Read kapsiki Ɛzɛkiyɛl 9 Bible Online

Ɛzɛkiyɛl 9 - kapsiki bible

Ɛzɛkiyɛl 9

¹Kwa sebe ta ŋkɛ, ma ke Shala zlapete: «Hendeke mə geva, gheyɛ mbeli nyi keveyi geva kaɗa Zhɛrəzalɛm. Kelete wəsə kempa ta ŋkɛ yayata wəndə yitea dzeve.»

²Tagha ne, hwa'a kweci mbeli ŋkwaŋe mɛa ŋkwa kedzeki ta ghɛa Shala nya laka bela kwa gwela. Yayata wəndəa nci le wəsə kempa yitea dzeve. Ma hwa hɛ ne, kwete wəndə ya shɛ mbe lekwesa pawa le wəsə kerafe wəsə ta nde rafe wəshi te hətə nya yitea yitəa ŋkɛ. Pa hɛ se kaghereŋenji dzeme vare reghwetɛ mze kwa ghwə ghwə.

³Pa nza ta Shala ta ka Israyɛl slənyɛ kənəa ka shɛrəbɛŋe nya se ŋkɛ kalə laka ŋkwa kedzembe ghɛa Shala. Tagha, ntake ŋkɛ kaheka wəndə nya nza nya lekwesa pawa kənə, nya nza wəsə kerafe wəsəa nde rafe wəshi te hətə nya hwa hwə ve.

⁴Ma ke shɛ: «Dzeghwamte meleme ta Zhɛrəzalɛm pɛtɛ. Ɗaheyi wəsə mɛa kema ta yayata wəndə nya keŋələvə ba'a nya kenehwene va wəshi nyi ndiremi ndiremi kashasha nyi kemene geva mbe.»

⁵Kwa sebe ta ŋkɛ, ma ke Shala gezete nda ke mbeli nyi ketene nyighɛ kafefa 'ya: «Təkwə təkwə mə wəndə nya kadzeyi mbe meleme shɛ yɛ mpəmte mbeli nyi mbe. Mba yɛ kezhɛ heli ba'a kepele ntsə yitea hɛ.

⁶Zamte mə sebe te meha mehɛɗi ba'a megelɛshi, deghelɛshi, ŋwale ba'a mi. Ama dɛapema dzeve yɛ te wəndə nya nza lamba mɛa kema ve ma. Ghate mə te ŋkwa nya keveyi geva tekeleke.» Ntake hɛ ghate kampə mbelia jama nyi kwa kema ta ghɛa Shala.

⁷Ma ke gezave nda ke hɛ: «Zhɛrete mə ghɛa Shala wale wale ba'a viɗikɛ mə yɛ ŋwela ta ŋkɛ le mbeli nyi kempə mpə. Kwa sebe ta ŋkɛ, kwiɗi mə mbe kema.» Pa hɛ shavenji ba'a mpəmte mbeli nyi mbe meleme.

⁸Ma kwa nza hɛ kampə ŋkwa ne, kwetɛŋe ɗa tene 'ya. Fɛke 'ya sha geva hwa hɛɗi, kɛake 'ya sha lewela: «Shala Mahwətə yawe, gha ɗe kazamte sebe te ka Israyɛl nyi ketene, laka ve hwepe wənəa ŋa na kala nya kənəa Zhɛrəzalɛm na?»

⁹Ma ke zhɛnete ɗa: «Kembarave jaɗafa ta ka Israyɛl ba'a ka Zhəwda. Rayɛ ŋkwa nya te hɛɗi va mpə ŋkwa ba'a ŋkwa nya mbe meleme va beze ghena. Ma ke hɛ sha geze: Nahe Mahwətə kewəfəyite hɛɗi. Wəsə shɛ kanakɛ Mahwətə we.

¹⁰Vatse gɛ ne, katezhɛ heli ba'a katepele ntsə 'ya yitea hɛ we. Kwa ghəa nci teve ɗaŋeɗa ta dzeghwa ta nci 'ya.»

¹¹Ma vəa ŋkwa shɛ ne, hwa'a wəndə nya mbe lekwesa pawa nya, nya nza nya wəsə kerafe wəsə ta nde rafe wəshi yitea yitə ve, ma ke shɛ: «Nahe 'ya kemenete kala nya gezave ɗa na.»