Read kapsiki Ɓela 28 Bible Online

Ɓela 28 - kapsiki bible

Ɓela 28

¹Ma ke Mahwətə sha Moyize:

²«Wa nya ghena nyi tegeze nda na ke ka Israyɛl nya: Ntsehwele mə yitea wəshi gəmə nyi tefə ɗa yɛ te və nyi kenteyi geva, geze ta ŋkɛ wəshi kezeme ta ɗa nyi tere yɛ. Zeɗehwe ɗa tenza n'yia nci nya kezəŋwə megela.

³Ma pa na sha tegeze nda ke hɛ: Wa nyi wəshi kezeme nyi teve nda yɛ ke Mahwətə nyi: keveci keveci ne, zhɛgwəa lɛməa timɛti nyi same va bake, nyi ɗema beze te hɛ kezha melɛ kwa tere tere nya kaghala ghala.

⁴Katedzeghe melɛ mbeli le kwa ghate ta zhɛgwə masheke. Ma kwa bake ne, hetɛhwɛɗi,

⁵zlaɓe le kiləwəa hə mahekene, nya kehwaɗe hwaɗe le n'yi ganyɛ kalitrə kwetɛŋe ba'a kwete gasle mbe.

⁶Ma melɛ kwa tere tere nya keveci keveci nya ne, kanya kwetɛŋe tenza ŋkɛ le nya se mbeli kadzeghe ɗa pelɛ ghweme ta Sinay. Zeɗehwe ɗa tenza n'yia ŋkɛ nya kezəŋwə megela, 'ya Mahwətə.

⁷Katekele tɛ mbeli kalitrə kwetɛŋe ba'a kwete gasle mbe kase yitea kwa ghate ta zhɛgwəa təmə. Kateɓasle ɗa tɛa shɛ mbeli mbe ŋkwa nya keveyi geva tekeleke, 'ya Mahwətə.

⁸Katedzeghe melɛ nya hetɛhwɛɗi mbeli le kwa bake ta zhɛgwəa təmə, wəshi nyi kwetɛŋe ka tenza yite le nya masheke. Zeɗehwe ɗa tenza n'yia ŋkɛ nya kezəŋwə megela, 'ya Mahwətə.

⁹Ma te veci kezhɛne mpi ne, katedzeghe melɛ mbeli le zhɛgwəa lɛmə timɛti nyi same va bake, nyi ɗema beze te hɛ, zlaɓe le wəsə gəməa hə nya kehwaɗe hwaɗe le n'yi kakiləwə ŋkwaŋe ba'a wəsə gəməa tɛ.

¹⁰Ma te yayata veci kezhɛne mpi ne, katemtsehe geva melɛ kwa tere terea shɛ kadzeyitea melɛ nya keveci keveci ba'a kadzeyitea wəsə gəməa tɛ nya yite.

¹¹Ma te kwa ghate ta hɛa yayata tere ne, katedzeghe ɗa melɛ kwa tere tere yɛ, 'ya Mahwətə le mcɛmcɛli bake, game lɛmə ba'a zhɛgwəa lɛmə timɛti nyi same va mberefaŋe, pɛtɛa nci kawəshi keseɗa nyi ɗema beze te hɛ.

¹²Ma yitea yayata wəsə keseɗa ne, katekele wəsə gəməa hə nya kehwaɗe hwaɗe le n'yi mbeli kase: kiləwə mesli yitea mca, kiləwə ŋkwaŋe yitea game

¹³ba'a kiləwə mahekene yitea zhɛgwəa təmə. Zeɗehwe ɗa tenza n'yia melɛ kwa tere tere nyi kezəŋwə nyi megela, 'ya Mahwətə.

¹⁴Katekele wəsə gəməa tɛ mbeli kase perə: litrə mahekene yitea mca, litrə bake yitea game ba'a litrə kwetɛŋe ba'a kwete gasle mbe yitea zhɛgwə təmə. Nyi ya kamelɛ kwa tere tere nyi tedzeghe mbeli kala dzemɛa ghweme ta tere mbe va.

¹⁵Ɓiyitsa ne, katedzeghe ɗa melɛ mbeli, 'ya Mahwətə le zhɛfa kezha kele jaɗafa te wənə. Kadzeyitea melɛ kwa tere tere nya keveci keveci ba'a wəsə gəməa tɛ nya yite tedzeyite melɛa shɛ.

¹⁶Ma te kwa meŋe wəfaɗeghəmbe ta hɛa tere kwa ghate mbe va ne, katemene geva gəsəkəa Pake kazləvəa ɗa, 'ya Mahwətə.

¹⁷Ma kwa meŋe mcɛfeghəmbe ta hɛa terea shɛ ne, gheŋkɛ ya kagha ta gəsəkə. Katezeme ɗafa nyi ɗema tenjɛne hwe mbeli kahɛ mberefaŋe.

¹⁸Ma te kwa ghate ta hɛ ne, katemene geva tsene nya keveyi geva tekeleke. Slene nya dzawe shɛ katemene yɛ we.

¹⁹Katedzeghe nda melɛ kwa tere tere yɛ ke Mahwətə le mcɛmcɛli bake, game kwetɛŋe ba'a zhɛgwəa lɛməa timɛti nyi same va mberefaŋe, pɛtɛa nci kawəshi keseɗa nyi ɗema beze te hɛ.

²⁰Ma yitea yayata wəsə keseɗa ne, katekele wəsə gəməa hə nya kehwaɗe hwaɗe le n'yi mbeli kase: kiləwə mesli yitea mca, kiləwə ŋkwaŋe yitea game

²¹ba'a kiləwə mahekene yitea zhɛgwəa təmə.

²²Ɓiyitsa ne, katedzeghe melɛ keyaɓe jaɗafa mbeli le zhɛfa. Kwa sebe ta ŋkɛ, kateɓela gəsəkə keyaɓe jaɗafa mbeli kənəa gheyɛ.

²³Kadzeyitea melɛ kwa tere tere nya kala kiɗi ta ŋkwa tedzeyite pɛtɛa melɛa shɛhɛ.

²⁴Ma mbe hɛa gəsəkə nyi mberefaŋe ne, kateve ɗa wəsə kezeme yɛ keveci keveci, 'ya Mahwətə. Zeɗehwe ɗa tenza n'yia wəshi gəmə nyi kezəŋwə nyi megela. Katemtsehe hɛ yɛ yitea melɛ kwa tere tere nya keveci keveci ba'a wəsə gəməa tɛ nya yite.

²⁵Ma te kwa mberefaŋe ta hɛ ne, katemene tsene nya keveyi geva tekeleke yɛ. Slene nya dzawe shɛ katemene yɛ te vecia shɛ we.

²⁶Ma te veci nya temene ka ghate ta wəshi yɛ se te wəve ne, katekele nda ŋa ɗa wəsə gəməa wəshi nyi kakatese te wəve yɛ, 'ya Mahwətə, vəa ŋkwa gəsəkəa Pantekote. Katemene tsene nya keveyi geva tekeleke yɛ. Slene nya dzawe shɛ katemene yɛ we.

²⁷Katedzeghe ɗa melɛ kwa tere tere nya nza n'yia ŋkɛ nya kezəŋwə megela zeɗehwe ɗa, 'ya Mahwətə yɛ le mcɛmcɛli bake, game kwetɛŋe ba'a zhɛgwəa lɛməa timɛti nyi same va mberefaŋe.

²⁸Ma yitea yayata wəsə keseɗa ne, katekele wəsə gəməa hə nya kehwaɗe hwaɗe le n'yi mbeli kase: kiləwə mesli yitea mca, kiləwə ŋkwaŋe yitea game

²⁹ba'a kiləwə mahekene yitea zhɛgwəa təmə.

³⁰Ɓiyitsa ne, katedzeghe melɛ yɛ le zhɛfa yitea ɓela gəsəkəa yaɓe jaɗafa mbeli kənəa gheyɛ.

³¹Kadzeyitea melɛ kwa tere tere nya kala kiɗi ta ŋkwa ba'a wəsə gəməa hə nya yite tedzeyite pɛtɛa melɛa shɛhɛ. Wəshi keseɗa nyi ɗema beze te hɛ ba'a wəshi gəməa tɛ nyi yitea hɛ yatefə yɛ kase.