Read kapsiki Ɓela 20 Bible Online

Ɓela 20 - kapsiki bible

Ɓela 20

¹Pa pɛtɛa ka Israyɛl ntsehe te ɓerama ta Tsin mbe kwa ghate ta tere, pa hɛ nzanji mbe Kadɛs. Tagha mtenyɛ Miriyam ba'a lamte geva nde.

²Ma kwa ɗema yɛmə va mbeli ne, pa hɛ tseneyite geva yitea yɛ Moyize le Aron.

³Ntake hɛ kaghəpə le Moyize, ma ke hɛ: «Va wa ɗema n'yɛ kempə n'yɛ, vəa ŋkwa mpənji ka menəhɛ n'yɛ kwa kema ta Mahwətə tse wa!

⁴Kezha wa fəke mbelia Mahwətə yɛ teke te ɓerama nya wa? Kezha mpə n'yɛ te, ghen'yɛ ba'a wəshi keseɗa ta n'yɛ na?

⁵Va wa fəakave n'yɛ yɛ mbe Ɛzhipte ba'a fəke n'yɛ yɛ kadzete ŋkwa nya ndiremi nya wa? Ŋkwa nya nza mbeli katsawete wəshi te ŋkɛ we. Yɛ dasekwa, yɛ rɛzɛŋe, yɛ kwakweme shɛ te we. Ya yɛmə kesa ne, kenza te we.»

⁶Pa yɛ Moyize le Aron slənji yitea mbeli nyi ketsenete geva kezha lə kadzemɛa cɛ lekwesa kebegeme geva. Gwəɗəŋə hɛ gwəɗəŋənji ntiŋə ghə mbe hɛɗi. Tagha gɛ, pa zləvəa Mahwətə ncɛte nda geva ke hɛ.

⁷Ma ke Mahwətə sha Moyize:

⁸«Kelete geta ta ŋa, kwa sebe ta ŋkɛ, tsenete mə pɛtɛa ka Israyɛl, gha le wəza meyɛ ŋa Aron. Kwa ntsə ta nci ne, kategeze nda ghena yɛ ke keleɓa nya kezha hwɛ yɛmə shave mbe. Kaganda ne, katentsa yɛmə na shave mbe keleɓa nya kezha sa pɛtɛa ka Israyɛl ba'a wəshi keseɗa ta nci!»

⁹Pa Moyize kelete geta ta ŋkɛ nya kwa kema ta Mahwətə kala ghena nya gezave nda ŋkɛ.

¹⁰Pa yɛ Moyize le Aron tsenete pɛtɛa ka Israyɛl kwa kema ta keleɓa. Ma ke Moyize sha hɛ: «Fa mə gɛ, gheyɛ nyi kaka fama ghena! Wərə ghen'yɛ kantsake yɛmə shave mbe keleɓa nya kezha gheyɛ na?»

¹¹Pa Moyize kafete dzeve ba'a mpave keleɓa bake zhigə le geta. Tagha gɛ, mpəɗə yɛmə ntsake geva shave mbe. Pa pɛtɛa ka Israyɛl sakɛ, tsagha wəshi keseɗa ta nci.

¹²Ama ma ke Mahwətə sha yɛ Moyize le Aron: «Ma va nya ɗema yɛ kevate ghə te ghena ta ɗa, nya ɗema yɛ kese kancɛ nda ke ka Israyɛl 'ya ya kaShala nya kaganda ne, katefə mbeli nyi yɛ kadzete hɛɗi nya ve nda 'ya ke hɛ we.»

¹³Ma va wəsə nya kemenete geva nya ne, yɛməa Mɛriba ke mbeli sha yɛməa shɛ, geze ta ŋkɛ, “Yɛməa ghəpə”. Kwa nza ŋkɛ ne, te ŋkwa shɛ se ka Israyɛl kaghəpə le Mahwətə. Pa ŋkɛ ncɛte gheŋkɛ ya kaShala nya kaganda tagha.

¹⁴Se mbe Kadɛs ne, pa Moyize ghwenakɛ nda mbeli ke meghea ka Ɛdom. Ma ke hɛ shɛ: «Wa nya ghena nya geze ka menəhɛ ŋa nyi kaka Israyɛl nya: Nahe na keɗepe pɛtɛa yaka nyi kese te ghen'yɛ.

¹⁵Nahe ka shihɛ n'yɛ kedzawanji kwa Ɛzhipte nya teməhwe temə n'yɛ kwagha. Nahe ka Ɛzhipte kasahwe n'yɛ yaka, ghen'yɛ le ka shihɛ n'yɛ.

¹⁶Nahe ghen'yɛ ketsave nda lewela ke Mahwətə ba'a nahe ŋkɛ kefate lewela ta n'yɛ. Nahe ŋkɛ keghwenakɛ nde ghwene ta ŋkɛ kezha fə n'yɛ shave mbe Ɛzhipte. Wa nyi ghen'yɛ nyi tsetsenya mbe Kadɛs, meleme nya kwa ghala ta hɛɗia ŋa.

¹⁷Pelave n'yɛ hweŋkwa kajive mbe hɛɗia ŋa. Katejive n'yɛ mbe yɛ wəve nyi kewəza wəza ya mbe yɛ wəvea rɛzɛŋe we. Katesa yɛmə n'yɛ kwa yɛ ghwa we. Hweŋkwa nya beŋwe yatedzeghwa n'yɛ kwa, kaɗema n'yɛ kasame kwa jive laka bela kwa zeme ya laka bela kwa gwela nda tejive n'yɛ n'yɛ mbe hɛɗia ŋa.»

¹⁸Ma ke meghea ka Ɛdom zhɛnete: «Kajive yɛ mbe hɛɗia ɗa we. Ma kedzeghakɛ yɛ ne, kateha ŋayɛ mpa 'ya!»

¹⁹Ma ke ka Israyɛl shɛ: «Hweŋkwa yatedzeme ghen'yɛ kwa. Ma kesakɛ yɛməa ŋa n'yɛ le wəshi keseɗa ta n'yɛ ne, kateŋki ŋa ŋkɛ n'yɛ. Deke jive n'yɛ mbe hɛɗia ŋa ya'yɛwe ghen'yɛ va gha.»

²⁰Ama ma ke meghea ka Ɛdom zhɛnete: «Katejive yɛ we!» Kwa sebe ta ŋkɛ ne, mpəɗə ka Ɛdom se sha ka Israyɛl le ka sewajɛ nyi berete berete kwele kwele.

²¹Tagha gɛ, pa ka Ɛdom ɗema pele ka Israyɛl kajive mbe hɛɗia nci. Cape ka Israyɛl jive kwa kwete hweŋkwa.

²²Pa pɛtɛa ka Israyɛl slənji mbe Kadɛs ba'a dzemenji hwa ghweme ta Hor.

²³Ma ke Mahwətə sha yɛ Moyize le Aron hwa ghweme ta Hor nya kwa ghala ta Ɛdom:

²⁴«Takwa takwa Aron katemte. Katedzete hɛɗi nya ve nda 'ya ke ka Israyɛl ŋkɛ we. Kwa nza ŋkɛ ne, nahe yɛ keɗema fa ghena ta ɗa mbe Mɛriba.

²⁵Ma gha gɛ Moyize, hekaghe yɛ Aron le wəzege ta ŋkɛ Ɛlazar kadzeme ghəa ghweme ta Hor.

²⁶Kateseɗemte yɛ lekwesa slene ta ŋkɛ na kənəa Aron ba'a kateseɗe nda hɛ na ke wəzege ta ŋkɛ Ɛlazar. Tagha temte Aron.»

²⁷Pa Moyize menete kala nya gezave nda Mahwətə. Pa hɛ dzeme ghweme ta Hor kwa ntsə ta mbeli pɛtɛ.

²⁸Pa Moyize seɗemte yɛ lekwesa kənəa Aron ba'a seɗete nda hɛ ke wəzege ta ŋkɛ Ɛlazar. Mtiwə Aron tagha, kwa ghəa ghweme. Kwa sebe ta ŋkɛ, pa yɛ Moyize le Ɛlazar sawanji pelɛ ghweme.

²⁹Ma kwa fate ka Israyɛl nahe Aron kemte ne, pa hɛ nehwenekɛ ŋkɛ kahɛ mahekenemsə.