Read kapsiki Ɓela 14 Bible Online

Ɓela 14 - kapsiki bible

Ɓela 14

¹Ntake pɛtɛa ka Israyɛl katsa lewela. Hwencɛke ncɛke hɛ kanehwene.

²Ntake hɛ kaɗema ghena ta yɛ Moyize le Aron. Ma ke pɛtɛa mbeli sha hɛ: «Ayaga, va wa ɗema n'yɛ kempə n'yɛ te hɛɗia Ɛzhipte keɗema te ɓerama tse wa!

³Kezha wa kele ɓəmə Mahwətə kadzete hɛɗi nya tempə nya gheɓəmə va kafayɛ te wa? Katefəhwe mia ɓəmə ba'a ŋwalea ɓəmə mbeli. Ashɛ megela ma zhɛneghe geva gheɓəmə kadzawa Ɛzhipte wəka?»

⁴Tagha gɛ, ma ke hɛ kwelɛ ghəa nci: «Ntave ɓəmə wəndə nya te ghə shɛ gheɓəmə zhɛneghe geva kadzawa Ɛzhipte!»

⁵Tagha gɛ, ntintiŋə yɛ Moyize le Aron sha ghə mbe hɛɗi kwa kema pɛtɛa ka Israyɛl nyi ketsenete geva.

⁶Ma hwa mbeli nyi kese kanewe hɛɗi ne, pa yɛ Zhozəwɛ, wəzege ta Nəwn le Kalɛb, wəzege ta Yefəwnɛ ŋkwahemte lekwesa ta nci.

⁷Ma ke hɛ sha pɛtɛa ka Israyɛl: «Ma hɛɗi nya se nya n'yɛ kanewe ne, hɛɗi nya ganyɛ ŋkɛ.

⁸Ma keɗehwe ɓəmə Mahwətə ne, katekele ɓəmə ŋkɛ kadzete hɛɗia shɛ ba'a kateve ɓəmə ŋkɛ ŋkɛ. Hɛɗi nya hwɛ ŋ'wa ba'a yɛməa mze te ŋkɛ.

⁹Zhɛne nda ma ghə yɛ ke Mahwətə ba'a ghazlənəma yɛ va mbeli nyi te hɛɗia shɛ ma: kwetɛŋe seɗa tehərə hɛ gheɓəmə. Kwa nza ŋkɛ ne, nahe shala nyi keya hɛ kewəfəyite hɛ. Ama Mahwətə ne, le gheɓəmə nza ŋkɛ. Ghazlənəma yɛ va hɛ ma.»

¹⁰Pɛtɛa mbeli kageze beza hɛ le pelɛ kezha mpə hɛ, vəa ŋkwa nya ncɛte nda geva zləvəa Mahwətə ke ka Israyɛl kənəa cɛ lekwesa kebegeme geva.

¹¹Ma ke Mahwətə sha Moyize: «Pa te nyama və teɗema mbeli nyi kaɓela ɗa wa? Pa te nyama və teɗema hɛ kayɛ ɗa ŋa ɗa, ya kwela menete wəshi meŋele 'ya hwa hɛ wa?

¹²'Ya kateve ba te hɛ ba'a kateza sebe te hɛ. Kwa sebe ta ŋkɛ ne, kateya mbeli nyi jama jama ma ba'a berete berete ma ke hɛ 'ya sawa mbe gha.»

¹³Ma ke Moyize zhɛnete nda ke Mahwətə: «Nahe ka Ɛzhipte keɗepete laka berete ta ŋa fəakave mbeli nyi na shave hwa hɛ.

¹⁴Nahe hɛ keɓelate nda ke mbeli nyi te hɛɗia shɛ. Nahe mbelia shɛhɛ kefave te tepe ta mbelia ŋa nza na, gha Mahwətə. Kancɛ nda ghə kwa ntsə kwa ntsə ke hɛ, gha Mahwətə. Kanza meləkwə ləkwə ta ŋa kənəa hɛ ba'a kadzeghwa na te kema ta nci heveci mbe geɗeɗe ta meləkwə ləkwə ba'a heviɗi mbe geɗeɗe ta ghwə.

¹⁵Ma tsetsenya kezamte mbeli nyi na kwetɛŋe seɗa ne, ma tegeze kweci hwelefefi nyi kefate zləvəa ŋa:

¹⁶‹Dewə berete va Mahwətə kafə mbelia ŋkɛ kadzete hɛɗi nya meɗeyi nda ŋkɛ ke hɛ. Vatse mpəmte hɛ ŋkɛ te ɓerama.›

¹⁷Ma tsetsenya ne, kampi ŋa dzeve 'ya Mahwətə yawe. Ncɛte berete ta ŋa, kwa nza ŋkɛ ma pa na gezete:

¹⁸‹'Ya ya kaMahwətə nya kezereghe ghena ba'a nya ganyɛa mehele. Kazereghe yɛ jaɗafa ba'a yɛ fama ghema 'ya. Ama kave nde jaɗafa 'ya kawəndə nya ɗema fete ve we. Kame 'ya te wəndə nya kemenete jaɗafa ba'a te ŋwalea ŋkɛ, hwa'a te kwa maheke keɗema kwa wəfaɗe ta hwelefe.›

¹⁹Təhwə təhwə, kelemte fete ta mbeli nyi te wənə va ganyɛa mehele ta ŋa, kala nya kelemte nda na te wənə ke mbelia shɛhɛ se mbe Ɛzhipte hwa'a teke.»

²⁰Ma ke Mahwətə zhɛnete: «Nahe 'ya kekelemte hɛ te wənə kala nya gezete na.

²¹Ama le zləvəa ɗa nya nza hɛɗi lema bətə ve, 'ya Mahwətə nya teghweme ne,

²²wəndə shɛ hwa mbeli nyi kenakɛ zləvəa ɗa ba'a wəshi nyi menete 'ya mbe Ɛzhipte ba'a te ɓerama, nyi kese nyi kadzeghe ɗa meŋe zhigə ba'a nyi keɗema nyi kese kafa ɗa gha,

²³katenewe hɛɗi nya meɗeyi nda nya 'ya kafela ke ka shihɛ nci we. Wəndə shɛ hwa mbeli nyi kesema nyi kaɓela ɗa katenewe ŋkɛ we.

²⁴Ama va nya se nde mene slene ta ɗa Kalɛb le kwete zəzə ba'a nya ndeke ɗa ghəa ŋkɛ ŋkɛ ne, katekele ŋkɛ 'ya kadzete hɛɗi nya se nya ŋkɛ, kateve nda ŋkɛ 'ya ke hwelefefia ŋkɛ.

²⁵Ka Amalɛk ba'a ka Kanan ya kwa zlərəa shɛ tsetsenya. Ma hendɛ ne, katezhɛne geva yɛ kadzete ɓerama, kadzawa kwa ndərəa ghwəvərə.»

²⁶Ma ke Mahwətə sha yɛ Moyize le Aron zhɛkwa:

²⁷«Pa te nyama və teɗema ghena ta ɗa mbeli nyi wa? Nahe 'ya kefate ɗema ɗa ta ka Israyɛl.

²⁸Ma pe yɛ sha geze nda ke hɛ: Wa nya ghena nya geze 'ya, 'ya Mahwətə nya teghweme nya: Katemene ŋayɛ 'ya kala nya fate 'ya kageze yɛ.

²⁹Katempə yɛ te ɓerama shɛ. Ma pɛtɛa gheyɛ nyi rafete geva sləa ŋayɛ ba'a nyi keɓelate geva nyi, se te va bakemsə kajive mbe kema ne, katempə yɛ, va nya ɗema ghena ta ɗa yɛ.

³⁰Kageze 'ya kaɗema yɛ katedzete hɛɗi nya meɗeyi 'ya kave ŋayɛ te. Deke yɛ Kalɛb, wəzege ta Yefəwnɛ le Zhozəwɛ, wəzege ta Nəwn ka tedzete.

³¹Ma kaŋa ŋwalea ŋayɛ nyi gezete nyi yɛ katekese hɛ mbeli ne, katefə 'ya kadzete. Kateɗepe hɛɗi nya ɗema nya yɛ kese kaɗe hɛ.

³²Ama gheyɛ ne, katempə yɛ te ɓerama nya.

³³Katenza ŋwalea ŋayɛ kaka ya wəshi te ɓerama kava wəfaɗemsə. Kwa ghəa nci tenza fama ghena ta ŋayɛ pa te və nya tempə ŋayɛ yɛ pɛtɛ te ɓerama.

³⁴Hɛ wəfaɗemsə menete yɛ kanewe hɛɗia shɛ. Vatse gɛ, katesa yaka yɛ kava wəfaɗemsə tewəmbəreke fete ta ŋayɛ, geze ta ŋkɛ, va kwetɛŋe te hɛ kwetɛŋe. Ma tsagha gɛ, katefate ghwene nya mbe ɗema ɗa ta ŋayɛ yɛ.

³⁵Nya ya kaghena nya va 'ya kageze ŋayɛ, 'ya Mahwətə. Tsetse temene nda 'ya ke mbeli nyi ndiremi ndiremia mehele nyi ketsate ghena nyi yitea 'ya. Pɛtɛ tekiɗi hɛ te ɓerama. Tagha tempə hɛ.»

³⁶Ma mbeli nyi ghweneghe nyi Moyize kanewe hɛɗi kwa zhɛneke geva hɛ ne, ghenci ka tsəkwəyite pɛtɛa mbeli yitea Moyize, laka kele zləvə seyi te hɛɗia shɛ.

³⁷Mɛke pɛtɛa mbeli nyi se nyi mehele ta nci ndiremike laka kele zləvə seyi te hɛɗi mpənji taghanyɛ kwa kema ta Mahwətə.

³⁸Ma hwa mbeli nyi keghweneghe geva nyi kanewe hɛɗi ne, deke yɛ Zhozəwɛ, wəzege ta Nəwn le Kalɛb, wəzege ta Yefəwnɛ ka tene teghweme.

³⁹Pa Moyize ɓelate nda ghena shɛhɛ ke pɛtɛa ka Israyɛl. Pa mehele ta nci tazenyɛ kwele kwele ve.

⁴⁰Masheke masheke te hendɛ ta ŋkwa ne, cape hɛ kadzeme ghəa yɛ ghweme, ma ke hɛ: «Gheɓəmə kadzeme ŋkwa nya ntave Mahwətə. Kaganda ne, nahe gheɓəmə kemenete jaɗafa.»

⁴¹Ma ke Moyize: «Va wa ɗema yɛ fa ghena nyi gezete Mahwətə wa? Katekete ŋayɛ ŋkɛ we.

⁴²Dzemema yɛ ma, kwa nza ŋkɛ ne, kenza Mahwətə hwa gheyɛ we. Ləma yɛ kezha ɗa ŋayɛ ka ghema ta ŋayɛ ma.

⁴³Tagha ka Amalɛk ba'a ka Kanan te kema ta ŋayɛ. Katempə yɛ va kafayɛa nci. Ma va nya zhɛrave nda wəmbə yɛ ke Mahwətə ne, katenza ŋkɛ le gheyɛ we.»

⁴⁴Pa hɛ menete ghə ntɛaŋe ntɛaŋe kezha dzeme ghəa ghweme. Ama kese səndəkwəa jikə geva ta Mahwətə ba'a Moyize kaslə mbe ghedəkwə we.

⁴⁵Pa ka Amalɛk ba'a ka Kanan nyi hwa ghwemea shɛhɛ sawa. Pa hɛ ɗate ka Israyɛl ba'a kekate hɛ hwa'a mbe Horma.