Read kapsiki Ozɛ 14 Bible Online

Ozɛ 14 - kapsiki bible

Ozɛ 14

¹Kateme ɗa te ka Samari va nya zhɛrave nda wəmbə hɛ ke Shala ta nci. Katempə hɛ va kafayɛ, kateghazle ŋwalea fəshia nci mbeli ba'a katehene ŋwale mbeli same kwa hwə va mia nci.

²Israyɛl, zhɛne geva kase sha Shala Mahwətə ta ŋa, kwa nza ŋkɛ fete ta ŋa nde teɗemte ŋa.

³Zhɛne mə geva kase sha Mahwətə, ma pe yɛ sha geze nda ghena: «Kelemte pɛtɛa fete ta n'yɛ te wənə ba'a yɛte wəsə ganyɛ nya ve ŋa ghen'yɛ. Ma te ŋkwa mcɛmcɛli ne, katedzeghe ŋa melɛ n'yɛ le ghena nyi geze n'yɛ.

⁴Katembelete n'yɛ Asiri we. Katezhɛne n'yɛ kadzeme gədəwə kempa we. Ma pa na ta wəshi nyi menete nyi ghen'yɛ ne, katezhɛne n'yɛ kaheka hɛ ‹kaShala ta n'yɛ› we. Kwa nza ŋkɛ deke gha nde zhɛ heli yitea mezhɛte.»

⁵Ma ke Shala: «Katembe Israyɛl 'ya va fama ghena ta ŋkɛ. Kateɗe ŋkɛ 'ya le wənə kwetɛŋe kwa nza ŋkɛ mba wənəa ɗa kebeze beze ve we.

⁶Katenza 'ya sha Israyɛl kala mɛnɛ, katebete ghwə ŋkɛ kala ghwəli ghwa, kateha slərə ŋkɛ kala wəfe nyi mbe Liban.

⁷Kateha yɛ dzeve ŋkɛ, katenza ŋkɛ ganyɛke kala bekele, katezəŋwə ŋkɛ kala yɛ wəfe ta Liban.

⁸Katezhɛne geva ka Israyɛl kase kezha ntishɛ yitea shenaŋkwe ta ŋkɛ. Katezhɛne hɛ kawəza ha, katebete ghwə hɛ kala rɛzɛŋe, katenza zləvə te hɛ kala tɛ nya mbe Liban.

⁹Ɛfrayim, wa wəsə nya kejikəte ɗa le wəshi nyi zhɛrete mbeli kashala wa? 'Ya ya kande zhɛne səkwə ta ŋa ba'a kande newe ghweme te gha. Ma 'ya ne, nahe 'ya kenza kala vɛ, wəfe nya gwəzləmə keveci keveci. 'Ya nde ve ŋa wəshi nyi mene na se te wəve.»

¹⁰Ma wəndə nya kentsehwele ntsehwele ne, katefave wəshia shɛhɛ ŋkɛ. Ma wəndə nya keɗepe wəshi ne, kateɗepe zeweve ta nci ŋkɛ. Kwa nza ŋkɛ ne, nahe yɛ hweŋkwa ta Mahwətə kenza tiɗiɗi tiɗiɗi, katedzeghwa mbeli nyi tiɗiɗi kwa hɛ, ama katebete ka fama ghena kwa hɛ.