Read kapsiki Amos 6 Bible Online

Amos 6 - kapsiki bible

Amos 6

¹Ndiremi ya te gheyɛ nyi gwezlayɛ mbe Siyon ba'a gheyɛ nyi kwelɛŋe pelɛ ghweme ta Samari! Gheyɛ ya kahwelefe ganyɛ nya tezhɛre geva ka Israyɛl kase shɛ, ke mbeli sha geze.

²Kwiɗi mə kadzembe Kalnɛ shɛ yɛ newakɛ. Zhɛne ne, dzembe mə Hamat, meleme nya wəba. Ɓiyitsa ne, dzawa mə Gat sha ka Filisti. Za ma yɛ ke meleme nyighɛ na? Wəba ma hɛɗia ŋayɛ ke hɛɗia nci na?

³Ma kwa ɗe yɛ kahende vecia ndiremi cakeɗake ne, vəa mene berete te mbeli yahendeke yɛ.

⁴Seserayɛ yɛ te gezle nyi rafekɛ mbeli le slene ta cewe, ba'a ɓeɓelahe yɛ te yɛ keshi deyɛte kezha zeme gamea lɛmə nyi dzame dzame ba'a mcɛmcɛli nyi nza ntsə te hɛ kwa gəzhi.

⁵Kamte yɛ te cimə kagha yitea gagera. Kanca mɛnɛfɛa wəshi ketsa yɛ kala David.

⁶Kasa tɛ yɛ kwa zlerekwe nyi jama jama, kafi geva yɛ le ghəa n'yi ghwene, ama ketsakɛ ŋayɛ ɗa nya te hwelefe ta Zhozɛf we.

⁷Vatse gɛ ne, mpelɛa gheyɛ tefə mbeli tsetsenya. Rayɛ teza sebe te veghe sha ka meɗəa kɛfi.

⁸Ma ke Shala Mahwətə nde berete zemete fela le ghəa ŋkɛ: «Zeɗehwe ɗa kele ghə ta ka Israyɛl we, Keɓela ghɛ ganjia nci 'ya we. 'Ya kateve nda yɛ Samari le wəshi nyi mbe ke ka jaga ta nci.»

⁹Ma ketetene zhili meŋe ki ghɛ ne, katempə hɛ.

¹⁰Tagha gɛ, katefə mbeli nyi kempə mpə ka menəhɛnyɛ hɛ shave ki ghɛ kezha la. Ma kenza nde mba wəndə ketene teghweme talɛ zeweve ta ghɛ ne, ma te'yɛwe wəndəa shɛ ve: «Mba wəndə kikə yitea gha na?» -- «Ewə, wəndə shɛ we», tezhɛne nda ŋkɛ. Ma tegeze ŋkɛ zhɛkwa: «Nza divə, kwa nza ŋkɛ ne, və kehekɛme sləa Mahwətə nya we.»

¹¹Ntsehwele mə, kwa nza ŋkɛ ne, kwetɛŋe geze ghena Mahwətə nda ŋzleŋzla geva ghɛ nyi jama jama ba'a nda peperawe nyi ɓɛhwɛ ɓɛhwɛ.

¹²Kahwɛ yɛ gədəwə dzate te yɛ keleɓa na? Kawəza mbeli le sla dzate te na? Wa raberə zhɛrete nza tiɗiɗi yɛ kawəsəa kwamasa ba'a kaganda yɛ kawəsə kwa ndɛalɛa wa?

¹³Zlama yazlama yɛ tewəmbəreke nya hərəte Lod-Dabar yɛ. Ma pe yɛ sha geze: «Te zlaɓa ta berete ta ɓəmə nda kelehwe meleme ta Karnayim, meleme nya berete mə.»

¹⁴Ama ma ke Shala Mahwətə nde berete: «Ka Israyɛl, 'ya kateghwene ŋayɛ kwete hwelefe. Katempə ŋayɛ ŋkɛ se mbe Lebo-Hamat nya laka bela kwa gwela hwa'a kwa hələa Araba nya laka bela kwa zeme.»