Read kapsiki Ɓela 19 Bible Online

Ɓela 19 - kapsiki bible

Ɓela 19

¹Ma ke Mahwətə sha yɛ Moyize le Aron:

²«Wa nyi wəshi nyi geze wəsə mahalegəa ɗa, 'ya Mahwətə nyi: Geze nda mə ke ka Israyɛl kezha keleke ŋayɛ ŋemalea sla kwa gheme, nya ɗema beze te ba'a nya ghama sheghwə te welɛ ve hɛ.

³Kateve nda ŋkɛ yɛ ke nde dzeghe Shala Ɛlazar. Kateŋka ŋkɛ ŋkɛ shave mbe ghedəkwə ba'a katesla ghə mbeli yite kwa ntsə ta ŋkɛ.

⁴Katemene mimia ŋkɛ Ɛlazar te wəzege ta dzeve ba'a kateyisə ŋkɛ ŋkɛ mberefaŋe zhigə jive laka mɛa cɛ lekwesa kebegeme geva.

⁵Kwa sebe ta ŋkɛ ne, katetere sla shɛ mbeli cɛhwa cɛhwa kwa ntsə ta ŋkɛ: hweta, sli, mimi ba'a wəshi nyi kwa hwə.

⁶Katekele sheghwəa lekeleke, dzeve ta wəfe nya heka mbeli kaizope ba'a shintia təmə nyi kefi fi le yirə kwa ghɛmɛ nde dzeghe Shala. Katebete hɛ ŋkɛ te ghwə nya tere geva nya sla te.

⁷Kwa sebe ta ŋkɛ ne, katetsewe yɛ lekwesa ta ŋkɛ ba'a katepɛ nde dzeghe Shala nda tezhɛne geva ŋkɛ kadzembe ghedəkwə. Ama wale wale tenza ŋkɛ pa va tɛhwɛɗi.

⁸Ma wəndə nya keteremte sla shɛ ne, katetsewe yɛ lekwesa ta ŋkɛ ŋkɛ ba'a katepɛ ŋkɛ. Ama wale wale tenza ŋkɛ pa va tɛhwɛɗi.

⁹Katefə pəsəɗəa sla shɛ wəndə nya wɛŋe ba'a katebete ŋkɛ te ŋkwa nya wɛŋe pelɛke te wəmbəa ghedəkwə. Katewəmbə pəsəɗəa shɛ pɛtɛa ka Israyɛl kezha nta hwa yɛmə keyaɓe ŋkwa wɛŋe. Gheŋkɛ ya kamelɛ keyaɓe jaɗafa.

¹⁰Ma wəndə nya kefəmte pəsəɗəa shɛ ne, katetsewe yɛ lekwesa ta ŋkɛ perə. Ama wale wale tenza ŋkɛ pa va tɛhwɛɗi. Kawəsə mahalegə nya kaghala ghala tenza ŋkɛ kaŋa Israyɛl ba'a kaŋa ka se se nyi hwa hɛ.

¹¹Ma yayata wəndə nya kekwaɗakɛ wəndə kemte mte ne, wale wale nza ŋkɛ kashikwə zake.

¹²Ma te kwa mahekene ta hɛ ba'a te kwa mberefaŋe ta hɛ ne, kateyaɓe ghəa ŋkɛ ŋkɛ wɛŋe le yɛmə keyaɓe ŋkwa. Ama keɗema ŋkɛ keyaɓemte ghəa ŋkɛ wɛŋe te kwa mahekene ta hɛ ba'a te kwa mberefaŋe ta hɛ ne, wale wale nza ŋkɛ.

¹³Ma yayata wəndə nya kekwaɗakɛ wəndə kemte mte nda peleyite se ŋkɛ yitea yaɓe ghəa ŋkɛ ne, nahe ŋkɛ kezhɛrete cɛ lekwesa ta Mahwətə wale wale. Kateŋkamte geva ŋkɛ shave hwa ka Israyɛl. Ma va nya ɗema yɛmə keyaɓe ŋkwa wɛŋe keyisəaghe geva kənə ne, wale wale nza ŋkɛ.

¹⁴Wa nya kwete nya wəsə mahalegə: Ma kemte wəndə mbe cɛ lekwesa ne, wale wale nza yayata wəndə nya kedzembe cɛa shɛ ba'a yayata wəndə nya mbe kashikwə zake.

¹⁵Ma kenza wəsə kebete wəshi meghwəlimə, kaɗema wəsə keŋzlame geva megela mɛ mbe ne, wale wale nza wəsə nya kwa.

¹⁶Ma kedzeghwave nda dzeghwa wəndə vəkə ke wəndə kemte mte nya kemtenyɛ va kafayɛ keɗema nya kemtenyɛ gəmə, ke 'yɛ'yɛa wəndə ŋelɛ keɗema ke kwele kwamte hwa gamba ne, wale wale nza ŋkɛ kashikwə zake.

¹⁷Ma kezha yaɓe wəndə nya wale walea shɛ ne, katenta pəsəɗəa sla nya dzeghekɛ geva melɛ keyaɓe jaɗafa mbeli. Katebete pəsəɗəa shɛ mbeli kwa kwenə ba'a kategə yɛməa ɗasle mbeli yite.

¹⁸Katekele dzeve ta wəfe nya heka mbeli kaizope wəndə nya wɛŋe kezha selame hwa yɛməa shɛ. Kateyisə ŋkɛ te cɛ lekwesa ba'a te wəshi nyi mbe, tsagha te mbeli nyi mbe keɗema te wəndə nya kekwaɗakɛ 'yɛ'yɛa wəndə ŋelɛ, wəndə nya kemte va kafayɛ, nya kemtenyɛ gəmə keɗema kwele.

¹⁹Kateyisə wəndə nya wale walea shɛ wəndə nya wɛŋe te kwa mahekene ta hɛ ba'a te kwa mberefaŋe ta hɛ. Katenza ŋkɛ wɛŋe va jaɗafa ta ŋkɛ te kwa mberefaŋe ta hɛ. Katetsewe yɛ lekwesa ta ŋkɛ ŋkɛ ba'a katepɛ ŋkɛ. Menema ta tɛhwɛɗi ne, wɛŋe tenza ŋkɛ.

²⁰Ama wəndə nya wale wale nya keɗema keyaɓemte ghəa ŋkɛ wɛŋe ne, kateŋkamte geva ŋkɛ shave hwa tsene ta ka Israyɛl. Kwa nza ŋkɛ ne, ŋkwa nya keveyi geva tekeleke kaŋa Mahwətə yazhɛrete ŋkɛ wale wale. Ma va nya ɗema yɛmə keyaɓe ŋkwa wɛŋe keyisəaghe geva kənə ne, wale wale nza ŋkɛ.

²¹Kawəsə mahalegə nya kaghala ghala tenza ŋkɛ kaŋa nci. Ma wəndə nya keyisə yɛmə keyaɓe ŋkwa wɛŋe nya ne, katetsewe yɛ lekwesa ta ŋkɛ ŋkɛ. Ma wəndə nya kekwaɗakɛ yɛmə keyaɓe ŋkwa wɛŋea shɛ ne, wale wale tenza ŋkɛ pa va tɛhwɛɗi.

²²Ma yayata wəsə nya kwaɗakɛ wəndə nya wale wale ne, wale wale tenza ŋkɛ. Ma yayata wəndə nya kekwaɗakɛ wəndə nya wale wale ne, wale wale tenza ŋkɛ pa va tɛhwɛɗi.»