Read kapsiki Abdiyas 1 Bible Online

Abdiyas 1 - kapsiki bible

Abdiyas 1

¹Wəsə nya nakɛ Abdiyas laka kelɛŋə. Ma ke Shala Mahwətə gezete n'yɛ ghena nya keleghe nda nde ghwene ta Mahwətə ke hwelefefi te ghəa Ɛdom: «Sate mə te ŋkwa, have nda ɓəmə mpa ke Ɛdom!»

²Ma ke Shala gezete: «Ɛdom, 'ya katezhɛre ŋa ɓɛhwɛ hwa hwelefefi. Pɛtɛa mbeli kateɓelama ŋa.

³Kele ghə ta ŋa nde ghwete ŋa, gha nya kenza kwelɛ perawe ta gela ba'a nya kenza pelɛ ghəa ŋkwa. Ma pa na sha zəzə: ‹Wa nde nza kakelakawa ɗa wa?›

⁴Ya gha dzeme ŋa pelɛ ghweme kala zele ba'a pate ghɛa ŋa hwa yɛ saseregwa ne, katekele ŋa 'ya sawa pelɛagha. 'Ya Mahwətə nde gezete.

⁵Ma kedzeki ghɛa ŋa ka ghərəa kɛfi keɗema ka fə wəshia mbeli heviɗi ne, katefə pɛtɛa wəshi nyi nza hɛ kafəte hɛ ba'a katenza na tɛarɛŋe rɛŋe. Ma kedzembe wəvea rɛzɛŋea ŋa ka nda rɛzɛŋe ne, deke yɛ ghwedzekwe ta rɛzɛŋe ɓɛhwɛ yatesərə hɛ.

⁶Tsagha fəhwe wəshia ŋayɛ, gheyɛ hwelefefia Ɛzawə mbeli. Nahe mcɛləa ŋayɛ nyi tewəfərə kencɛte geva.

⁷Kaŋka ŋayɛ mbeli se te hɛɗia ŋayɛ, kaghwete ŋayɛ pɛtɛa mbeli nyi yitea gheyɛ, kahərə ŋayɛ ka mcɛhɛ ŋayɛ, kaŋa ŋayɛ keleŋa ka zeme ɗafa le gheyɛ. Ma ke mbeli sha geze te gheyɛ: ‹Kezhɛne mehele kanza va hɛ we.›

⁸Kaganda ne, ma 'ya gezete, 'ya Mahwətə: Ma te vecia hwepe wənəa ɗa ne, kateza sebe 'ya te ka ntsehwele ntsehwele nyi te hɛɗia Ɛdom, nde ɗepe wəshi shɛ katesərə 'ya hwa ghweme ta Ɛzawə we.

⁹Meleme ta Tɛman, kedake dake tenza ka sewajɛa ŋa. Tagha gɛ, katenza pɛtɛa mbeli nyi hwa ghweme ta Ɛzawə kempə mpə.

¹⁰Ma va berete nya menete yɛ te hwelefefia Zhakob ne, katenza yɛ shewə va hawe ba'a kateza sebe te gheyɛ kaghala ghala.

¹¹Ma te veci nya se yɛ meslete mbe kema ta nci, te veci nya fəhwe wəshia nci ka ghema ta nci, vəa ŋkwa nya dzembe meleme ta nci ka se se ba'a nya nehehwe wəshi nyi mbe Zhɛrəzalɛm hɛ le kwasheghediɗi ne, nahe yɛ kese kamene kala hɛ perə.

¹²Ɛdom, kahi na kazlama yitea newe ka kesaka meyɛ ŋa nyi mbe Zhəwda te vəa ndiremi we. Kahi na kanza fare fare te vəa za ta sebe te hɛ, ya kaŋele hɛ te vəa yaka we.

¹³Kahi na kadzembe meleme ta mbelia ɗa te və nya nza ndiremi te we. Kahi na kazlama yitea beze ta ŋkɛ, ya kafə wəshia ŋkɛ te və nya nza ndiremi te we.

¹⁴Kahi na kaghereŋe kwa baŋwa ta hweŋkwa kezha mpə mbeli nyi ketene teghweme keɗema kakese nda hɛ ke ka jaga te vəa ndiremi we.

¹⁵Kwa nza ŋkɛ ne, nahe vecia ɗa, 'ya Mahwətə kenza takwa takwa, katemeha ghwə 'ya te mbeli pɛtɛ. Tagha gɛ, katemene ŋa mbeli kala nya menete nda na ke kweci mbeli. Katedzeghəa gha wəshi nyi menete na.»

¹⁶Gheyɛ ka Israyɛl, nahe yɛ kesahwe zlerekwe ta hwepe ta wənəa ɗa pelɛ ghweme ta ɗa nya keveyi geva tekeleke. Yawa, tsagha shɛ tesa ŋkɛ kweci hwelefefi kaɗema kaghereŋe. Katesa ŋkɛ hɛ hwa'a te ghwəyi, zhɛne ne, rayɛ teza sebe te hɛ.

¹⁷Ama katese mbeli nyi ketene teghweme kezha wəfərə pelɛ ghweme ta Siyon. Katezhɛne ŋkɛ kanza kaŋkwa nya keveyi geva tekeleke. Katekele hɛɗia nci hwelefefia Zhakob va mbeli nyi kekelehwe ŋkɛ va hɛ.

¹⁸Katenza hwelefefia Zhakob ba'a ŋa Zhozɛf kala ghwə. Katenza hwelefefia Ɛzawə kala vegheme nya teza sebe hɛ te hɛ. Wəndə shɛ katetene teghweme we. 'Ya Mahwətə nde gezete.

¹⁹Katekele ghweme ta Ɛzawə ka Zhəwda nyi laka bela kwa zeme, katekele hɛɗia ka Filisti nyi dzeyi te ŋwela. Katenza hɛ dzeyi te hɛɗia Ɛfrayim ba'a ŋa Samari. Katekele hɛɗia Gala'ad hwelefe ta Bɛnjamɛn.

²⁰Katekele Fɛnisi hwa'a mbe Sarɛpta ka Israyɛl nyi kese laka bela kwa gwela nyi kawəvəsəa ka sewajɛ nya wəba. Katenza mbeli nyi kese mbe Zhɛrəzalɛm nyi mbe Sefarad dzeyi mbe meleme nyi laka bela kwa zeme.

²¹Katehərə ŋkwa hɛ ba'a katedzeme ghweme ta Siyon hɛ kezha sleke Ɛdom. Mahwətə nde tenza kameghe gɛ!