Read kapsiki Ɓela 3 Bible Online

Ɓela 3 - kapsiki bible

Ɓela 3

¹Wa nyi tsetse hwelefefia yɛ Aron le Moyize vəa ŋkwa nya gezete nda ghena Mahwətə ke Moyize pelɛ ghweme ta Sinay.

²Wa nyi sləa ŋwalea Aron nyi: Nadab nya katezhɛa wəzege, Abihəw, Ɛlazar ba'a Itamar.

³Nahe mbeli keveyi hɛ tekeleke kaka dzeghe Shala ba'a nahe hɛ keghate slene.

⁴Ama yɛ Nadab le Abihəw ne, nahe hɛ kempənji te kema ta ŋkwa nya keveyi geva tekeleke, va nya keleke ghwə nya wale wale hɛ kase kadzawa kema ta Mahwətə. Te ɓerama ta Sinay mpənji hɛ kaɗema ŋwale tezhili va hɛ. Deke yɛ Ɛlazar le Itamar ka se kadzeghe melɛ yitea yiteyɛa nci Aron.

⁵Ma ke Mahwətə sha Moyize:

⁶«Hekake hwelefefia ka Lɛvi shɛ na fəave nda hɛ kaka kemane ŋkɛ ke nde dzeghe Shala Aron.

⁷Katemene nda slene hɛ ke Aron ba'a ke pɛtɛa ka Israyɛl mɛa cɛ lekwesa kebegeme geva. Katemene slene ta cɛ lekwesa nya keveyi geva tekeleke hɛ.

⁸Katenewe ghweme hɛ te wəshi nyi mbe cɛ lekwesa kebegeme geva ba'a katemene slene hɛ mbe cɛ lekwesa nya keveyi geva tekelekea shɛ kezha ka Israyɛl.

⁹Katefə nda ka Lɛvi na ke yɛ Aron le ŋwalea ŋkɛ kambeli nyi kefəave nda geva ke hɛ. Kaganda ne, katefə nda geva hɛ ke hɛ shave hwa ka Israyɛl.

¹⁰Kateve yɛ Aron le ŋwalea ŋkɛ na mbe slene ta dzeghe melɛ ta nci. Ma wəndə ŋkwərə nya ketedzehwe ne, katepesle ŋkɛ mbeli.»

¹¹Ma ke Mahwətə sha Moyize zhɛkwa:

¹²«'Ya le ghəa ɗa nde ntave ka Lɛvi hwa ka Israyɛl kezha nza te ŋkwa tezhɛa kɛfia ka Israyɛl. Ma ka Lɛvi ne, ŋa ɗa hɛ.

¹³Kwa nza ŋkɛ ma yayata tezhɛa wəzege ne, ŋa ɗa ŋkɛ: ma te veci nya mpəmte ka tezhɛa kɛfia ŋwalea 'ya mbe Ɛzhipte ne, nahe 'ya keveyi tezhɛa kɛfia pɛtɛa ka Israyɛl tekeleke kaŋa ɗa. Ma tezhɛa kɛfia mbeli ba'a ŋa wəshi keseɗa ne, ŋa ɗa hɛ. 'Ya ya kaMahwətə.»

¹⁴Ma ke Mahwətə sha Moyize kwamte te ɓerama ta Sinay:

¹⁵«Rafete sləa ka Lɛvi keghɛ keghɛ ba'a kepelə kepelə. Katerafe zhili ba'a ŋwale tezhili nyi se te tere kwetɛŋe kajive mbe kema na.»

¹⁶Pa Moyize rafete sləa nci kala nya gezave nda Mahwətə.

¹⁷Wa nyi sləa ŋwalea Lɛvi nyi: Gɛrshon, Kɛhat ba'a Merari.

¹⁸Wa nyi sləa ŋwalea Gɛrshon nyi kepelə kepelə: yɛ Libni le Shimɛyi.

¹⁹Sləa ŋwalea Kɛhat kepelə kepelə: Amram, Isar, Hɛbron ba'a Əwziyɛl.

²⁰Sləa ŋwalea Merari kepelə kepelə: yɛ Mali le Məwshi. Nyi ya kaka hwelefefia Lɛvi nyi rafete geva sləa nci keghɛ keghɛ.

²¹Hwelefefia Gɛrshon: peləa Libni ba'a peləa Shimɛyi. Nyi ya kahwelefefia Gɛrshon.

²²Ma mbeli nyi rafete geva sləa nci, vəa ŋkwa nya ɓelate geva zhili ba'a ŋwale tezhili nyi se te tere kwetɛŋe kajive mbe kema ne, mbeli 7.500.

²³Ma hwelefefia Gɛrshon ne, kwetere wəmbəa cɛ lekwesa nya keveyi geva tekeleke nzanji hɛ, laka ŋkwa kepəkwə ta veci.

²⁴Ma wəndə nya te ghəa nci ne, Ɛliyasaf, wəzege ta Layɛl.

²⁵Ma slene nyi te dzeve va hwelefefia Gɛrshon mbe cɛ lekwesa kebegeme geva ne, slene ta ŋkwa mbe hwəa ŋkɛ, ŋkwa nya pelɛke te wəmbəa ŋkɛ, zlave nya kənə, mayafe nya mɛa ŋkwa kedzembe cɛ lekwesa kebegeme geva,

²⁶zlave nyi dzeyi yitea ŋwela nya yitea cɛ lekwesa kebegeme geva ba'a reghwetɛ, mayafe nya mɛa ŋkwa kedzeki ŋwela, tsagha zewe nyi kehi kezha hwepe cɛ lekwesa shɛ. Ghenci ka newe ghweme te pɛtɛa wəshia shɛhɛ.

²⁷Hwelefefia Kɛhat: peləa Amram, peləa Isar, peləa Hɛbron ba'a peləa Əwziyɛl. Nyi ya kahwelefefia Kɛhat.

²⁸Ma kwa ɓelate geva zhili ba'a ŋwale tezhili nyi se te tere kwetɛŋe kajive mbe kema ne, mbeli 8.600 ya shɛ kezha mene slene mbe ŋkwa nya keveyi geva tekeleke.

²⁹Ma hwelefefia Kɛhat ne, laka bela kwa zeme ta cɛ lekwesa nya keveyi geva tekeleke nzanji hɛ.

³⁰Ma wəndə nya te ghəa nci ne, Ɛlisafan, wəzege ta Əwziyɛl.

³¹Ma slene nyi te dzeve va hɛ ne, slene ta səndəkwə, tabele, wəsə kentare yɛ paterela, yɛ reghwetɛ, wəshi kemene slene nyi mbe ŋkwa nya keveyi geva tekeleke, tsagha mayafe nya mbe mbe. Ghenci ka newe ghweme te pɛtɛa wəshia shɛhɛ.

³²Ma wəndə nya te ghəa ka Lɛvi ne, Ɛlazar, wəzege ta nde dzeghe Shala Aron. Te dzeve ta ŋkɛ mbeli nyi kemene slene mbe ŋkwa nya keveyi geva tekeleke.

³³Hwelefefia Merari: peləa Mali ba'a peləa Məwshi. Nyi ya kahwelefefia Merari.

³⁴Ma mbeli nyi rafete geva sləa nci, vəa ŋkwa nya ɓelate geva zhili ba'a ŋwale tezhili nyi se te tere kwetɛŋe kajive mbe kema ne, mbeli 6.200.

³⁵Ma wəndə nya te ghəa hwelefefia Merari ne, Səwriyɛl, wəzege ta Abihayil. Pa hɛ nzanji laka bela kwa gwela ta cɛ lekwesa nya keveyi geva tekeleke.

³⁶Ma slene nyi te dzeve va hwelefefia Merari ne, sheghwə nyi slapesla slapesla ta cɛ lekwesa nya keveyi geva tekeleke, sheghwə nyi kejive mbe, yɛ seləa ŋkɛ ba'a wəshi kentare hɛ, tsagha pɛtɛa kweci wəshia ŋkɛ. Ghenci ka newe ghweme te pɛtɛa wəshia shɛhɛ.

³⁷Te dzeve ta nci selə nyi dzeyi yitea ŋwela ba'a wəshi nyi ntare hɛ mbeli te perə, tsagha wəshi nyi baŋe mbeli kwa hɛɗi ba'a yɛ zewe.

³⁸Pa Moyize ba'a yɛ Aron le ŋwalea ŋkɛ nzanji mɛa cɛ lekwesa kebegeme geva, laka ŋkwa kesame ta veci. Te dzeve ta nci slene nyi mbe ŋkwa nya keveyi geva tekeleke kezha ka Israyɛl. Ma wəndə ŋkwərə nya kehendeke nda geva ne, katepesle ŋkɛ mbeli.

³⁹Ma pɛtɛa ka Lɛvi, zhili ba'a ŋwalea tezhili nyi se te tere kwetɛŋe kajive mbe kema, kepelə kepelə, nyi rafete sləa nci yɛ Moyize le Aron kala nya gezete Mahwətə ne, mbeli 22.000.

⁴⁰Ma ke Mahwətə sha Moyize: «Ɓelate pɛtɛa ka tezhɛa kɛfia ka Israyɛl nyi se te tere kwetɛŋe kajive mbe kema ba'a rafete hɛ keslə keslə.

⁴¹Ma kwa sebe ta ŋkɛ ne, kateve ka Lɛvi na tekeleke kezha nza hɛ kaŋa ɗa, 'ya Mahwətə, te ŋkwa tezhɛa kɛfia ka Israyɛl. Tsagha shɛ ne, kateve wəshi keseɗa ta ka Lɛvi na tekeleke kezha 'ya te ŋkwa tezhɛa kɛfia wəshi keseɗa ta ka Israyɛl.»

⁴²Kala nya gezave nda Mahwətə ne, pa Moyize ɓelate tezhɛa kɛfia ka Israyɛl.

⁴³Ma pɛtɛa tezhɛa kɛfi nyi rafete geva sləa nci se te tere kwetɛŋe kajive mbe kema ne, mbeli 22.273.

⁴⁴Ma ke Mahwətə sha Moyize:

⁴⁵«Veyi ka Lɛvi tekeleke kaŋa ɗa, 'ya Mahwətə, te ŋkwa tezhɛa kɛfia ka Israyɛl. Tsagha shɛ ne, veyi wəshi keseɗa ta ka Lɛvi te ŋkwa tezhɛa kɛfia wəshi keseɗa ta ka Israyɛl.

⁴⁶Ma kezha mbeɗe tezhɛa kɛfia ka Israyɛl nyi gwəmsə bake ba'a mberefaŋemsə mahekeneghəmbe kənəa ɓela ta ka Lɛvi ne,

⁴⁷Katekele dəɓərəa mze kwa tɛawetɛa nya nza ɗaŋeɗa ta ŋkɛ gare meŋe kwa slibə ta bela ta kiləwə na mcɛfe te yayata wəndəa nci, kala nya mene slene mbeli le mbe ŋkwa nya keveyi geva tekeleke.

⁴⁸Kateve nda cɛdɛa shɛ na ke yɛ Aron le ŋwalea ŋkɛ. Tsetse tembeɗe tezhɛa kɛfi nyi kənəa hɛ mbeli.»

⁴⁹Pa Moyize kemave cɛdɛ te mbeli nyi ɗema mbeli keveyi ka Lɛvi te ŋkwa nci.

⁵⁰Pa ŋkɛ kemave cɛdɛa shɛ te tezhɛa kɛfia ka Israyɛl: kadəɓərəa mze kwa tɛawetɛa 1.365, kala nya mene slene mbeli le mbe ŋkwa nya keveyi geva tekeleke.

⁵¹Pa ŋkɛ fəave nda hɛ ke yɛ Aron le ŋwalea ŋkɛ, kala nya gezave nda Mahwətə.