Read kapsiki Amos 9 Bible Online

Amos 9 - kapsiki bible

Amos 9

¹Pa 'ya nakɛ Mahwətə meslete te reghwetɛ. Ma ke: «Mpempave wəshi nyi kala derə meghe dzeyi kwa ghəa yɛ selə yitea gaŋkəɗə shihəa nci. Mpəaghe geva hɛ kənəa mbeli pɛtɛ. Ma mbeli nyi ketene teghweme ne, katempə hɛ 'ya le kafayɛ. Wəndə shɛ katehwɛnyɛ we, wəndə shɛ katetene teghweme we.

²Ya hɛ dzawanji hwa mbelia kwahɛɗi ne, katekese hɛ dzeve ta ɗa same kwagha. Ya hɛ dzemenji pelɛ ghweme ne, katefə hɛ 'ya sawa pelɛagha.

³Ya hɛ wəfərənji pelɛ ghəa ghweme ta Karmɛl ne, katedzeme 'ya kazele hɛ ba'a kakese hɛ. Ya hɛ ɗe kawəfərə va ntsə ta ɗa kwa ŋkwəɗəa ndərə ne, kategeze nda 'ya ke shishi yɛmə kahale hɛ kwagha.

⁴Ya hɛ lənji sha ka jaga ta nci kaka mavashi ne, kategeze nda 'ya ke hɛ kampə hɛ le kafayɛ. Kateve ntsə 'ya te hɛ kezha mene nda ganyɛ ke hɛ we, ama kezha ve ndiremi te hɛ.

⁵Ma kedapate dzeve Shala Mahwətə nde berete te hɛɗi ne, kagaŋkəɗə ŋkɛ ba'a kanehwene mbeli nyi te pɛtɛ. Katewepe geva ŋkɛ pɛtɛ kala hələ, zhɛne ne, katesawa ŋkɛ kala hələa Ɛzhipte.

⁶Nahe Shala keŋate ghɛa ŋkɛ pelɛ ghweme nya kənəa hɛɗi kala ghəa cɛ. Katekatse yɛmə ŋkɛ same kwa ndərə kezha ɓasle ŋkwa nya te hɛɗi. Mahwətə ya kasləa ŋkɛ.»

⁷Ma ke Mahwətə: «Ka Israyɛl, zləvə ma te gheyɛ kwa ntsə ta ɗa ke ka Ɛtiyopi na? Ashɛ 'ya nde fəakave ŋayɛ mbe Ɛzhipte kala nya fəakave ka Filisti 'ya mbe Kaftor ba'a ka Siri mbe Kir wəka?»

⁸Mteghere ntsə ta Shala Mahwətə te hɛɗia ka meghea ka Israyɛl nya kemene fete. Ma ke: «'Ya kateza sebe te, te hɛɗi lema. Ama kaza sebe 'ya te hwelefe ta Zhakob pɛtɛ we.

⁹Kwa nza ŋkɛ ne, kategeze ghena ta ɗa 'ya: katetsake tsake ka Israyɛl 'ya kadzehwa kweci hwelefefi kala nya tsake tsake ndaleghe mbeli le lareya kaɗema ndaleghe nya ɓɛhwɛ kateɗe te hɛɗi.

¹⁰Pɛtɛ tempə ka mene fete nyi hwa mbelia ɗa kwamte mpa. Ndagwara ma ke hɛ sha geze: ‹Katese ndiremi we, katekwaɗe ɓəmə ŋkɛ we!›»

¹¹Ma te vecia shɛ ne, kateslete ghwəlia David nya keshɛma nza yitea ghweme 'ya. Katesekawe ŋzla nyi te 'ya, kateŋa kwəfia ŋkɛ 'ya, kateŋa ŋkɛ 'ya kala nya se ŋkɛ vəashi.

¹²Ma tagha ne, katezhɛne ka Israyɛl kafə bela ta hɛɗia Ɛdom ba'a kweci hwelefefi nyi kese kahekɛme sləa ɗa. 'Ya Mahwətə nya ketemene nde gezete.

¹³Ma ke Mahwətə zhɛkwa: «Katese kwete veci nya temene wəshi kwele kwele kaɗema mbeli kameneke te wəve nda tedzemte wəza mbeli. Pa te və nya tsawe ha mbeli tetemə mene ta rɛzɛŋe se te wəve perə. Tagha gɛ, katehwɛ tɛ mɛnɛfɛ sawa hwa yɛ ghweme, bətə tenza yɛ wəmbə mbe.

¹⁴Katezhɛne ka Israyɛl, mbelia ɗa 'ya te ŋkwa nci nya vəashi: kateŋa meleme nyi keŋzla ŋzla hɛ kezha nza mbe, katemɓe yɛ rɛzɛŋe hɛ kezha sa tɛa ŋkɛ, katemene ntsa ta wəfe hɛ kezha zeme ya ta nci.

¹⁵Katezhɛne 'ya kamɓe mbelia ɗa te hɛɗia nci. Katezhɛne hɛ kanteɗemte geva te hɛɗi nya ndeke nda 'ya ke hɛ we. Nya ya kaghena nya geze 'ya, 'ya Shala Mahwətə ta ŋayɛ.»