Read kapsiki Daniyɛl 11 Bible Online

Daniyɛl 11 - kapsiki bible

Daniyɛl 11

¹Nahe 'ya le ghəa ɗa kekemanakɛ ŋkɛ ba'a ketawete ŋkɛ mbe kwa ghate va ta Dariyəs, nde Mɛde mbe meghe.

²Ma tsetsenya gɛ ne, 'ya kageze ŋa kaganda. Katedzedzete meghe ka meghea kɛfi mahekene mbe Pɛrse, zhɛne ne, katetsene mcɛlə nde wəfaɗe za ma ke pɛtɛa kweci. Ma vəa ŋkwa nya tendeke nda berete mcɛləa ŋkɛ ne, katezele yayata ntsehwele ŋkɛ kezha ha nda mpa ke hɛɗia Grɛse.

³Ama katedzete meghe katsala sewajɛ mbe Grɛse. Katesleke hɛɗi nya bezle ŋkɛ ba'a katemene wəsə nya ɗe ŋkɛ.

⁴Ama vəa ŋkwa nya teheyi slərə ŋkɛ ne, katencɛhwe geva ba'a katenehe nda geva hɛɗia ŋkɛ ke bela ta hɛɗi wəfaɗe. Katedzete ŋkwa ŋkɛ ŋwalea ŋkɛ we. Kwa nza ŋkɛ ne, katenteɗemte geva meghea ŋkɛ ba'a katenza ŋkɛ kaŋa kweci mbeli sərə hɛ.

⁵Katenza meghe nya laka bela kwa zeme bereteke. Ama berete ma tenza kwete wəndəa mbelia ŋkɛ nyi te ghə ke gheŋkɛ ba'a katesleke hɛɗi nya bezle ma ke ŋa ŋkɛ ŋkɛ.

⁶Ma kwa sebe ta yɛ va ɓɛhwɛ ne, katejikə geva hɛ: katewəme meghe nya laka bela kwa gwela wəzha ta meghe nya laka bela kwa zeme kezha yipə jikə geva. Ama kateya berete ta ŋkɛ nde we. Katenza za nta teghweme, ya ŋwalea nci we. Katemte nde zlaɓe le yite nda, za nta ba'a mbeli nyi kekeleghe ŋkɛ kadzeme bela kwa gwela.

⁷Katedzete ŋkwa ŋkɛ kwete wəndə hwa hwelefefia ŋkɛ, katese ŋkɛ kaha nda mpa ke ka sewajɛa meghe nya laka bela kwa gwela mbe yɛ meleme ta ŋkɛ nyi nza zli yitea hɛ. Katempa ŋkɛ le hɛ ba'a katehərə hɛ ŋkɛ.

⁸Katefə yɛ shala ta nci, pa ta shala ta nci nyi le mze, wəshi mze kwa tɛawetɛa ba'a kwa tere ta nci nyi nza zləvə te hɛ ŋkɛ kadzawa Ɛzhipte kawəshi nyi fəke mbeli hwa mpa. Ɓiyitsa ne, katenza ŋkɛ kava ɓɛhwɛ cakeɗake yitea meghe nya laka bela kwa gwela.

⁹Ma kwa sebe ta ŋkɛ ne, katedzawa hɛɗia meghe nya laka bela kwa zeme meghe nya laka bela kwa gwela, zhɛne ne, katezhɛne geva ŋkɛ kadzete hɛɗia ŋkɛ.

¹⁰Katehi geva ŋwalea meghe nya laka bela kwa gwela yitea mpa ba'a katetsene ka sewajɛ kwele kwele hɛ. Katedzemte mpa kwete wəndəa nci, zlaɓe le ka sewajɛa ŋkɛ ne, katedzawa ŋkɛ wəmbəa ghala kala hələ nya paca paca. Ma vəa ŋkwa nya tezhɛne geva ŋkɛ kadzete hɛɗia ŋkɛ ne, kateha nda mpa ŋkɛ ke meleme nya berete ta ka ghema.

¹¹Tagha gɛ, katehwepe wənə meghe nya laka bela kwa zeme ba'a katelə ŋkɛ kaha nda mpa ke meghe nya laka bela kwa gwela. Katetsene ka sewajɛ kwele kwele meghe nya laka bela kwa gwela, ama katedzembe dzeve ta meghe nya laka bela kwa zeme hɛ.

¹²Ma vəa ŋkwa nya tehərəte ŋkwa meghe nya laka bela kwa zeme ne, katekele ghə ŋkɛ. Ya kwela tempə ka sewajɛ ŋkɛ tipə tipə ne, katetemə berete ta ŋkɛ we.

¹³Katezhɛne geva meghe nya laka bela kwa gwela kalə sha ghɛ ba'a katetsene ka sewajɛ ŋkɛ kwele kwele ma ke nyi keghate. Ma kwa sebe ta va ɓɛhwɛ ne, katezhɛne geva ŋkɛ kase le ka sewajɛ kwele kwele ba'a wəshi kempa kwele kwele.

¹⁴Ma vəa ŋkwa shɛ ne, katesate te ŋkwa mbeli kwele kwele yitea meghe nya laka bela kwa zeme. Ya ka mene berete nyi mbe hwelefe ta ŋa, gha Daniyɛl ne, katesate hɛ te ŋkwa yite kezha yipə wəsə nya kenakɛ geva nya, ama kateteɗe hɛ.

¹⁵Katesawa meghe nya laka bela kwa gwela, katetsene hɛɗi ŋkɛ dzeyi yitea meleme nya nza zli yite ba'a katekele ŋkɛ ŋkɛ. Katepesle ka sewajɛ nyi laka bela kwa zeme yite, ya tsema ka katsala kɛfi hwa hɛ we. Kateghereŋe hɛ kwa kema ta ŋkɛ we.

¹⁶Ma wəndə nya ketelə shɛ ne, wəsə nya ɗe meghea shɛ yatemene ŋkɛ, wəndə shɛ kateghereŋe kwa kema ta ŋkɛ we. Katenza ŋkɛ te hɛɗi nya ganyɛ ma, kwa sebe ta nya mpəakawa ŋkwa ŋkɛ.

¹⁷Zhɛne ne, katezəzə ŋkɛ kasate te ŋkwa le pɛtɛa berete ta hɛɗia ŋkɛ. Katedzeghe ŋkɛ kamene wəsə nya tiɗiɗi: kateve nda wəzha ta ŋkɛ ŋkɛ ke meghe nya laka bela kwa zeme kamale, le zəzə keza sebe te hɛɗia nde ghema ta ŋkɛ. Ama katemene geva zəzə ta ŋkɛ tɛape we.

¹⁸Kwa sebe ta ŋkɛ ne, kateve ntsə meghe nya laka bela kwa gwela te hɛɗi nyi dzeyi mɛa ndərə ba'a katekele kweci kwele kwele ŋkɛ. Ama katetereke fegea ŋkɛ kwete wəndə nya te ghəa ka sewajɛ nya kande mtake kaɗema ŋkɛ katezhɛnaghe nda fegea ŋkɛ.

¹⁹Tagha gɛ, kateve ntsə ŋkɛ te meleme nyi berete berete te hɛɗia ŋkɛ, ama katefa deme ŋkɛ te hɛ we. Katemte ŋkɛ ba'a katezhɛne mbeli kasləyi ŋkɛ we.

²⁰Ma wəndə nya ketedzete meghe te ŋkwa ŋkɛ ne, kateghwene wəndə ŋkɛ kezha fə wəshi ganji nyi te hɛɗia meghe. Ama kwa sebe ta və ɓɛhwɛ ne, katepesle meghea shɛ mbeli, kenza va beze ta wənə keɗema kwamte mpa we.

²¹Ma wəndə nya ketedzete meghe te ŋkwa ŋkɛ ne, wəndə nya ɓelama mbeli, wəndə nya hima mbeli kave nda meghe. Ama katedzete meghe ŋkɛ laka ntsehwelea ŋkɛ vəa ŋkwa nya nza hɛɗi gwezlayɛ.

²²Wəvəsəa ka sewajɛ shɛ katehərə ŋkɛ we. Katempə hɛ ŋkɛ pɛtɛ ba'a katepesle wəndə nya te ghəa hwelefe ta jikə geva ŋkɛ.

²³Te zlaɓa ta jikə geva nyi kemenete geva le ne, kateghwete ŋkwa ŋkɛ. Kateha nda mpa ŋkɛ ke mbeli ba'a katehərə ŋkwa ŋkɛ le mbeli ɓɛhwɛ.

²⁴Ma vəa ŋkwa nya nza hɛɗi gwezlayɛ ne, katedzete hɛɗi nyi ganji ma mbe sla ta hɛɗi ŋkɛ. Katemene wəsə nya ghama ka shihɛnyɛ, ya ka shihɛnyɛa ka shihɛnyɛ kamenete ŋkɛ: katefə wəshi nyi te hɛɗi ŋkɛ ba'a katenehe nda wəshia shɛhɛ ŋkɛ ke mbeli nyi yite. Katezəzə ŋkɛ kaha nda mpa ke meleme nyi berete berete. Ama kavə ɓɛhwɛ tetemə ŋkɛ.

²⁵Ma kwa vate ghə ŋkɛ te berete ta ŋkɛ ba'a hwepe ghə ta ŋkɛ ne, kateha nda mpa ŋkɛ le ka sewajɛ kwele kwele ke meghe nya laka bela kwa zeme. Ma meghea shɛ perə ne, katehi geva ŋkɛ yitea mpa le ka sewajɛ nyi berete berete kwele kwele, ama kateghereŋe ŋkɛ kwa kema ta ŋkɛ we, kwa nza ŋkɛ katetsa ghena mbeli yite.

²⁶Katepamte ŋkɛ mbeli nyi yite, vəa ŋkwa nya nza ka sewajɛa ŋkɛ kwamte mpa. Tagha gɛ, katempə ka sewajɛa ŋkɛ kwele kwele.

²⁷Katezeme wəsə kezeme ka meghea kɛfi nyi bake nyi te ŋkwa nya kwetɛŋe, ama va ndiremia mehele ta nci ne, katesla nda tseŋwə hɛ ke ghəa nci. Katefa deme mbeli te ghena ta nci we, kwa nza ŋkɛ ne, te və nya kesləyi geva tekiɗi ghena shɛ.

²⁸Katezhɛne geva meghe nya laka bela kwa gwela kadzete hɛɗia ŋkɛ le wəshi kwele kwele. Ma kwa hweŋkwa ne, kateme ŋkɛ te hwelefe nya kemenete jikə geva le Shala kala nya zəzəte ŋkɛ. Kwa sebe ta ŋkɛ ne, katezhɛne ŋkɛ kadzete hɛɗia ŋkɛ.

²⁹Ma te və nya kesləyi geva ne, katezhɛne geva meghe nya laka bela kwa gwela kadzawa hɛɗi nya laka bela kwa zeme. Ama te nya və ne, katemene geva wəshi kala nya kakwa ghate we.

³⁰Katese mbeli le kwambelə laka ŋkwa kepəkwə ta veci kezha ha nda mpa. Katenza ŋkɛ keyirə yirə ba'a katezhɛre geva ŋkɛ te sebe. Katedərəfə wənə ŋkɛ te hwelefe nya kemenete jikə geva le Shala. Ama katejikə mɛ ŋkɛ le mbeli nyi ketewəfə jikə geva ta Shala.

³¹Kateghereŋe ka sewajɛ nyi ghweneke ŋkɛ, katezhɛre ŋkwa nya keveyi tekeleke nya berete hɛ wale wale. Katefɛa melɛ nyi dzeghe mbeli keveci keveci hɛ ba'a kateve wəsə nya ndiremi kashasha hɛ te reghwetɛ.

³²Ma laka meɗe mɛ tseŋwəa ŋkɛ ne, kateghwete mbeli meghea shɛ le ghəa ŋkɛ kezha sərə jikə geva. Ama katenza mbeli nyi keɗepe Shala ta nci bereteke ba'a katesate hɛ te ŋkwa.

³³Kateteke nda wəshi mbeli nyi kezəzə ghena nyi hwa hɛ ke mbeli kwele kwele. Ama mbe və ɓɛhwɛ ne, katempə kweci mbeli va kafayɛ, katetere kweci va ghwə, katefəhwe geva kweci ba'a katebete geva kweci kwa daŋgayɛ.

³⁴Ma mbe vəa yaka shɛ ne, deke ɓɛhwɛ tekemane hɛ mbeli. Kwa nza ŋkɛ ne, kwele kwele mbeli nyi ketejikə geva le hɛ le ntsehwele.

³⁵Ma hwa mbeli nyi kezəzə ghena ne, kwele kwele mbeli nyi ketempə. Mpə ta nci nde teyaɓe mbeli, nde tepɛ hɛ ba'a nde tezhɛre hɛ tɛzlɛzlɛ kezha kwa keɗaŋe ta və. Kwa nza ŋkɛ ne, nahe ŋkɛ kenza kaŋa və nya kesləyi geva.

³⁶Wəsə nya zeɗehwe nda yamene meghea shɛ. Katekele ghəa ŋkɛ ŋkɛ ba'a kateve ghəa ŋkɛ te ghəa pɛtɛa yɛ shala. Kategeze ghena nyi ndiremi ndiremi te Shala ta yɛ shala. Katejive ŋkɛ mbe kema hwa'a te və nya tenca hwepe wənə ta Shala, kwa nza ŋkɛ katemene geva wəsə nya tarete Shala.

³⁷Katehawe meghea shɛ va shala nyi se ka shihɛnyɛ kahawe va hɛ, ya va shala nya ɗehwe mi we. Kwa nza ŋkɛ ne, te ghəa pɛtɛa yɛ shala veyi ghəa ŋkɛ ŋkɛ, kwete shɛ kaɓela ŋkɛ we.

³⁸Ma te ŋkwa nci ne, katehawe ŋkɛ va shala ta meleme nyi berete berete, shala nya ɗepetema ka shihɛnyɛ. Kateve nda mze kwa tere tere, mze kwa tɛawetɛa, pelɛ nyi nza zləvə te hɛ ba'a wəshi ganji ŋkɛ.

³⁹Kateha nda mpa ŋkɛ ke meleme nyi berete berete laka kemane ta kwete shala. Kateve zləvə ŋkɛ te pɛtɛa mbeli nyi keyɛte shala shɛ. Kateve hɛ ŋkɛ kambeli nyi te ghəa mbeli kwele kwele ba'a kateve nda yɛ wəve ŋkɛ ke hɛ kazhɛme.

⁴⁰Ma te keɗaŋe ta və ne, kateha nda mpa meghe nya laka bela kwa zeme ke meghe nya laka bela kwa gwela. Ama katentsa ŋkɛ yitea meghe nya laka bela kwa zeme le yɛ wəmata kempa ta ŋkɛ, ka zleɗe gədəwəa lɛməa ŋkɛ ba'a kwambelə kwele kwele. Katedzete hɛɗi kwele kwele ŋkɛ le ka sewajɛa ŋkɛ. Katedzawa ŋkɛ wəmbəa yɛ ghala kala hələ nya paca paca.

⁴¹Katedzete hɛɗi nya ganyɛ ma ŋkɛ, tagha gɛ, katempə mbeli kwele kwele ŋkɛ. Ama ka Ɛdom, ka Mowab ba'a mbeli nyi te ghəa ka Amon ne, katembele hɛ va ɗa ta ŋkɛ.

⁴²Katesleke kweci hɛɗi ŋkɛ, pa le Ɛzhipte katembelema ve.

⁴³Katefə mcɛləa Ɛzhipte ŋkɛ: mze kwa tere tere, mze kwa tɛawetɛa ba'a kweci wəshi ganji. Kateve ghəa nci ka Libi ba'a ka Ɛtiyopi mbe dzeve ta ŋkɛ.

⁴⁴Ama kateve nda ghazlənə ghena mɛnɛfɛ nyi kese laka ŋkwa kesame ta veci ba'a laka bela kwa gwela. Katedzemte mpa ŋkɛ le wənə le wənə ba'a katempə mbeli kwele kwele ŋkɛ.

⁴⁵Katemɓe cɛ lekwesa meghea ŋkɛ ŋkɛ kwelɛ yɛ ndərə le ghweme nya keveyi geva tekeleke ta hɛɗi nya ganyɛ ma. Tagha teceha ŋkɛ mte kaɗema wəndə shɛ kezha kemane ŋkɛ.