Read kapsiki Ɓela 24 Bible Online

Ɓela 24 - kapsiki bible

Ɓela 24

¹Nahe Balam kefave zeɗehwe nda ŋkɛ ke Mahwətə kawəpi ka Israyɛl. Kese ŋkɛ kalə kazele ghena nyi kese va Shala kala nya te kweci və we, ama pa ŋkɛ zhɛrete geva laka ɓerama.

²Ma newe ke sha ŋkwa ne, dəkwə ŋkɛ te ka Israyɛl nyi kenzanji keyita keyita. Tagha gɛ, pa Sefəa Shala dzembenyɛ mbe,

³ma ke gezete ghena ŋela: «Wa nya ghena nya geze 'ya, 'ya Balam, wəzege ta Bɛyor, 'ya nya kawəndə nya kenewe ŋkwa tiɗiɗi,

⁴'ya nya kefa ghena nyi geze Shala, 'ya nya kenewe wəshi nyi ncɛ ɗa Nde berete, 'ya nya kehawe ve vəa ŋkwa nya ncɛ ghəa ŋkɛ ŋkɛ nya:

⁵Wa nyi ganji va cɛ lekwesa ta mbelia Zhakob, va ghɛa ka Israyɛl wa!

⁶Nahe hɛ kenza yimə kala hələ nyi kehwɛ, kala ntsa nyi dzeyi mɛa hələ, kala neha ghwemezhi ganji nyi mɓete Mahwətə, kala lekeleke nyi dzeyi mɛa yɛmə.

⁷Kala yɛmə nya kehwɛ same kwa ghwa kezha ɓasle yɛ wəve megela hɛ. Katehərə Agag meghea ka Israyɛl, katemtsehe berete ta hɛɗia nci.

⁸Nahe Shala kefəakave hɛ shave mbe Ɛzhipte. Kala sla gamba berete nya mbe. Kazeme yɛ hɛɗia ka ghema ta nci hɛ, kampə 'yɛ'yɛa nci hɛ ba'a kahe hɛ hɛ le yɛ have ta nci.

⁹Kacɛcɛfɛakwe hɛ kala yɛ nivɛrə, kaɓeɓelahe hɛ kala yɛ deghwavaŋwe. Wa nde nza kaŋkate hɛ sate te ŋkwa wa? Ka Israyɛl, kewəpi wəpi wəndə nya ketewəpi ŋayɛ, kebezla bezla nza wəndə nya ketebezla ŋayɛ!»

¹⁰Mɓɛke Balak hwepete nda wənə ke Balam. Ɓeratse ɓeratse ke sha dzeve, ma ke shɛ: «Nahe 'ya kehekake ŋa kezha bezla ka ghema ta ɗa, ama kakwa mahekene zhigə ne, nahe na kewəpikɛ hɛ!

¹¹Ma tsetsenya gɛ ne, kwiɗi ŋa sha hɛɗia ŋa! Nahe 'ya kemeɗeyi ŋa kezha teve zləvə te gha, ama nahe Mahwətə kendaŋete ŋa te!»

¹²Ma ke Balam zhɛnete nda ke Balak: «Ndagwara ma 'ya gezete nda ke mbeli nyi ghweneghe ɗa na:

¹³Ya Balak fəave ɗa mze kwa tɛawetɛa ba'a mze kwa tere tere nyi ki ghɛa ŋkɛ pɛtɛ ne, kateshɛ 'ya dzawa wəmbəa ghena nyi gezete Mahwətə kezha mene wəsə ganyɛ keɗema wəsə kwa ndiremi we. Deke ghena nya tegeze ɗa Mahwətə yategeze 'ya.

¹⁴Ma tsetsenya gɛ ne, 'ya katelə ɗa sha mbelia ɗa. Ama nde, 'ya kaɗe kageze ŋa wəsə nya temene nda ka Israyɛl ke mbelia ŋa te kwete hɛ.»

¹⁵Ma ke Balam gezete ghena: «Wa nya ghena nya geze 'ya, 'ya Balam, wəzege ta Bɛyor, 'ya nya kande kelɛŋə,

¹⁶'ya nya kefa ghena nyi geze Shala, 'ya nya keɗepe zəzə ta Shala tehwə ghweme, 'ya nya kenewe wəshi nyi ncɛ ɗa Nde berete, 'ya nya ghwene ntsə ta ɗa vəa ŋkwa nya ncɛ ghəa ŋkɛ ŋkɛ nya:

¹⁷Kanewe newe wəsə nya ketese 'ya, ama kenza kaŋa tsetsenya we. Kanewe newe wəsə nya ketemene geva 'ya, ama te kwete hɛ temene geva ŋkɛ. Saseregwa kanca hwa hwelefefia Zhakob, wəndə nya te ghə kashave hwa ka Israyɛl. Le geta meghea ŋkɛ ne, katempempa ka Mowab ŋkɛ yitea ghereslɛ, kateza sebe ŋkɛ te hwelefe ta Sɛt te hɛɗi.

¹⁸Katekele hɛɗia Ɛdom ŋkɛ, kahɛɗi nya kekelehwe geva tenza Sɛyir sha ka ghema ta ŋkɛ. Katehərə ŋkwa ka Israyɛl.

¹⁹Katehərə ka ghema ta ŋkɛ wəndə nya keshave mbe Zhakob. Kateza sebe ŋkɛ te mbeli nyi ketene mbe meleme.»

²⁰Ma kwa sebe ta ŋkɛ, dəkwə Balam te Amalɛk, ma ke gezete ghena: «Wa nya Amalɛk, hɛɗi nya berete ma nya. Ama te kwete hɛ ne, pɛtɛ tenza ŋkɛ kakwəfi.»

²¹Pa ŋkɛ nakɛ hwelefefia Kayin ɓiyitsa, ma ke gezete ghena: «Ma gheyɛ hwelefefia Kayin ne, gwezlayɛ yɛ te hɛɗia ŋayɛ, kala wəsə nya kwa ghɛa 'yɛ nya te keleɓa.

²²Ndagwara kateteremte geva ghɛa ŋayɛ, ba'a ne, katefəhwe ŋayɛ ka Asiri.»

²³Kakwa keɗaŋe ne, ma ke Balam mtsehete: «Aya! Wa nde tenza kazereghete ɗa ta Shala wa?

²⁴Katese yɛ kwambelə mbe Shipre. Katesa nda yaka hɛ ke ka Asiri ba'a ke hwelefefia Ɛbɛr. Ama ghenci perə ne, kateza sebe te hɛ.»

²⁵Ma kwa sebe ta ghena nyi ne, cape Balam kwa hweŋkwa kalə sha hɛɗia ŋkɛ. Cape Balak laka ŋa ŋkɛ ŋkwa perə.