Read kapsiki Ozɛ 5 Bible Online

Ozɛ 5 - kapsiki bible

Ozɛ 5

¹Ma ke Shala: «Gheyɛ ka dzeghe Shala, fa mə ghena nya megela, gheyɛ mbeli nyi te ghəa ka Israyɛl, ghwene mə sleme ta ŋayɛ, tsagha gheyɛ mbeli nyi yitea meghe: Gheyɛ ka hi kamene wəsə nya tiɗiɗi, ama nahe yɛ kese kakeleŋa mbe Mispa, kadagalawe nya keŋa ŋa pelɛ Tabor

²ba'a kaki nya lɛame mbe Shitim. Ama 'ya ne, 'ya kateme te gheyɛ pɛtɛ.

³Ma 'ya ne, nahe 'ya keɗepe hwelefe ta Ɛfrayim, kenza Israyɛl le ŋa ŋkɛ tewəfərə va 'ya we. Nahe yɛ keŋkeyite Ɛfrayim yitea mefətekwə, vatse nza Israyɛl wale wale tsetsenya.

⁴Wəshi nyi menete ka Israyɛl ka fɛa hɛ kezhɛre geva kase sha Shala ta nci, kwa nza ŋkɛ sefəa mene mefətekwə nde vɛ hwa hɛ, keɗepe Mahwətə hɛ we.

⁵Kele ghəa ka Israyɛl nde ve nda fete ke hɛ. Bete yabete ka Israyɛl ba'a ka Ɛfrayim va beze ghena ta nci, teɗe yateɗe Zhəwda le hɛ perə.

⁶Le timɛtia nci ba'a yɛ sla ta nci ne, katese hɛ kadzawa kema ta Mahwətə. Ama katesləyi ŋkɛ hɛ, va nya slənyɛ ŋkɛ cakeɗake yitea hɛ we.

⁷Nahe hɛ kepamte Mahwətə laka yake ŋwale mbe mefətekwə. Ma tsetsenya nda temte tere ne, rayɛ teza sebe te wəshi kezeme ghɛ ta nci.

⁸Vɛ mə vəaŋə kwa Gibɛya, vɛ mə veke mbe Rama, tsa mə lewela mbe Bɛt-Avɛn. Se kwetere wəmbə teɗa ŋa nde ghema, gha hwelefe ta Bɛnjamɛn.

⁹Katenza Ɛfrayim kakwəfi te vecia ɗa. Ma wəsə nya zlape nya 'ya hwa ka Israyɛl ne, nahe ŋkɛ kenza kawəsə nya kaganda.

¹⁰Ma mbeli nyi te ghə mbe Zhəwda ne, nahe hɛ kenza kaka hende ghala ta wəve. Katesheke hwepe wənəa ɗa 'ya kənəa hɛ kala ghwa.

¹¹Yaka yasa Ɛfrayim, nahe mbeli keŋkeɗate seɗa te kaganda ta ŋkɛ, va nya ɗehwe hwɛ ŋkɛ kwa sebe ta sefə.

¹²Ma 'ya ne, katenza 'ya kala zhiwəva sha Ɛfrayim ba'a kala ghweleme sha ka Zhəwda.

¹³Nahe Ɛfrayim keɗepete zereghwe ta ŋkɛ, tsagha ɗepete zhia ŋkɛ Zhəwda. Vatse hwɛave nda hwɛ Ɛfrayim ke Asiri ba'a ghwenakɛ nda mbeli ŋkɛ ke meghe nya wəba. Ama gheŋkɛ ne, katembete ŋayɛ keɗema katempimte zhia ŋayɛ ŋkɛ we.

¹⁴Kwa nza ŋkɛ ma 'ya ne, kala nivɛrə tenza 'ya sha Ɛfrayim ba'a kala megela nivɛrə sha ka Zhəwda. Ma kekeseve wəsə 'ya ne, kateslə 'ya le mbe mɛ, wəndə shɛ katezləgwə ŋkɛ va 'ya we.

¹⁵Ma 'ya ne, 'ya kateslə ɗa, 'ya katezhɛne geva kalə sha ghɛa ɗa hwa'a te və nya teɗepe fete ta nci hɛ ba'a nya tezhɛre ɗa geva hɛ. Ma vəa ŋkwa nya tenza hɛ mbe yaka ne, katezele ɗa hɛ.»