Read kapsiki Ozɛ 9 Bible Online

Ozɛ 9 - kapsiki bible

Ozɛ 9

¹Israyɛl, zlamama na kala kweci mbeli ma. Kwa nza ŋkɛ ne, nahe na keslə ŋa yitea Shala ta ŋa laka mene mefətekwə. Zhɛme yaɗe na kaŋ'we dzeyi te yayata lane.

²Katebehe ŋa lane ba'a gela n'yi we, katekemave tɛ mɛnɛfɛ nya neghe na na we.

³Katenza nza ka Ɛfrayim te hɛɗia Mahwətə we, katezhɛne geva hɛ kadzawa Ɛzhipte keɗema kadzeme Asiri. Pelɛagha ne, katezeme wəshi nyi wale wale hɛ.

⁴Tagha gɛ, kateɓasle nda tɛ hɛ ke Mahwətə we, katenza melɛa nci zeɗehwe nda we. Katenza wəsə kezeme kala ɗafa zhaŋe sha hɛ: wale wale tenza pɛtɛa mbeli nyi kezehwe ŋkɛ. Katenza hɛ behe behe va ɗafa ta nci, ama katekele ŋkɛ hɛ kadzembe ghɛa Mahwətə we.

⁵Wa yatemene yɛ te vecia begeme geva, te vecia gəsəkəa Mahwətə wa?

⁶Ma te və nya teslə yɛ te hɛɗia ŋayɛ nya kebeze beze ne, katekemaneve ŋayɛ Ɛzhipte, ama katenza meleme ta Mɛmfis kakwele ta ŋayɛ. Katepese ndəŋwə hwa mcɛləa ŋayɛ, katenza tigə kwara dzeyi ki ghɛa ŋayɛ.

⁷Nahe vəa sate te ŋkwa ta Mahwətə kese, nahe vəa ŋki zhɛme kese, ɗepete vəa shɛ Israyɛl gɛ! Ma pe yɛ sha geze: «Nahe nde mɛ ŋkwa kenza kagezhi, taheta taheta geze ghena wəndə nya nza sefəa Shala mbe.» Yawa, ma nda nza 'ya kagezhi ne, tewəmbəreke wəba ta fete ta ŋayɛ ba'a va ghyana ta mpa nya ha ɗa yɛ.

⁸Ma nde newe ghweme te Ɛfrayim ne, nahe ŋkɛ kenza le Shala ta ɗa, gheŋkɛ ya kande mɛ ŋkwa. Ama keleŋa yaŋa nda mbeli dzeyi kwa pɛtɛa hweŋkwa ta ŋkɛ. Ma mbe ghɛa Shala ta ŋkɛ ne, mpa yaha nda mbeli.

⁹Nahe yɛ kedzembe ŋayɛ mbe tepe ta beze ghena, kala nya vəashi mbe Gibɛya. Ama katezaghə fete ta ŋayɛ Shala we, kateɗa ŋayɛ ŋkɛ va jaɗafa ta ŋayɛ.

¹⁰Ma ke Shala gezete: «Ma vəashi ne, nahe 'ya kesləyi Israyɛl kala rɛzɛŋe nyi kwamte te ɓerama. Nahe 'ya kenakɛ ka shihɛ ŋayɛ kala kwa ghate ta ya ta dasekwa. Ama ntsehema ta nci mbe Ba'al-Pɛyor ne, pa hɛ ndeke nda ghəa nci Ba'al-Hawe ba'a zhɛrenji ndiremike kashasha kala shala nya ɗehwe hɛ.

¹¹Katezlə zləvəa Ɛfrayim kala zlə ta yɛ zaghwala: katezhɛne ya ŋwale kanza shɛ we, katezhɛne mi nyi le hwə kanza shɛ we, katezhɛne mi kadzawa hwə we.

¹²Ya ŋwale nyi kele hɛ ne, katefə hɛ 'ya va hɛ nda tenza hɛ kazhili. Kaganda ne, wa nya ndiremi tenza te hɛ vəa ŋkwa nya slə ɗa 'ya yitea hɛ gɛ!

¹³Ma newe Ɛfrayim 'ya ne, nahe ŋkɛ kezhɛrete ŋwalea ŋkɛ kala sli nyi kese mbeli kwamte. Kasərə hɛ ŋkɛ kalə sha nde mpə ŋkwa.»

¹⁴Mahwətə, ma kenza na kave ɗa te hɛ ne, nyama ɗa tse wa? Zhɛrete mia nci kaka jɛŋa ba'a shifəmte ŋ'wa te hate va hɛ gi!

¹⁵Ma ke Shala ɓiyitsa: «Nahe pɛtɛa 'yaghwa mehele ta nci kencɛte geva mbe Gilgal: Mbagha ghate 'ya kaɗema hɛ. Va slene nyi ndiremi ndiremia nci ne, kateŋka hɛ 'ya shave mbe ghɛa ɗa, katezhɛne 'ya kaɗe hɛ we. Nahe pɛtɛa mbeli nyi te ghəa nci kenza kaka fama ghena.

¹⁶Nahe ɗa keme te Ɛfrayim, nahe yɛ slərəa ŋkɛ keghwelenji, katezhɛne ŋkɛ kaya yɛ ya we. Ya ŋwale nza va mi ɓiyitsa ne, katempə ŋwale ganji nyi yake hɛ 'ya.»

¹⁷Katezhɛne Shala ta ɗa kaɗe hɛ, va nya fate nda ma ghena hɛ we. Katenza hɛ kaka ndeŋe dzeyi hwa kweci hwelefefi.