Read kapsiki Ɛzɛkiyɛl 6 Bible Online

Ɛzɛkiyɛl 6 - kapsiki bible

Ɛzɛkiyɛl 6

¹Ma ke Mahwətə sha 'ya:

²«Wəndə ŋelɛ, zhɛrete kema laka ghweme nyi mbe Israyɛl shɛ na gezete nda ghena ta ɗa ke hɛ.

³Ma pa na sha tegeze: Ghweme nyi mbe Israyɛl, fa mə ghena ta Shala Mahwətə. Wa nya ghena nya geze nda Shala Mahwətə ke yɛ ghweme ba'a yɛ wəmbə, ke ŋkwa nyi dzawa vare ghweme ba'a yɛ zlərə nya: Wa nya 'ya nya katekele mpa kase kadzete gheyɛ kezha za sebe te yɛ kələŋəa ŋayɛ.

⁴Kateŋzlamte geva yɛ reghwetɛa ŋayɛ, katempəmte geva yɛ kwenə ketere 'wərdəa ŋayɛ ba'a katempə ŋayɛ 'ya kadzete hɛɗi kwa kema ta wəshi nyi zhɛrete yɛ kashala.

⁵Kabete mbeli nyi kempə mpə ta ka Israyɛl 'ya te kema ta wəshi nyi zhɛrete hɛ kashala ba'a katetaze 'yɛ'yɛa nci 'ya dzeyi yitea reghwetɛa nci.

⁶Kakwəfi tenza yɛ meleme ta ŋayɛ ba'a keŋzla ŋzla tenza yɛ kələŋəa ŋayɛ te ŋkwa nyi nza yɛ. Keŋzla ŋzla tenza yɛ reghwetɛa ŋayɛ nyi keɗema mba kaketekɛ ŋkwa, kempə mpə tenza wəshi nyi zhɛrete yɛ kashala ba'a rayɛ teza sebe te hɛ, tsagha yɛ kwenə ketere 'wərdəa ŋayɛ. Rayɛ tenza sebe te wəshi nyi menete yɛ pɛtɛ.

⁷Kwele kwele tempə mbeli hwa gheyɛ. Ma tsagha ne, kateɗepete yɛ 'ya ya kaMahwətə.

⁸Ya tsagha shɛ ŋkɛ ne, katesərə kweci mbeli nyi ketene yitea kafayɛ 'ya teghweme hwa gheyɛ. Katetaze mbelia shɛhɛ 'ya dzeyi te kweci hɛɗi.

⁹Katezəzə ɗa mbelia ŋayɛ nyi ketene teghweme hwa kweci hwelefefi nyi fəghe geva hɛ, ghenci nyi mpəmte wənə kebeze ghena ta nci nyi kezhɛremte geva vare 'ya ba'a ntsə ta nci nyi kevate geva te kweci shala 'ya. Ma tsagha, kateheɗe kema hɛ va wəshi nyi ndiremi ndiremi kashasha nyi menete hɛ.

¹⁰Ma tsagha gɛ, kaɗepete hɛ 'ya ya kaMahwətə. Kenza gəmə gezete 'ya kave ndiremi nyi kala nyi te hɛ we.»

¹¹Wa nya ghena nya geze Shala Mahwətə nya: «Devələ geva dzate hwa hɛɗi, tsa lewela ba'a ma pa na sha geze: Awema ya shɛ va wəshi nyi ndiremi ndiremi kashasha pɛtɛ ta ka Israyɛl nyi ketempə va mpa, ma ba'a ba.

¹²Ma nyi cakeɗa ne, va ba tempə hɛ. Ma nyi dekwe ne, kwa mpa tempə hɛ. Ma nyi ketene yitea mpa ne, va ma tempə hɛ. Katendɛkwe hwepe wənəa ɗa 'ya te hɛ.

¹³Ma tsagha, kateɗepete yɛ 'ya ya kaMahwətə vəa ŋkwa nya nza mbeli nyi kempə mpəa nci ɓeɓelayɛ dzeyi kwelɛ wəshi nyi zhɛrete hɛ kashala, dzeyi vare yɛ reghwetɛa nci, dzeyi kwa ghəa yɛ ghweme, dzeyi te yɛ wəmbə, dzeyi yitea yɛ cɛana, dzeyi mbe yɛ ghɛa wəfe ba'a dzeyi te kweci ŋkwa nyi tere nda 'wərdə hɛ ke wəshi nyi zhɛrete hɛ kashala.

¹⁴Kateme 'ya kənəa hɛ ba'a katezhɛre hɛɗi nyi nza hɛ te 'ya pɛtɛ kaɓerama nya dɛrɛŋe rɛŋe, se mɛa ɓerama nya laka bela kwa zeme hwa'a mbe meleme ta Ribla nya laka bela kwa gwela. Ma tsagha ne, kateɗepete hɛ 'ya ya kaMahwətə.»