Read kapsiki Ozɛ 11 Bible Online

Ozɛ 11 - kapsiki bible

Ozɛ 11

¹Ma ke Shala: «Ma te və nya se Israyɛl kamempɛhweta ne, nahe 'ya keɗehwe ŋkɛ, nahe 'ya kehekake ŋkɛ, gheŋkɛ nya kawəzege ta ɗa same kwa Ɛzhipte.

²Ama kwa sebe ta ŋkɛ, ma kantsehe heka ŋkɛ 'ya ne, kantsehe hendemte geva ŋkɛ yitea 'ya. Melɛ yadzeghe nda mbelia ɗa ke yɛ Ba'al, 'wərdə yatere nda hɛ ke kweci shala.

³Ndagwara 'ya nde se kateke nda dzeghwa ke Ɛfrayim ba'a nde se kakese ŋkɛ te dzeve. Ama keɗepete ŋkɛ 'ya nde se kanewe ghweme te we.

⁴Nahe 'ya kencɛte nda hweŋkwa le gwedəa mehele, nahe 'ya kese slape vare gheŋkɛ laka ɗe. Nahe 'ya kese kala meghekɛa wəzege nya keslape wəzege ta nta vare ghweleme ta nta. Nahe 'ya kese kavəkwə yite kezha ve nda wəsə kezeme.

⁵Katezhɛne ka Israyɛl kadzawa Ɛzhipte we, ama Asiri nde tenza kande sleke hɛ. Kwa nza ŋkɛ nahe hɛ keɗema zhɛne geva kase sha 'ya.

⁶Vatse nza mpa dzeyi mbe yɛ meleme ta nci, kaŋzla zli nyi dzeyi yitea hɛ ŋkɛ, kampə pɛtɛa wəshi ŋkɛ tewəmbəreke zəzə nyi ndiremi ndiremia nci.

⁷Nahe mbelia ɗa kezhɛrave ɗa wəmbə. Kaheka hɛ mbeli sawa pelɛ ghweme ne, ama wəndə shɛ hwa hɛ kesate te ŋkwa we.

⁸Tsema tenza 'ya kawəfəyite ŋa wa Ɛfrayim? Tsema tenza 'ya kapamte ŋa wa Israyɛl? Tsema tenza 'ya kamenete ŋa kala Adma, kazhɛrete ŋa kala Seboyim wa? Nahe mehele ta ɗa kenza ketaze taze, nahe zhɛ helia ɗa kenza kwele kwele.

⁹Katepele nda hweŋkwa 'ya ke ghwə ta hwepe wənəa ɗa we, katezhɛne geva 'ya kase kaza Ɛfrayim we. Kwa nza ŋkɛ ne, nahe 'ya kenza kaShala, kaɗema kawəndə ŋelɛ. Ma sha gha, gha Ɛfrayim ne, nahe 'ya kenza kaShala nya kaganda, katese 'ya le wənə le wənə we.»

¹⁰Katedzeghwa mbeli nyi fəhwe mbeli kwetere wəmbə va Mahwətə nya keghwəghwə kala nivɛrə. Ma te və nya teghwəghwə ŋkɛ ne, katehwɛ ŋwalea ŋkɛ le bare bare shave pelɛ ŋkwa kepəkwə ta veci.

¹¹Katehwɛ hɛ same kwa Ɛzhipte le bare bare kala zlə ta yɛ zaghwala, ba'a sawa pelɛ Asiri kala zlə ta yɛ ghwəɗəŋkwə. Ma ke Mahwətə gezete: «Katezhɛne hɛ 'ya kase kadzete hɛɗia nci.»