Read kapsiki Ozɛ 1 Bible Online

Ozɛ 1 - kapsiki bible

Ozɛ 1

¹Ghena nya gezete nda Mahwətə ke Ozɛ, wəzege ta Bɛri, vəa ŋkwa nya nza Zhɛrobowam, wəzege ta Zhowas, kameghe mbe Israyɛl ba'a vəa ŋkwa nya se Oziyas, Yotam, Ahaz ba'a Ɛzɛkiyas mbe meghe kwa Zhəwda.

²Wa nya tsetse ghate geze nda ghena Mahwətə ke mbelia ŋkɛ laka Ozɛ. Ma ke Mahwətə sha Ozɛ: «Kwiɗi, wəmeve male nya kemene mefətekwə. Ma ŋwale nyi teya na hwe ne, kaŋwalea male nya kemene mefətekwə tenza hɛ. Kwa nza ŋkɛ ne, nahe mbeli nyi te hɛɗia ɗa kemenete mefətekwə nya kaganda, laka wəfəyite ɗa, 'ya Mahwətə.»

³Tagha gɛ, cape Ozɛ lə kakelete Gomɛr, wəzha ta Diblayim kamale. Zlivə nde dzawa hwə, bawe nde yake nda wəzege teza.

⁴Ma ke Mahwətə sha Ozɛ: «Hekate nda slə kaZhizrɛyɛl, kwa nza ŋkɛ temə vireɗi ne, kateme 'ya te hwelefe ta Zhɛhə tewəmbəreke mimi nya keshekeyi geva mbe Zhizrɛyɛl. Kateza sebe 'ya te meghe mbe Israyɛl.

⁵Ma te vecia shɛ ne, katehwəshi rəgia Israyɛl 'ya kwa zlərəa Zhizrɛyɛl.»

⁶Njihe Gomɛr le hwə ɓiyitsa, ferete nde yake wəzha makwa. Ma ke Mahwətə sha Ozɛ: «Hekate nda slə kaKwaɗema, kwa nza ŋkɛ kazhɛne 'ya kaɗe ka Israyɛl we. Katekele pɛtɛa ɗe ta ɗa 'ya seyi kənəa hɛ.

⁷Ama ka Zhəwda ne, kateɗe hɛ 'ya ba'a katembele hɛ 'ya, 'ya Shala Mahwətə ta nci. Katembele hɛ 'ya kaɗema le rəgi, ya kafayɛ, ya mpa, ya gədəwəa lɛmə keɗema ka zleɗe gədəwəa lɛmə.»

⁸Ma kwa fɛamte nda ŋ'wa Gomɛr ke Kwaɗema ne, njihe nde le hwə zhɛkwa, bawe nde yake wəzege teza.

⁹Ma ke Mahwətə sha Ozɛ: «Hekate nda slə ‹kaKaɗema kahwelefe ta ɗa›, kwa nza ŋkɛ ma gheyɛ ka Israyɛl ne, kenza yɛ kahwelefe ta ɗa we, 'ya ne, kenza 'ya kawəsə sha gheyɛ we.»