Read kapsiki Daniyɛl 8 Bible Online

Daniyɛl 8 - kapsiki bible

Daniyɛl 8

¹Ma mbe kwa mahekene ta va ta Baltazar te meghe ne, pa 'ya, 'ya Daniyɛl zhɛne kanakɛ kwete wəsə, kwa sebe ta nya ghate 'ya kanakɛ.

²Wa nya wəsə nya nakɛ 'ya nya: Ma newe ghəa ɗa 'ya ne, mbe Səze, meleme nya berete mbe sla ta hɛɗia Ɛlam, mɛa hələa Əwlay 'ya.

³Ma newe 'ya ne, pa 'ya nakɛ game nya meghereŋe mɛa hələ. Tereme nyi biya biya ya bake kwa ghəa ŋkɛ, ama biya ma nya kepese kakwa keɗaŋe ke kwete.

⁴Ma newe 'ya ne, kaɗa ŋkwa gamea shɛ le tereme laka ŋkwa kepəkwə ta veci, laka bela kwa gwela ba'a laka bela kwa zeme. Wəsə keseɗa shɛ kaghereŋe kwa kema ta ŋkɛ we, wəndə shɛ kazləgwəke ŋkwa ve we. Wəsə nya ɗe ŋkɛ yamene ŋkɛ ba'a nda mtsehe yamtsehe berete ta ŋkɛ.

⁵Ma mba 'ya kazəzə wəsəa shɛ ne, pa 'ya nakɛ zhɛfa kashave laka ŋkwa kepəkwə ta veci. Pa nde dzeghwamte hɛɗi lema kaɗema seɗa ta ŋkɛ kekwaɗakɛ hɛɗi. Tereme nya ve ntsə mbeli te ya kwelɛ ntsə va zhɛfa shɛ.

⁶Pa nde hendave nda geva ke game nya nakɛ nya 'ya bake tereme kwa ghəa ŋkɛ mɛa hələ. Tereŋe ŋkɛ yitea hwɛ kalə shɛ le pɛtɛa berete ta ŋkɛ.

⁷Kanewe ŋkɛ 'ya nda hendave nda geva nde ke gamea shɛ ba'a nda hwepete wənə nde ve. Pa ŋkɛ ɗate gamea shɛ ba'a felaŋemte tereme ta ŋkɛ nyi bake. Kapesle gamea shɛ yitea ɗa ŋkɛ we. Tagha gɛ, pa nde neghate ŋkɛ te hɛɗi ba'a ŋkeɗemte ŋkɛ. Wəndə shɛ kazləgwəke gamea shɛ ve we.

⁸Pa zhɛfa shɛ kelenyɛ kewəbanyɛ. Ama vəa ŋkwa nya nza ŋkɛ bereteke ne, pa tereme nya wəba ɓelenyɛ. Ma te ŋkwa ŋkɛ ne, pa kweci tereme nyi ve ntsə mbeli te hɛ wəfaɗe pesenji jive laka bela ta hɛɗi nyi wəfaɗe.

⁹Pa kwete tereme pesenyɛ shave mbe nya ɓɛhwɛ ma hwa teremea shɛhɛ ba'a kelenyɛ kebiyanyɛ dzawa laka bela kwa zeme, jive laka ŋkwa kesame ta veci ba'a jive laka hɛɗi nya ganyɛ ma.

¹⁰Pa nde kelenyɛ hwa'a pelɛagha sha ka sewajɛ nyi pelɛ ghweme, pa nde mpəate kweci ka sewajɛa shɛhɛ ba'a yɛ saseregwa te hɛɗi, pa nde ŋkeɗemte hɛ.

¹¹Ya wəndə nya te ghəa ka sewajɛ nyi pelɛ ghweme ne, pa teremea shɛ have nda mpa, pa nde fɛamte melɛ nyi dzeghe nda mbeli keveci keveci ba'a zhɛrete ghɛa Shala wale wale.

¹²Ma laka slene nyi ndiremi ndiremia shɛhɛ ne, pa melɛ nya keveci keveci ndeke nda geva, tsagha ka sewajɛ nyi pelɛ ghweme. Pa teremea shɛ neghate kaganda te hɛɗi ba'a pa nde jive mbe kema mbe yayata wəsə nya mene nde.

¹³Tagha gɛ, pa 'ya fate nde ghwene ta Shala kageze ghena. Ma ke kwete nde ghwene ta Shala sha gezete nda ghena: Pa te nyama və tetemə melɛ nya keveci keveci, slene nyi ndiremi ndiremi nyi kebeze wəshi pɛtɛ, nza ta ghɛa Shala wale wale ba'a ŋkeɗe ta ka sewajɛ nyi pelɛ ghweme, nyi kenakɛ geva nyi tse wa?

¹⁴Ma ke nde ghate ta nde ghwene ta Shala zhɛnete nda: Nda tɛhwɛɗi ba'a masheke 2.300 kakiɗinji. Kwa sebe ta ŋkɛ ne, katedzete zhɛvəalia ŋkɛ ghɛa Shala.

¹⁵Ma mba 'ya, 'ya Daniyɛl kanewe wəsəa shɛ ne, ntake 'ya kazele fa ta ŋkɛ. Pa 'ya nakɛ wəsə kala pa ta wəndə. Pa ŋkɛ se ba'a ghereŋenyɛ kwa kema ta ɗa.

¹⁶Tagha gɛ, pa 'ya fate ŋwələa wəndə ŋelɛ same kwa hələa Əwlay, ma ke zlapete: Gabriyɛl, ncɛte nda ghena nya mbe wəsəa shɛ ke wəndə nya!

¹⁷Pa Gabriyɛl hendeke geva kase kadzete ŋkwa nya ghereŋe ɗa 'ya te. Ma vəa ŋkwa nya hende geva ŋkɛ kase ne, pa ghazlənə keseve ɗa, pa 'ya teɗe ɗa njifə kema mbe hɛɗi. Ma ke sha 'ya: Wəndə ŋelɛ, fave kiɗi ta və yancɛ wəsə nya.

¹⁸Ma vəa ŋkwa nya geze ɗa ghena ŋkɛ ne, pa wəsə slate ɗa, mba kema ta ɗa njifə mbe hɛɗi. Pa ŋkɛ kwaɗakɛ ɗa ba'a kelakate ɗa sate te ŋkwa.

¹⁹Kwa sebe ta ŋkɛ, ma ke sha 'ya: 'Ya katencɛ ŋa wəsə nya ketemene geva te kiɗi ta və nya kesləyi geva, və nya tekiɗi hwepe wənə ta Shala.

²⁰Ma game nya nakɛ nya na le tereme bake kwa ne, yɛ meghea ka Mɛde ba'a ka Pɛrse yancɛ ŋkɛ.

²¹Ma zhɛfa ne, meghea ka Grɛk ŋkɛ. Ma tereme nya wəba nya kwelɛ ntsə ta ŋkɛ nya ne, nde ghate ta meghe yancɛ ŋkɛ.

²²Ma tereme nya keɓelenyɛ ba'a tereme wəfaɗe nyi kepesenji te ŋkwa ŋkɛ ne, ka meghea kɛfi wəfaɗe nyi ketedzete ŋkwa ŋkɛ yancɛ hɛ, ama katekemave berete ta ŋkɛ hɛ we.

²³Ma te kwa keɗaŋe ta meghea nci, vəa ŋkwa nya nza ka ndiremia mehele mbe kwa keɗaŋe ta ndiremia mehele ta nci ne, katedzete meghe wəndə nya kekele ghə ba'a nya keɗepemte ghwete ŋkwa.

²⁴Katemtsehe berete ta ŋkɛ, ama ve se ŋkɛ we. Katebeze wəshi ŋkɛ ndiremike mike ba'a katejive ŋkɛ mbe kema mbe yayata wəsə nya temene ŋkɛ. Kateza sebe ŋkɛ te mbeli nyi berete berete, geze ta ŋkɛ mbeli nyi kaŋa Shala.

²⁵Ma le ntsehwelea ŋkɛ ne, kateghwete ŋkwa ŋkɛ. Ma mbe kele ghə ta ŋkɛ ne, katempə mbeli kwele kwele ŋkɛ, mbeli nyi keve ghəa nci gwezlayɛ. Kateha nda mpa ŋkɛ ke wəndə nya te ghəa mbeli nyi te ghə. Ama katezamte geva sebe te kaɗema dzeve kekwaɗakɛ ŋkɛ.

²⁶Nya ya kakaganda ta ghena nya mbe wəsə nya nakɛ nya na te ghəa yɛ tɛhwɛɗi ba'a masheke. Ama gezema ghena ta wəsə nya nakɛ nya na tsetsenya ma. Kwa nza ŋkɛ ne, cakeɗake və nyi temene geva ŋkɛ te.

²⁷Tagha gɛ, ma 'ya, 'ya Daniyɛl ne, pa geva ta ɗa tanyɛ ba'a pa zereghwe kesehwe ɗa kahɛ kwele kwele. Kwa sebe ta ŋkɛ, pa 'ya mbe ɗa, zhɛne 'ya kamene slene ta meghe. Nahe mehele ta ɗa kenza ketaze taze va wəsə nya nakɛ 'ya, tewəmbəreke nya favema ŋkɛ 'ya.