Read kapsiki Ɓela 30 Bible Online

Ɓela 30 - kapsiki bible

Ɓela 30

¹Pa Moyize gezemte nda pɛtɛa ghena nyi gezave nda Mahwətə ke ka Israyɛl.

²Kwa sebe ta ŋkɛ ne, ma ke Moyize sha mbeli nyi te ghəa hwelefefia Israyɛl: «Wa nyi kweci ghena nyi gezete Mahwətə nyi:

³Ma vəa ŋkwa nya meɗeyi nda mɛ wəndə ke Mahwətə keɗema nya zemete fela wəndə kamenema kwete wəsə ne, katedzawa ŋkɛ wəmbəa ghena ta ŋkɛ we, ama nda ŋkɛ katseramete kala nya meɗeyi ŋkɛ.

⁴Ma kemenete nda meɗe mɛ keɗema kezemete nda fela degheli nya mba ki ghɛa yitenyɛ ke Mahwətə,

⁵ma kefate yitenyɛ nahe nde kemenete meɗe mɛ keɗema kezemete fela, nda ɗema ŋkɛ kegezete nda kwete ghena ne, nda nde kayipəyi meɗe mɛa nta keɗema fela ta nta kwa.

⁶Ama keɗema meɗe mɛa shɛ ba'a fela shɛ yitenyɛ te veci nya fate ŋkɛ ne, katemene wəshi nyi meɗeyi nde nde we. Katekelemte ŋkɛ Mahwətə te wənə, va nya ɗema yitenyɛ keyɛte.

⁷Ama kewəmeve za nde, kwa sebe ta nya menete meɗe mɛ keɗema nya zemete fela kwada nde,

⁸nda fate za nta, nda ɗema ŋkɛ geze nda kwete ghena te veci nya fate ŋkɛ ne, nda nde kayipəyi meɗe mɛa nta ba'a fela nya zemete nde kwa.

⁹Ama keɗema ghena shɛ za nta, te veci nya fate ŋkɛ ne, nahe ŋkɛ kebelewəmte meɗe mɛ nya menete nde ba'a fela kwada nya zemete nde. Katekelemte malea shɛ Mahwətə te wənə.

¹⁰Ma kenza nde male wede keɗema male nya ŋkamte za nta nde menete meɗe mɛ ne, nda nde kayipəyi meɗe mɛa nta kwa.

¹¹Ama nda male ta za nde menete meɗe mɛ keɗema nde zemete fela,

¹²ma kefate za nta, nda ɗema ŋkɛ geze nda kwete ghena ne, nda nde kayipəyi wəsə nya meɗeyi nde kwa.

¹³Ma kebelewəmte meɗe mɛa nta ba'a fela ta nta za nta te veci nya fate ŋkɛ ne, kateyipə hɛ nde kadzawa we. Katekelemte ŋkɛ Mahwətə te wənə, va nya belewəmte hɛ za nta.

¹⁴Ma yayata meɗe mɛ keɗema yayata fela nya zemete male kezha fɛa ghəa nta yitea kwete wəsə ne, wərə za nta kayɛte keɗema kabelewəmte wəsə nya meɗeyi nde.

¹⁵Ma keɗema za nta kegezete nda kwete ghena pa te hendɛ ta ŋkwa ne, nahe ŋkɛ keyɛte meɗe mɛa nta keɗema fela ta nta laka nzanyɛ ta ŋkɛ divə te veci nya fate ŋkɛ tsagha.

¹⁶Ama ketarete ŋkɛ kabelewə hɛ kwa sebe ta hɛ nya fate ŋkɛ ne, kwa ghəa ŋkɛ tenza fete ta male ta ŋkɛ.»

¹⁷Nyi ya kaghena nyi gezete nda Mahwətə ke Moyize te ghəa nza ta yɛ za le male ta ŋkɛ, keɗema te ghəa nza ta yɛ yita le wəzha ta ŋkɛ nya mba ki ghɛa ŋkɛ.