Read kapsiki Ɛzɛkiyɛl 48 Bible Online

Ɛzɛkiyɛl 48 - kapsiki bible

Ɛzɛkiyɛl 48

¹Wa nyi sləa hwelefefi nyi kehɛɗi kehɛɗia nci. Ma Dan ne, kwa keɗaŋe ta hɛɗi nya laka bela kwa gwela yatekemave ŋkɛ, se mɛa hweŋkwa nya kedzate mbe Hɛtlon, Lebo-Hamat le Hasar-Ɛnan nya dekwede yitea hɛɗia Damas ba'a Hamat. Ghala teslə nde kwa ghala nya laka ŋkwa kesame ta veci ne, hwa'a mɛa ndərəa Mɛditɛranɛ nya laka ŋkwa kepəkwə ta veci tezhigə nde.

²Ma mɛa ŋa Dan nya keslə pelɛ ŋkwa kesame ta veci hwa'a mɛa ndərə ne, ŋa Asɛr nde tenza.

³Ma mɛa ŋa Asɛr nya keslə mɛa ghala nya laka ŋkwa kesame ta veci hwa'a mɛa ndərə ne, ŋa Nɛftali.

⁴Ma mɛa ŋa Nɛftali nya keslə kwa ghala nya laka ŋkwa kesame ta veci hwa'a mɛa ndərə ne, ŋa Manasɛ nde ndeɓame geva.

⁵Ma mɛa ŋa Manasɛ, ghala slə nde kwa ghala nya laka ŋkwa kesame ta veci hwa'a mɛa ndərə ne, ŋa Ɛfrayim.

⁶Vare ŋa Ɛfrayim, ghala slə nde kwa ghala nya laka ŋkwa kesame ta veci hwa'a mɛa ndərə ne, ŋa Rəbɛn nde tendeɓe geva.

⁷Kakwa keɗaŋe, mɛa ŋa Rəbɛn nya keslə kwa ghala laka ŋkwa kesame ta veci hwa'a mɛa ndərə ne, ŋa Zhəwda nde teve geva.

⁸Ma mɛa ŋa Zhəwda, ghala slə nde kwa ghala nya laka ŋkwa kesame ta veci hwa'a mɛa ndərəa Mɛditɛranɛ ne, kateŋa kwete bela ta hɛɗi mbeli. Kala biya ta ŋa yayata hwelefe tenza biya ta ŋkɛ. Ma bezlea ŋkɛ ne, kadzeghe 25.000 tenza nde. Te tepe ta ŋkɛ tenza ŋkwa nya keveyi geva tekeleke.

⁹Ma hɛɗi nya teŋa nda yɛ ke Mahwətə te bela ta hɛɗia shɛ ne, kadzeghe 25.000 tenza biya ta ŋkɛ ba'a dzeghe 20.000 tenza bezlea ŋkɛ.

¹⁰Kaŋa ka dzeghe Shala tenza bela nya keveyi geva nya tekeleke: kadzeghe 25.000 tenza biya ta ŋkɛ dzeme laka bela kwa gwela, dzeghe 10.000 bezlea ŋkɛ jive laka ŋkwa kepəkwə ta veci, dzeghe 10.000 bezlea ŋkɛ laka ŋkwa kesame ta veci, dzeghe 25.000 biya ta ŋkɛ dzawa laka bela kwa zeme. Te tepe ta ŋkɛ tenza ŋkwa nya keveyi geva tekeleke kaŋa Mahwətə.

¹¹Ma hɛɗia shɛ ne, kaŋa ka dzeghe Shala nyi keveyi geva tekeleke, nyi kahwelefefia Sadok tenza nde. Nahe hɛ kemenete slene tiɗiɗi vəa ŋkwa nya wəfəyite ɗa ka Israyɛl, kese hɛ kazhɛre ɗa wəmbə kala ka Lɛvi we.

¹²Vatse tekemave bela ta hɛɗi nya keveyi geva tekeleke hɛ. Vare ŋa ka Lɛvi tenza hɛɗia shɛ.

¹³Ma ŋa ka Lɛvi bela ta hɛɗi ne, yipə yipə tenza nde le ŋa ka dzeghe Shala. Hɛɗia shɛhɛ bake nci ne, kanya kwetɛŋe tenza biya ta nci: kadzeghe 25.000. Tsagha bezlea nci: kadzeghe 10.000.

¹⁴Ma te bela ta hɛɗia shɛ ne, kwete shɛ katembeɗete geva we, katepamte nda mbeli ke kwete wəndə we, kateve nda mbeli ke kwete wəndə we, gheŋkɛ yatenza zləvə te te hɛɗia shɛ pɛtɛ, kwa nza ŋkɛ ne, tekeleke veyi geva nde kaŋa Mahwətə.

¹⁵Ma te hɛɗi nya keveyi geva nya tekeleke ne, mba kwete ketene kadzeghe 5.000 bezlea ŋkɛ ba'a kadzeghe 25.000 biya ta ŋkɛ. Kanza nyagha bela kabela nya keveyi geva tekeleke we. Kaŋa meleme, ghɛ nyi mbe ba'a ghedəkwə nyi dzeyi yite tenza nde. Te tepe ta ŋkɛ teŋa meleme mbeli.

¹⁶Kanya kwetɛŋe tenza yɛ biya le bezlea bela ta ŋkɛ nyi wəfaɗe, kadzeghe 4.500.

¹⁷Ma dzeyi yitea bela ta meleme nyi wəfaɗe ne, gəmə tenza kwete ŋkwa nya nza bezlea ŋkɛ kadzeghe gwəmsə bake ba'a mcɛfemsə.

¹⁸Ma mɛa bela nya keveyi geva nya tekeleke kaŋa Mahwətə ne, katetene geva hɛɗi kadzeghe 10.000 laka ŋkwa kesame ta veci, tsagha laka ŋkwa kepəkwə ta ŋkɛ. Wəshi kezeme ta mbeli nyi kemene slene mbe meleme tenza wəshi nyi teɗa mbeli te.

¹⁹Ma mbeli nyi ketewəza hɛɗia shɛ ne, ka mene slene mbe meleme nyi keteshave hwa hwelefefia Israyɛl pɛtɛ.

²⁰Ma pɛtɛa hɛɗi nya keveyi geva nya tekeleke ba'a kaŋa meleme ne, kanya kwetɛŋe tenza yɛ biya ta ŋkɛ le bezlea ŋkɛ: kadzeghe 25.000. Kwetɛŋe mbe nehe ta hɛɗia shɛ wəfaɗe tekele mbeli kaŋa meleme.

²¹Ma hɛɗi nya ketene gɛ ne, kaŋa wəndə nya te ghə tenza nde. Dzeyi vare bela nyi bake nyi va hɛɗi nya keveyi geva tekeleke ba'a kaŋa meleme tenza nde. Kadzeghe 25.000 tenza nde jive laka ŋkwa kesame ta veci hwa'a kwa ghala. Ma laka ŋkwa kepəkwə ta veci ne, hwa'a mɛa ndərəa Mɛditɛranɛ tenza nde. Ma tsagha ne, te tepe ta nci tenza hɛɗi nya keveyi geva tekeleke ba'a ŋkwa nya keveyi geva tekeleke.

²²Ma hɛɗia ka Lɛvi ba'a ŋkwa nya keveyi geva kaŋa meleme ne, kwelɛ tepe ta hɛɗia yɛ Zhəwda nya pelɛagha te ghə le ŋa Bɛnjamɛn nya kwayite kwayite tenza hɛ, te tepe ta ŋa wəndə nya te ghə.

²³Wa nyi hwelefefi nyi ketene nyi le ŋa nci bela ta hɛɗi: «ma ghala slə nde mɛa ghala nya laka ŋkwa kesame ta veci hwa'a mɛa ndərəa Mɛditɛranɛ ne, ŋa Bɛnjamɛn nde tenza.

²⁴Ma mɛa ŋa Bɛnjamɛn, ghala slə nde mɛa ghala nya laka ŋkwa kesame ta veci hwa'a mɛa ndərə ne, ŋa Simɛyon nde tenza.

²⁵Ma mɛa ŋa Simɛyon, ghala slə nde kwa ghala nya laka ŋkwa kesame ta veci hwa'a mɛa ndərə ne, ŋa Isakar.

²⁶Ma mɛa ŋa Isakar, ghala slə nde kwa ghala nya laka ŋkwa kesame ta veci hwa'a mɛa ndərə ne, ŋa Zabəlon.

²⁷Ma mɛa ŋa Zabəlon, ghala slə nde kwa ghala nya laka ŋkwa kesame ta veci hwa'a mɛa ndərə ne, ŋa Gad.

²⁸Ma ghala nya kwayite ta hɛɗia Gad ne, gheŋkɛ nde tenza kaghala ta hɛɗi. Mbe Tamar nya laka ŋkwa kesame ta veci teslə nde hwa'a mɛa ɗaslea Mɛriba nya te hɛɗia Kadɛs. Kwetere wəmbəa ŋkɛ, dzawa kwa hələa Ɛzhipte tedzawa nde hwa'a mɛa ndərəa Mɛditɛranɛ.

²⁹Nya ya kahɛɗi nya tenehe nda yɛ kawəsə kezeme ghɛ le kwasheghediɗi ke hwelefefia Israyɛl. Nyi ya kaŋa nci bela ta hɛɗi. 'Ya Shala Mahwətə nde gezete.»

³⁰Wa nyi ŋkwa kedzeki nyi meŋe bakeghəmbe te Zhɛrəzalɛm nyi. Yayata ŋkwa kedzeki shɛ le sləa hwelefe ta Israyɛl. Ma laka bela kwa gwela ne, kadzeghe 4.500 biya ta zli.

³¹Ma yayata ŋkwa kedzeki nya te melemea shɛ ne, le sləa hwelefe ta Israyɛl teheka mbeli. Ma laka bela kwa gwela ne, ŋkwa kedzeki mahekene ka tenza: ŋkwa kedzeki ta Rəbɛn, ŋa Zhəwda ba'a ŋa Lɛvi.

³²Ma te zli nya laka ŋkwa kesame ta veci nya kadzeghe 4.500 ne, ŋkwa kedzeki mahekene ka tenza: ŋkwa kedzeki ta Zhozɛf, ŋa Bɛnjamɛn ba'a ŋa Dan.

³³Ma te zli nya laka hələa Ɛzhipte nya kadzeghe 4.500 ne, ŋkwa kedzeki mahekene ka tenza: ŋkwa kedzeki ta Simɛyon, ŋa Isakar ba'a ŋa Zabəlon.

³⁴Kakwa keɗaŋe, ma te zli nya laka ŋkwa kepəkwə ta veci nya kadzeghe 4.500 ne, ŋkwa kedzeki mahekene ka tenza: ŋkwa kedzeki ta Gad, ŋa Asɛr ba'a ŋa Nɛftali.

³⁵Ma pɛtɛa biya ta zli nya kentəsləte Zhɛrəzalɛm ne, dzeghe 18.000. Ma se te vecia shɛ ne, “Mahwətə ya teke” teheka melemea shɛ mbeli.