Read kapsiki Daniyɛl 5 Bible Online

Daniyɛl 5 - kapsiki bible

Daniyɛl 5

¹Ma te kwete hɛ ne, pa meghe Baltazar takɛ nda gajamendə ke mbelia jama nyi yite slibə. Ntake ŋkɛ kasa tɛ kwa kema ta nci.

²Ma kwa ghwəyi ŋkɛ ne, pa gezete kezha fəke wəshi kesa wəshi nyi le mze kwa tere tere ba'a mze kwa tɛawetɛa nyi fəte yitenyɛ Nabəkodonozor mbe ghɛa Shala nya mbe Zhɛrəzalɛm mbeli, yitea sa wəsə kesa ŋkɛ, mbelia jama nyi yite, ka meghwateshia ŋkɛ ba'a kweci mia ŋkɛ kwa hɛ.

³Tagha gɛ, pa mbeli fəke wəshi kesa wəshi nyi kese mbe ghɛa Shala nya mbe Zhɛrəzalɛm. Ntake meghe, mbelia jama nyi yite, ka meghwateshia ŋkɛ ba'a kweci mia ŋkɛ kasa wəshi kwa hɛ.

⁴Ma kwa sebe ta nya sahwe wəshi hɛ ne, ntake hɛ katsahe yɛ shala mze kwa tere tere, mze kwa tɛawetɛa, mze kwa ghwə ghwə, lɛ, sheghwə ba'a pelɛ.

⁵Taghanyɛ ne, pa dzeve ta wəndə ŋelɛ ncake nca vare wəsə kentare yɛ paterela. Ntake nde karafe wəsə dzeyi vare dewe nya tɛawetɛa ta ghɛ meghe. Ma kwa nakɛ dzevea shɛ meghe karafe wəsə ne,

⁶pa kema ta ŋkɛ zhɛrenyɛ tɛarawe rawe, kwetɛ kwetɛŋe yɛ mehele ta ŋkɛ tazenji, gwenate geva ta ŋkɛ tanyɛ ba'a kampempa geva yɛ ghəa shenea ŋkɛ.

⁷Pa meghe zlapete le berete kezha fə nda ka kelɛŋə, ka mene ghwɛ ba'a ka ŋa zlera mbeli kadzeki. Laŋe meghe te ghena, ma ke sha ka ntsehwele ntsehwele nyi mbe Babilone: «Ma wəndə nya kejaŋgate rafe nya ba'a nya kegezete ɗa ghena nya mbe ne, kateseɗe nda karalame 'ya, kateve nda livə mze kwa tere tere 'ya kwa welɛ ba'a katenza ŋkɛ hwa ka mene slene nyi jama jama te hɛɗia meghe.»

⁸Tagha gɛ, pa pɛtɛa ka ntsehwele ntsehwelea meghe dzeki, ama wəndə shɛ hwa hɛ kejaŋgate rafea shɛ keɗema kegezete nda ghena nya mbe ke meghe we.

⁹Pa Baltazar dakenyɛ kwele kwele ba'a pa kema ta ŋkɛ zhɛrenyɛ tɛarawe rawe ma zhɛkwa. Kwetɛ kwetɛŋe yɛ mehele mbelia jama nyi yite tazenji perə.

¹⁰Pa meghekɛa meghe fate lewela nya tsate meghe ba'a ŋa mbelia jama nyi yite. Pa nde dzembe cɛ kezeme wəsə kezeme, ma ke sha meghe: «Meghe yawe, hɛyi ŋa Shala teghweme! Dakema na va yɛ zəzə ta ŋa ba'a nzama kema ta ŋa tɛarawe rawe ma.

¹¹Ma te hɛɗia ŋa ne, wəndə nya nza sefəa yɛ shala mbe ya shɛ. Ma te vəa yiteyɛ ŋa ne, nahe mbeli kesləyi kelɛŋə, ɗepe wəsə ba'a ntsehwele kala ŋa yɛ shala mbe. Vatse veyi ŋkɛ yiteyɛ ŋa, meghe Nabəkodonozor kawəndə nya te ghəa ka mene ghwɛ, ka kelɛŋə, ka ɗepe nza ta yɛ saseregwa ba'a ka ŋa zlera.

¹²Zəzə nya dzawe ya ve, nahe ŋkɛ keɗepe zeweve ta wəshi ba'a nahe ŋkɛ kenza kande ɗepe wəsə. Nahe ŋkɛ keɗepe geze ghena nya mbe yɛ shiwə, keɗepe ghena nyi dzawe dzawe ba'a keɗepe ntsehwelea ghena nyi ghyana ghyana. Hekake Daniyɛl nya ndeke nda slə meghe kaBɛltasar mbeli. Kategeze ŋa ghena nya mbe rafea shɛ ŋkɛ.»

¹³Tagha gɛ, pa mbeli keleghe Daniyɛl kadzeki sha meghe. Laŋe meghe te ghena, ma ke shɛ: «Gha ya kaDaniyɛl, nde Zhəwif nya keleke meghe, yiteyɛ ɗa, se mbe Zhəwda na?

¹⁴Nahe 'ya kefate kageze mbeli sefəa yɛ shala ya mbe gha ba'a nahe mbeli kesləyi kelɛŋə, ɗepe wəsə ba'a ntsehwele nya dzawe mbe gha.

¹⁵Pa mbeli fəke ɗa ka ntsehwele ntsehwele ba'a ka mene ghwɛ kezha jaŋga rafe nya ba'a kezha geze ɗa ghena nya mbe, ama kepesle hɛ yite we.

¹⁶Nahe 'ya kefate wərə na kagezete ghena nya mbe wəshi nyi dzawe dzawe ba'a kaɗepete ntsehwelea ghena nyi ghyana ghyana. Ma kejaŋgate rafe nya na ba'a kegezete ɗa ghena nya mbe na ne, kateseɗe ŋa karalame 'ya, kateve ŋa livə mze kwa tere tere 'ya kwa welɛa ŋa ba'a katenza na hwa ka mene slene nyi jama jama te hɛɗia ɗa.»

¹⁷Ma ke Daniyɛl zhɛnete nda ke meghe: «Wərə na kasərəakɛ wəshi gəməa ŋa va gha keɗema kafəave nda hɛ ke kweci mbeli. Ma 'ya ne, katejaŋga ŋa rafe nya 'ya ba'a kategeze ŋa ghena nya mbe 'ya.

¹⁸Meghe yawe, nahe Shala tehwə ghweme keveyi yiteyɛ ŋa Nabəkodonozor kameghe nya wəba, nya berete ba'a nya nza zləvə te.

¹⁹Ma tewəmbəreke kwele nya ndeke nda Shala ne, nahe pɛtɛa hɛɗi, pɛtɛa hwelefefi ba'a pɛtɛa ghena kese kabare bare va ghazlənə kwa kema ta ŋkɛ. Kapesle wəndə nya ɗe ŋkɛ ŋkɛ ba'a kasərə wəndə nya ɗe ŋkɛ ŋkɛ teghweme. Kave zləvə ŋkɛ te wəndə nya ɗe ŋkɛ ba'a kashifə wəndə nya ɗe ŋkɛ.

²⁰Ama pa zhɛrenyɛ kande kele ghə ba'a kande ntɛaŋentɛa ghə. Tagha gɛ, tseɗake ŋkɛ kelemte geva sawa te meghe ba'a rayɛ ŋkɛ zamte zləvəa ŋkɛ.

²¹Ŋkwase ŋkɛ ŋkamte geva shave hwa mbeli, pa zhɛrenyɛ kala wəshi keseɗa. Pa ŋkɛ nzanyɛ hwa kwara lɛmə gamba, ntake ŋkɛ kazeme gwəzə kala sla ba'a nahe ŋkɛ kese bətə mbe mɛnɛ, hwa'a te və nya ɗepete ŋkɛ Shala tehwə ghweme ya kande sleke mbeli pɛtɛ ba'a kave nda meghe ŋkɛ ke wəndə nya ɗe ŋkɛ.

²²Ma gha Baltazar, wəzege ta ŋkɛ ne, kese na kashifə ghəa ŋa, ya gha ɗepete wəshia shɛhɛ megela we.

²³Nahe na kese kavereslə le Shala nya pelɛ ghweme, te və nya fəke wəshi kesa wəshi nyi kese mbe ghɛa Shala na. Nahe yɛ kese kasa tɛ kwa hɛ, gha, mbelia jama yitea gha, ka meghwateshia ŋa ba'a kweci mia ŋa. Nahe na ketsahekɛ yɛ shala mze kwa tɛawetɛa, mze kwa tere tere, mze kwa ghwə ghwə, lɛ, sheghwə ba'a pelɛ, shala nyi keɗema kanakɛ ŋkwa, kafa ghena keɗema nyi keɗepema wəshi. Nahe na kesema kave zləvə te Shala nya nza mpia ŋa ba'a pɛtɛa dzeghwa ta ŋa mbe dzeve ta ŋkɛ.

²⁴Vatse ghweneke dzeve Shala kezha rafe wəshi nyi.

²⁵Wa nyi wəshi nyi kerafete geva nyi: MENƐ, MENƐ, TEKƐL ba'a PARSIN.

²⁶Wa nya ghena nya mbe nya: MENƐ, geze ta ŋkɛ, “keɓela ɓela”: nahe Shala keɓelate yɛ hɛa ŋa mbe meghe ba'a nahe ŋkɛ ketarete kiɗi ta ŋkɛ.

²⁷TEKƐL, geze ta ŋkɛ, “kedzeghe dzeghe”: nahe na kedzeghete geva te kiləwə ba'a nahe na kesləyi geva dewə.

²⁸PERƐS, geze ta ŋkɛ, “kenehe nehe”: nahe meghea ŋa keneheve geva ba'a nahe ŋkɛ kendeke nda geva ke ka Mɛde ba'a ka Pɛrse.»

²⁹Tagha gɛ, pa Baltazar gezete kezha seɗe nda karalame mbeli ke Daniyɛl ba'a kezha seɗe nda livə mze kwa tere tere mbeli kwa welɛ. Pa ŋkɛ zlapete kezha nza Daniyɛl hwa ka mene slene nyi jama jama mbe hɛɗia meghe.

³⁰Ma mbe viɗia shɛ ne, pa mbeli peslekɛ Baltazar, meghe nya mbe Babilone.