Read kapsiki Ozɛ 13 Bible Online

Ozɛ 13 - kapsiki bible

Ozɛ 13

¹Ma vəa ŋkwa nya gezete ghena Ɛfrayim ne, nahe mbeli pɛtɛ kese kaghazlənə. Wəbake se ŋkɛ te hɛɗia ka Israyɛl. Ama nahe ŋkɛ kemenete beze ghena laka hawe va Ba'al ba'a nahe ŋkɛ kemtenyɛ tewəmbəreke gheŋkɛ.

²Pa ɓeshi ne, jaɗafa yamene ka Ɛfrayim: nahe hɛ kevɛsəte nda yɛ pa ta wəshi ke ghəa nci, kweci shala nyi ncake hɛ yitea mze kwa tɛawetɛa ta nci ke ghəa ŋkɛ. Nahe hɛ kenza kaslene ta ka mene wəshi. Ndagwara ma ke hɛ sha geze: «Dzeghe nda mə melɛ ke hɛ gɛ!» Ntake mbeli kahawe va levea lɛmə.

³Vatse tenza hɛ kala ləmbə nya masheke, kala mɛnɛ nya kebete kahe kahe te kwəsərə, kala cɛkəvə nya kele sefə cakeɗake yitea lane ba'a kala n'yi nya ketələ same te wəfela.

⁴Israyɛl, 'ya ya kaMahwətə Shala ta ŋa ghala same na kwa Ɛzhipte. Kwete Shala shɛ keɗepe na keɗema 'ya we, kwete nde mbele ŋkwa shɛ keɗema 'ya we.

⁵Ma 'ya ne, nahe 'ya keɗepete ŋa te ɓerama, te hɛɗi nya keghwele ghwele.

⁶Dzetema ta ŋa te ŋkwa nya nza gwəzə ne, nahe na kebehekɛ ghəa ŋa. Ama behema ta ŋa ne, nahe na kezhɛre ŋa kande kele ghə, vatse zaghəyite ɗa na.

⁷Tagha gɛ, pa 'ya zhɛre ɗa kala nivɛrə kaŋa ŋayɛ pɛtɛ, kala deghwava nya ɗeke ɗeke kezha ɗa ŋkwa kwa hweŋkwa.

⁸Kaha ŋayɛ mpa 'ya kala mtsekwele nya fəhwe ŋwale mbeli yite. Pa 'ya ŋkwahemte hate te gheyɛ. Tagha gɛ, kaslekwe ŋayɛ 'ya kala ŋemalea nivɛrə, Katemcɛhwe ŋayɛ wəshi keseɗa nyi hwa gamba mbe.

⁹Israyɛl, wa nya na keza za gɛ! Deke 'ya nde nza kakemanakɛ ŋa.

¹⁰Tema meghea ŋa kezha mbele ŋa ŋkɛ gɛ wa? Tema mbeli nyi te ghəa ŋa nyi dzeyi mbe yɛ meleme ta ŋa gɛ wa? Ma vəashi ne, ma pa na gezete ɗa: Ndeke ɗa meghe ba'a mbeli nyi te ghə.

¹¹Tagha gɛ, pa 'ya ndeke ŋa ka meghea kɛfi va nya bezenyɛ wənəa ɗa va gha. Ama va hwepe ta wənəa ɗa ne, pa 'ya zhɛne kafəhwe hɛ.

¹²Nahe fete ta Ɛfrayim kerafete geva megela. Nahe jaɗafa ta ŋkɛ kewəmbəyi geva te ŋkwa ganyɛ.

¹³Kateme yaka te kala nya te və keya wəzege. Ama nahe ŋkɛ kawəzege nya kadewə mehele: ma kwa se və kesawa ta ŋkɛ ne, pa ɗema sawa kwa hwəa meghekɛ.

¹⁴Katembeɗe hɛ 'ya va dzawa ghɛa mbelia kwahɛɗi na? Katembele hɛ 'ya va mte na? Gha mte, tema wəshi kempa ta ŋa gɛ wa? Gha ghɛa mbelia kwahɛɗi, tema berete kempə ŋkwa ta ŋa gɛ wa? Katezhɛ heli 'ya yitea Ɛfrayim we.

¹⁵Ma vəa ŋkwa nya jive Ɛfrayim mbe kema hwa ka kesaka yitenyɛ ne, kase sefəa ŋkwa kesame ta veci, kase sefəa Mahwətə te ɓerama. Tagha gɛ, kahase ghwa, kashifə belageji, kafə mcɛlə ba'a pɛtɛa wəshi nyi nza zləvə te ŋkɛ.