44

¹Pa wəndəa shɛ kelakave ɗa mɛa ŋkwa kedzeki nya pelɛ pelɛ, nya laka ŋkwa kesame ta veci yitea ŋkwa nya keveyi geva tekeleke. Keŋzle ŋzle gelembea shɛ.

²Ma ke Mahwətə sha 'ya: «Keŋzle ŋzle tenza gelembe nya, katepele mbeli tɛape we. Wəndə shɛ katedzeki kwa we, va nya nza ŋkɛ dzeki kwa dzeki ɗa 'ya, 'ya Shala Mahwətə ta ka Israyɛl. Nda keŋzle ŋzle tenza ŋkɛ.

³Ama wərə wəndə nya te ghə kantishɛnyɛ mɛ kezha zeme wəsə kezeme kwa kema ta Mahwətə, va nya nza ŋkɛ kande sleke mbeli. Dzeki kwa cɛ nya kwa mɛ ŋkwa kedzeki dzeki ŋkɛ, shave kwa hweŋkwa shɛnyɛ shave ŋkɛ.»

⁴Kwetere wəmbəa ŋkɛ, shilimə wəndəa shɛ le 'ya dzeki kwa mɛ ŋkwa nya laka bela kwa gwela va ghɛa Shala. Ma newe 'ya ne, kaɓele zləvəa Mahwətə, rayɛ ŋkwa nya mbe ghɛa Mahwətə ve. Ntiŋə 'ya sha kema mbe hɛɗi.

⁵Ma ke Mahwətə sha 'ya: «Wəndə ŋelɛ, keseve mehele. Ghwenemte ntsə ta ŋa ba'a sleme ta ŋa megela. Fa pɛtɛa wəshi nyi tegeze ŋa nyi 'ya te ghəa wəshi mahalegə ba'a wəshi nyi kehi te ghəa ghɛa ɗa. Veyite sleme megela yitea ŋa yɛ dzembe le shave mbe ŋkwa nya keveyi geva tekeleke.

⁶Ma pa na sha ka Israyɛl nyi kaka fama ghena: Wa nya ghena nya geze Shala Mahwətə nya: wərə ŋa ɗa le wəshi nyi ndiremi ndiremi kashasha nyi mene nyi yɛ, gheyɛ ka Israyɛl.

⁷Vəa ŋkwa nya ve ɗa ŋa ɗa yɛ wəsə kezeme, merege ba'a mimia wəshi keseɗa ne, ŋkeɗe yɛ fəghe kweci hwelefefi nyi keslamtema mɓɛta ba'a nyi kehawema va 'ya kadzembe ŋkwa nya keveyi ɗa geva tekeleke. Ma tsagha ne, nahe yɛ kezhɛrete ghɛa ɗa wale wale. Ma le slene ta ŋayɛ nyi ndiremi ndiremi kashasha ne, nahe yɛ kenehemte jikə geva nya kwelɛ gheyɛ le 'ya.

⁸Kese yɛ kamene ɗa slene le ghəa ŋayɛ mbe ŋkwa nya keveyi geva tekeleke we, ama kweci hwelefefi yapeleyi yɛ te ŋkwa ŋayɛ.

⁹Wa nya ghena nya geze Shala Mahwətə nya: Kwete hwelefe nya keslamtema mɓɛta ba'a nya keɗema kahawe va 'ya kadɛape seɗa mbe ŋkwa nya keveyi geva tekeleke, ya gheŋkɛ nza hwa ka Israyɛl we.»

¹⁰Ama kaŋa ka Lɛvi nyi lənji nyi cakeɗake le 'ya vəa ŋkwa nya zhɛrave ɗa wəmbə ka Israyɛl, kezha hawe va wəshi nyi zhɛrete mbeli kashala ne, kwa ghəa nci tenza ɗaŋeɗa ta fete ta nci.

¹¹Mbe ŋkwa ɗa nya keveyi geva tekeleke tenza hɛ, kaka ya gelembe nyi te ghɛa Shala ba'a kaka mene kweci slene nyi ki. Ghenci ka tehene wəshi keseɗa kedzeghe melɛ kwa tere tere ba'a kweci melɛ. Ghenci ka temene nda slene ke mbeli.

¹²Ama va nya se hɛ kala ka nehe mpa kwelɛ ghen'yɛ le wəshi nyi zhɛrete mbeli kashala, va nya kesame ka Israyɛl hɛ le ghəa nci mbe jaɗafa ne, wa nya ghena nya geze 'ya, 'ya Shala Mahwətə nya: 'Ya kateme te hɛ, ghenci ka tezereghe ɗaŋeɗa ta fete ta nci.

¹³Kazhɛne hɛ kahende ɗa geva yitea nza kaka dzeghe ɗa melɛ we. Kazhɛne hɛ kahende nda geva ke wəshi nyi keveyi ɗa geva tekeleke keɗema ke ŋkwa nya keveyi ɗa geva tekeleke we. Ma tsagha gɛ, katenza ɗaŋeɗa ta wəshi hawe ba'a wəshi nyi ndiremi ndiremi kashasha nyi menete hɛ kwa ghəa nci.

¹⁴Deke slene nyi ɓɛhwɛ ɓɛhwɛ yateve nda 'ya ke hɛ ki ghɛa ɗa. Slene nyi ketemene geva dzeyi ki yatemene hɛ.

¹⁵Ama ka dzeghe Shala nyi kaka Lɛvi, nyi kesawa mbe Sadok nyi kese kamene slene mbe ŋkwa nya keveyi ɗa geva tekeleke, vəa ŋkwa nya wəfəyite ɗa ka Israyɛl ne, ghenci ka hende ɗa geva kezha mene ɗa slene, ghenci ka tedzawa kema ta ɗa kezha dzeghe ɗa melɛ le merege ba'a mimia wəshi keseɗa. 'Ya Shala Mahwətə nde gezete.

¹⁶Deke ghenci ka tedzembe ŋkwa nya keveyi ɗa geva tekeleke, ghenci ka tehende nda geva ke tabele nya keveyi geva tekeleke kezha slene ta ɗa. Katemene slene hɛ megela le wəshi nyi gezete nyi 'ya te ghəa slenea shɛ.

¹⁷Ma nda tezlake gelembe nyi mɛa ŋwela nya ki ghɛ ki ghɛ hɛ ne, seɗakwe hɛ seɗete lekwesa nya tsate mbeli le pawa. Mba hɛ keseɗe lekwesa nyi tsate mbeli le shintia təmə vəa ŋkwa nya mene slene hɛ te ŋwela nya ki ghɛ ki ghɛ ba'a mbe ghɛa Shala.

¹⁸Katepeɗe ghə hɛ le zlave pawa ba'a katehwepe patalɛ pawa hɛ yitea yitəa nci. Katenza hətə hwa hwə va hɛ kezha ɗema nde kaheka nda hwələ ke hɛ we.

¹⁹Ma nda teshave hɛ pelɛke te ŋwela hwa mbeli ne, kateseɗemte lekwesa slene ta nci hɛ, katebete hɛ hɛ mbe cɛ nyi mbe ŋkwa nya keveyi geva tekeleke, kateseɗe kweci lekwesa hɛ. Ma tsagha ne, katepele nda hweŋkwa hɛ ke mbeli kakwaɗe lekwesa slene ta nci we.

²⁰Kateŋsə shinti ka dzeghe Shala dɛrɛŋe rɛŋe kwa ghə we, katesərə shinti hɛ təɗəmə kwa ghə ɓiyitsa we, ama le mehele tetsehe shintia shɛhɛ hɛ.

²¹Kwete hwa hɛ shɛ katesa tɛ nda teŋkeɗe seɗa ŋkɛ te ŋwela nya ki ghɛ ki ghɛ we.

²²Yagha nde dzeghe Shala tewəme male wede keɗema male nya ŋkamte za nta. Wəzha ta nde Israyɛl ghɛmɛ yawəme ŋkɛ, keɗema ne, male wede ta kwete nde dzeghe Shala.

²³Kateteke nda nehe nya kwelɛ yɛ wəsə nya keveyi geva tekeleke le nya keɗema keveyi geva tekeleke, wəsə nya wɛŋe le nya wale wale ka dzeghe Shala ke mbelia ɗa.

²⁴Ma kenza ghena kwelɛ mbeli ne, ghenci ka tenza kaka meha ghwə, kala nya geze wəshi mahalegəa ɗa tenegha fete hɛ. Katehawe nda hawe hɛ ke wəshi nyi kehi ba'a ke ghena nyi gezete 'ya vəa ŋkwa nyi mene gəsəkə nyi jama jama hɛ. Kateve ɗa veci kezhɛne mpi hɛ tekeleke.

²⁵Yagha nde dzeghe Shala tekwaɗe geva ta wəndə kemte mte, va nya nza ŋkɛ, wale wale tezhɛre ŋkɛ. Nda nde kanza kayitenyɛ, kameghekɛ, kawəzege teza ta ŋkɛ, kawəzha ta ŋkɛ, kawəza yitenyɛ ba'a kawəzha ta meghekɛ nya kadegheli.

²⁶Ma nahe kepɛmte ghəa ŋkɛ ŋkɛ wɛŋe ne, pa ŋkɛ menete hɛ mberefaŋe nda tezhɛne ŋkɛ kamene slene.

²⁷Ma veci ŋkwa nya teŋkeɗe seɗa ŋkɛ te ŋwela nya ki ghɛ ki ghɛ va ŋkwa nya keveyi geva tekeleke ne, katedzeghe melɛ ŋkɛ kezha yaɓe jaɗafa ta ŋkɛ. 'Ya Shala Mahwətə nde gezete.

²⁸Wa nya ŋa nci wəve nya teŋ'we hɛ nya: 'ya ya kawəvea nci. Kateve nda wəve mbeli ke hɛ te hɛɗia Israyɛl we, kwa nza ŋkɛ ne, 'ya ya kaŋa nci wəve.

²⁹Wəshi nyi fəke ɗa mbeli ba'a wəshi keseɗa nyi dzeghekɛ melɛ mbeli le hɛ kezha yaɓe jaɗafa yatezeme hɛ. Ma yayata wəsə nya keveyi ɗa geva tekeleke te hɛɗia Israyɛl ne, kaŋa nci tenza nde.

³⁰Ma wəshi nyi keghate kanehe te wəve ba'a yayata wəsə nya keveyi geva kaŋa ɗa hwa wəshi nyi ŋ'weve ka Israyɛl ne, kaŋa nci tenza hɛ. Kateve nda hə ganyɛ ka Israyɛl ke hɛ kezha wəpi ghɛa nci 'ya.

³¹Ama hweŋkwa va ka dzeghe Shala kazeme wəsə nya kemtenyɛ keɗema nya peslekɛ wəshi keseɗa nyi hwa gamba, ya gheŋkɛ nza ka'yɛ keɗema kawəsə keseɗa we.