Read kapsiki Daniyɛl 6 Bible Online

Daniyɛl 6 - kapsiki bible

Daniyɛl 6

¹Pa Dariyəs, nde Mɛde dzete meghe, vəa ŋkwa nya nza ta ŋkɛ ŋkwaŋemsə bakeghəmbe.

²Pa Dariyəs tarete kezha nta mbelia jama gwəmsə ba'a bakemsə kezha sleke pɛtɛa hɛɗia ŋkɛ.

³Pa ŋkɛ nteyi mbeli nyi te ghə mahekene te ghəa nci. Ma kezha ɗema kabeze nda ghena ke meghe ne, kategeze nda dzeghwa ta slene mbe sla ta hɛɗia nci mbelia jama shɛhɛ ke hɛ. Nahe Daniyɛl kenza hwa mbeli nyi te ghəa shɛhɛ.

⁴Nahe Daniyɛl kenza za ma ke kweci mbeli nyi te ghə ba'a mbelia jama, kwa nza ŋkɛ zəzə nya zlahe ya mbe. Pa meghe zəzəte kave ŋkɛ kawəndə nya te ghəa pɛtɛa hɛɗia ŋkɛ.

⁵Tagha gɛ, ntake mbeli nyi te ghə ba'a mbelia jama kazele wəsə keve nda fete ke Daniyɛl mbe slene nyi te hɛɗia meghe. Ama fete shɛ keɗema wəsə keŋele ŋkɛ shɛ kesləyi hɛ, va nya nza ŋkɛ le kaganda tsape we. Pele se keɗema fete shɛ kesləyi mbeli mbe we.

⁶Ma ke mbelia shɛhɛ kwelɛ ghəa nci: «Wəsə shɛ kesləyi gheɓəmə kezha ve nda fete ke Daniyɛl we, nda gheɓəmə kakemave wəsə keve nda fete mbe hawe ta ŋkɛ va wəsə mahalegəa Shala ta ŋkɛ.»

⁷Le dera le dera ne, cape mbeli nyi te ghəa shɛhɛ ba'a mbelia jama shɛhɛ kalə sha meghe, ma ke hɛ shɛ: «Meghe Dariyəs yawe, hɛyi ŋa Shala teghweme!

⁸Nahe mbeli nyi te ghəa hɛɗia meghe, mbeli nyi te ghəa wəshi, mbelia jama, ka ncɛ ntsehwele ba'a ka ŋgwamna kemenete tsene. Wa nya ghena nya tsahwe hɛ nya: ‹Kategeze meghe kawəsə mahalegə kezha ɗema mbeli kasəkwə kwete shala keɗema kwete wəndə keɗema gha mbe hɛ mahekenemsə. Ma yayata wəndə nya kesəkwəte kwete shala keɗema kwete wəndə ne, katenegha ŋkɛ mbeli kwa kia yɛ nivɛrə.›

⁹Ma tsetsenya gɛ meghe yawe, yɛte wəsə mahalegə nya ba'a dɛkate lamba ta ŋa te, yitea ɗema ŋkɛ kazhɛne kazhɛremte geva, kala nya ɗe wəsə mahalegəa ka Mɛde ba'a ka Pɛrse nya keɗema kazhɛremte geva.»

¹⁰Tagha gɛ, pa meghe Dariyəs dɛkate lamba ta ŋkɛ te palepa ta wəsə mahalegəa shɛ.

¹¹Ma kwa fate Daniyɛl nahe meghe kedɛkate lamba ta ŋkɛ te palepa ta wəsə mahalegəa shɛ ne, shilimə ŋkɛ dzekinyɛ ki ghɛa ŋkɛ. Ma te cɛ nya pelɛ ghəa cɛ ne, yɛ wəfela nyi keghwene geva jive laka Zhɛrəzalɛm ya shɛ. Kagwəɗəŋə ŋkɛ mahekene zhigə mbe vəghwə kezha səkwə Shala ta ŋkɛ ba'a kezha tsahe ŋkɛ, kala nya seneve ŋkɛ vəashi.

¹²Tagha gɛ, hwa'a ka ghema ta ŋkɛ kahe kahe, pa hɛ sləyi ŋkɛ mbe səkwə ghə ba'a mbe nehwene nda nehwene ke Shala ta ŋkɛ.

¹³Kwa sebe ta ŋkɛ ne, cape hɛ kalə sha meghe, ma ke hɛ shɛ: «Ashɛ meghe kedɛkate lamba te palepa ta wəsə mahalegə nya kefɛa ŋkwa kesəkwə kwete shala keɗema kwete wəndə mbe hɛ mahekenemsə wəka? Ma yayata wəndə nya kesəkwəte kwete shala keɗema kwete wəndə ne, ashɛ mbeli katenegha ŋkɛ kwa kia yɛ nivɛrə wəka?» Ma ke meghe zhɛnete: «Kaganda ne, tsagha tarete 'ya, kala wəsə mahalegəa ka Mɛde ba'a ka Pɛrse nya keɗema kazhɛremte geva.»

¹⁴Tagha gɛ, laŋe hɛ te ghena, ma ke hɛ sha meghe: «Meghe yawe, ma Daniyɛl, kwete wəndə hwa mbeli nyi fəke mbeli mbe Zhəwda ne, kahawe ŋkɛ va gha, ya va wəsə mahalegə nya dɛkate lamba ta ŋa na te we: zhigə mahekene səkwə Shala ta ŋkɛ ŋkɛ mbe vəghwə.»

¹⁵Ma kwa fate ghena shɛ meghe ne, kwetɛ kwetɛŋe yɛ mehele ta ŋkɛ tazenji. Pa ŋkɛ ɗehwe kezha mbele mpia Daniyɛl. Pa va pəkwə ta veci ne, ntsehwele kembelete ŋkɛ yazele ŋkɛ.

¹⁶Ama tewətelɛwe ka ghema ta Daniyɛl zhɛneke geva kase sha meghe, ma ke hɛ shɛ: «Ɗepete megela meghe yawe, ma laka wəsə mahalegəa ka Mɛde ba'a ka Pɛrse ne, wəndə shɛ kazhɛremte ghena keɗema wəsə mahalegə nya dɛkate lamba ta ŋkɛ meghe te we.»

¹⁷Tagha gɛ, pa meghe gezete kezha kele Daniyɛl mbeli kase ba'a kezha neghe ŋkɛ mbeli kwa kia yɛ nivɛrə. Ma ke meghe sha Daniyɛl: «Deke Shala ta ŋa nya ntsə geva nya na kamene nda slene nde tenza kambelete ŋa.»

¹⁸Pa mbeli pəŋəke pelɛ ba'a pəŋəyi mɛa mɛa kia shɛ. Pa meghe dɛkate lamba ta ŋkɛ te, tsagha ŋa mbelia jama ta ŋkɛ, yitea ɗema kwete wəndə kazhɛrete nza ta Daniyɛl.

¹⁹Kwa sebe ta ŋkɛ, cape meghe kalə sha ghɛa ŋkɛ. Pa ŋkɛ hɛnyɛ le ma, pa ɗema pele ka meghwateshia ŋkɛ kadzeki, ama kese ŋkɛ te hɛ we.

²⁰Ma wakakama ta zeweve ta ghweme ne, pelɛhetɛme meghe sate te ŋkwa ba'a cape ŋkɛ kalə kahe kahe kadzemɛa kia yɛ nivɛrə.

²¹Ma kahende geva ŋkɛ kase sha kia shɛ ne, ma ke hekate Daniyɛl le nehwene kwa ŋwələ: «Daniyɛl, nde mene slene ta Shala teghweme, nahe Shala ta ŋa nya ntsə geva nya na kamene nda slene kembelete ŋa va yɛ nivɛrə tse gɛ na?»

²²Tagha gɛ, ma ke Daniyɛl zhɛnete nda: «Meghe yawe, hɛyi ŋa Shala teghweme!

²³Nahe Shala ta ɗa keghweneke nde ghwene ta ŋkɛ nya keŋzlemte mɛa yɛ nivɛrə. Wəsə kwa ndiremi shɛ kemenete ɗa hɛ we. Kwa nza ŋkɛ ne, nahe Shala keveyi ɗa kande menetema fete. Meghe yawe, ya laka gha ne, fete shɛ kemenete 'ya perə we.»

²⁴Tagha gɛ, nahe meghe kenza fare fare, pa gezete kezha kele Daniyɛl mbeli same kwa ki. Samema ta Daniyɛl ne, zhi shɛ kenakɛ mbeli te geva ta ŋkɛ, va nya ndeke nda ghə ŋkɛ ke Shala ta ŋkɛ we.

²⁵Pa meghe gezete kezha fə mbeli nyi kese kave nda fete ke Daniyɛl mbeli kase. Pa mbeli nenegheyi hɛ kwa kia yɛ nivɛrə, ghenci, mia nci ba'a ŋwalea nci. Pa yɛ nivɛrə slekwehwe hɛ ba'a ncɛhwemte geva ta nci tewə hɛ kedzawa kadzete hɛɗi.

²⁶Ma kwa sebe ta ŋkɛ ne, ma ke meghe Dariyəs rafete nda ghena ke pɛtɛa hwelefefi, pɛtɛa hɛɗi ba'a pɛtɛa ghena nyi te hɛɗi lema: «Kanjiŋwe ŋayɛ 'ya!

²⁷Wa nya ghena nya geze 'ya nya: Ma te pɛtɛa hɛɗi nya mbe dzeve ta ɗa ne, yayata wəndə katehawe tsape tsape va Shala ta Daniyɛl. Gheŋkɛ ya kaShala teghweme, gheŋkɛ nde tenza kaghala ghala. Nahe ŋkɛ kenza kameghe nya kaghala ghala, katekiɗi berete ta ŋkɛ we.

²⁸Kambeɗe ŋkwa ŋkɛ ba'a kambele ŋkwa ŋkɛ, kamene wəshi kencɛ wəshi ba'a wəshi meŋele ŋkɛ pelɛ ghweme ba'a te hɛɗi. Gheŋkɛ nde mbeleke Daniyɛl shave mbe yɛ pela ta yɛ nivɛrə.»

²⁹Kwa sebe ta ŋkɛ, pa Daniyɛl menete slene megela vəa ŋkwa nya nza Dariyəs kameghe ba'a vəa ŋkwa nya nza Sirəs, nde Pɛrse kameghe.