Read kapsiki Ɓela 17 Bible Online

Ɓela 17 - kapsiki bible

Ɓela 17

¹Ma ke Mahwətə sha Moyize:

²«Geze nda ke nde dzeghe Shala Ɛlazar, wəzege ta Aron kezha fəakave wəshi ketere 'wərdəa shɛhɛ ŋkɛ shave mbe ghwə ba'a kezha tazemte ghwəa shɛ ŋkɛ, kwa nza ŋkɛ ne, wəshi nyi keveyi geva tekeleke wəshi ketere 'wərdəa shɛhɛ.

³Ma le wəshi ketere 'wərdəa mbeli nyi kempənji nyi va jaɗafa ta nci ne, kategezla wəshi mbeli slapesla slapesla kezha slape dzeyi vare reghwetɛ. Ma va nya fəke geva hɛ kadzawa kema ta Mahwətə ne, kawəshi keveyi geva tekeleke tenza hɛ. Kawəsə keve nda zəzə ke ka Israyɛl tenza hɛ.»

⁴Pa nde dzeghe Shala Ɛlazar fəte wəshi ketere 'wərdəa mbeli nyi keteremte geva nyi teghweme nyi le mze kwa ghwə ghwə. Pa mbeli gezlate wəshi slapesla slapesla yitea hɛ kezha slape dzeyi vare reghwetɛ.

⁵Kawəsə keve nda zəzə ŋkɛ ke ka Israyɛl yitea ɗema wəndə ŋkwərə, geze ta ŋkɛ, wəndə nya keɗema mbe hwelefe ta Aron kahende geva kase kezha tere 'wərdə kwa kema ta Mahwətə. Ma yayata wəndə nya kemenete ne, katemene nda geva wəsə nya kemenete nda ke yɛ Korɛ le mbeli nyi yite, kala nya gezave nda Mahwətə ke Aron laka Moyize.

⁶Ma te hendɛ ta ŋkwa ne, ntake pɛtɛa ka Israyɛl kaɗema ghena ta yɛ Moyize le Aron. Ma ke hɛ: «Nahe yɛ kempəmte mbelia Mahwətə!»

⁷Ma vəa ŋkwa nya tseneyite geva ka Israyɛl yitea yɛ Moyize le Aron ne, pa hɛ zhɛrete geva laka cɛ lekwesa kebegeme geva. Tagha gɛ, pa n'yi zhiɓəaghe geva kənə ba'a pa zləvəa Mahwətə ncɛte geva.

⁸Cape yɛ Moyize le Aron kadzeyi kwa kema ta cɛ lekwesa kebegeme geva.

⁹Ma ke Mahwətə sha Moyize:

¹⁰«Hendemte mə geva yitea mbeli nyi. 'Ya kateza sebe te hɛ kala metɛ ta ntsə.» Pa yɛ Moyize le Aron gwəɗəŋənji ntiŋə ghə mbe hɛɗi,

¹¹ma ke Moyize sha Aron: «Kelete wəsə ketere 'wərdə ta ŋa, ntate ghwə nya reghwetɛ te, kwərə kwərəaghe 'wərdə kənə shɛ na lə kahe kahe sha mbeli kezha ɓela gəsəkə yaɓe jaɗafa kənəa hɛ. Kwa nza ŋkɛ ne, nahe Mahwətə kehwepete wənə, nahe ndiremi nya wəba keghate geva.»

¹²Laŋe Aron te wəsə ketere 'wərdəa ŋkɛ kala nya gezave nda Moyize, tereŋe ŋkɛ te hwɛ kalə kadzehwa mbeli, te ŋkwa nya ghate geva ndiremi nya wəba. Pa ŋkɛ terekɛ 'wərdə ba'a ɓelate gəsəkəa yaɓe jaɗafa kənəa mbeli.

¹³Ghereŋe ŋkɛ kwelɛ tepe ta mbeli nyi kempə mpə le nyi teghweme. Tagha gɛ, pa ndiremi nya wəba kiɗinyɛ.

¹⁴Ma mbeli nyi kempə va ndiremi nya wəba shɛ ne, mbeli 14.700, kaɗema mbeli nyi yitea Korɛ nyi kempənji vəashi hwa hɛ.

¹⁵Pa Aron zhɛneke geva kase sha Moyize mɛa cɛ lekwesa kebegeme geva, kiɗima ta ndiremi nya wəba.

¹⁶Ma ke Mahwətə sha Moyize:

¹⁷«Geze nda ke ka Israyɛl kezha keleke ŋa geta yayata wəndə nya te ghəa yita, geze ta ŋkɛ, geta meŋe bakeghəmbe. Katerafe sləa yayata yita na te geta ta ŋkɛ.

¹⁸Ma te geta ta yita ta Lɛvi ne, sləa Aron yaterafe na, kwa nza ŋkɛ geta kwetɛŋe nde tenza te yayata wəndə nya te ghəa yita.

¹⁹Katebete geta shɛhɛ na mbe cɛ lekwesa kebegeme geva, kwa kema ta səndəkwəa jikə geva, te ŋkwa nya ncɛ ŋayɛ ghəa ɗa 'ya.

²⁰Ma wəndə nya tenta 'ya ne, kateɗa geta ta ŋkɛ. Ma tsagha gɛ, katefɛamte ghena nyi geze ka Israyɛl te gheyɛ 'ya.»

²¹Pa Moyize ɓelate nda ghena shɛhɛ ke ka Israyɛl. Tagha gɛ, pa pɛtɛa mbeli nyi te ghəa yɛ yita ndendeke nda geta, geta kwetɛŋe te yita, geze ta ŋkɛ, geta meŋe bakeghəmbe zlaɓe le ŋa Aron.

²²Pa Moyize beteyi geta shɛhɛ kwa kema ta Mahwətə mbe cɛ lekwesa nya nza səndəkwəa jikə geva.

²³Ma te hendɛ ta ŋkwa, kwa dzembe cɛ lekwesa nya nza səndəkwəa jikə geva mbe Moyize ne, pa ŋkɛ nakɛ keɗa ɗa geta ta Aron nya kwa yita ta Lɛvi: keɗa ɗa ŋkɛ, nahe nde kebetete ghwə ba'a ya nyi kala ya ta vegeme ya kenehe nehe te.

²⁴Pa Moyize fəakave geta shɛhɛ mbe cɛ lekwesa kezha ncɛ nda hɛ ke ka Israyɛl. Pɛtɛa nci kenakɛ hɛ, pa yayata wəndə nya te ghə zhɛne kakelete geta ta ŋkɛ.

²⁵Ma ke Mahwətə sha Moyize: «Zhɛneyi geta ta Aron kwa səndəkwəa jikə geva, yitea wəmbəyi geva ŋkɛ kawəsə kencɛ wəsə kaŋa ka fama ghena. Ma tsagha ne, katefɛamte ghena nyi geze hɛ te 'ya na ba'a katempə hɛ we.»

²⁶Tserame Moyize menete wəshi nyi gezave nda Mahwətə.

²⁷Ma ke ka Israyɛl sha Moyize: «Nahe ŋa n'yɛ! Mbeli nyi keza za ghen'yɛ pɛtɛ, mbeli nyi keza za ghen'yɛ pɛtɛ!

²⁸Ma yayata wəndə nya kehendave nda geva ke cɛ lekwesa ta Mahwətə ne, kamte ŋkɛ! Ghen'yɛ katempə pɛtɛ tse gɛ na?»