Read kapsiki Ɓela 32 Bible Online

Ɓela 32 - kapsiki bible

Ɓela 32

¹Ma yɛ hwelefefia Rəbɛn le ŋa Gad ne, kwele kwele ba'a zlɛazlɛake wəvəsəa wəshi keseɗa va hɛ. Ma kwa nakɛ hɛɗia Yazɛr ba'a hɛɗia Gala'ad hɛ ne, megela hɛ kezha wəshi keseɗa.

²Hwa'a hwelefefia Gad ba'a hwelefefia Rəbɛn sha Moyize, nde dzeghe Shala Ɛlazar ba'a mbeli nyi te ghəa mbeli. Ma ke hɛ sha hɛ:

³«Ma yɛ meleme ta Atarot, Dibon, Yazɛr, Nimra, Hɛshebon, Ɛlalɛ, Sebam, Nɛbo ba'a Bɛyon ne, zlaɓe hɛ

⁴le hɛɗi nya hərəte ka Israyɛl laka kemane ta Mahwətə. Megela hɛɗia shɛ kezha wəshi keseɗa. Ma ghen'yɛ ne, wəshi keseɗa ya va ghen'yɛ.»

⁵Ma ke hɛ mtsehete: «Ma kenza ŋkɛ nahe na keyɛte zəzə ta n'yɛ ne, ndeke n'yɛ hɛɗia shɛ kaŋa n'yɛ. Kelema n'yɛ na kajive kwete kema ta Zhəwrdɛŋe ma.»

⁶Ma ke Moyize zhɛnete nda ke hɛ: «Wa ŋkɛ wa? Gheyɛ ɗe kanza ŋayɛ teke vəa ŋkwa nya dzemte mpa ka menəhɛ ŋayɛ na?

⁷Yitea wa ɗe yɛ katamte geva ta ka Israyɛl kelə kadzete hɛɗi nya ve nda Mahwətə ke hɛ wa?

⁸Nahe ka yitehɛ ŋayɛ kemenete fete nya kala nya vəashi, vəa ŋkwa nya ghwenakɛ hɛ 'ya se mbe Kadɛs-Barnɛya kezha newe hɛɗia Kanan.

⁹Pa hɛ dzawa zlərəa Ɛshekol, pa hɛ newemte hɛɗia shɛ. Ma kwa zhɛneke geva hɛ ne, pa hɛ tamte geva ta ka Israyɛl kelə kadzete hɛɗi nya ve nda Mahwətə ke hɛ.

¹⁰Ma te vecia shɛ ne, mɓɛke Mahwətə hwepete wənə, ma ke zemete fela:

¹¹‹Wəndə shɛ hwa mbeli nyi keshave nyi mbe Ɛzhipte nya nza va ta ŋkɛ se te bakemsə kajive mbe kema katenakɛ hɛɗi nya meɗeyi nda 'ya ke Abraham, ke Izak ba'a ke Zhakob we, kwa nza ŋkɛ ne, nahe hɛ kese kagezleŋe ghə va ghena ta ɗa.

¹²Deke Kalɛb, wəzege ta Yefəwnɛ, kwa Yita ta Kenaz ba'a Zhozəwɛ, wəzege ta Nəwn, ka tedzembe, va nya ɗema hɛ kagezleŋe ghə va ghena ta ɗa 'ya Mahwətə.›

¹³Mɓɛke Mahwətə hwepete wənə va ka Israyɛl ba'a sərəakɛ hɛ kandeŋe te ɓerama kava wəfaɗemsə, pa te və nya zanji mbeli nyi kese kamene wəsə nya keɗema zeɗehwe nda ke Mahwətə.

¹⁴Ma gheyɛ tsetsenya ne, gheyɛ ɗe kazele sebe ta ka yitehɛ ŋayɛ, kala hwelefe ta ka jaɗafa kezha mtsehe geva ghwə ta hwepe wənəa Mahwətə kənəa ka Israyɛl gɛ na!

¹⁵Kwa nza ŋkɛ ma keɗema yɛ kahawe va Shala ne, katemtsehe hɛa ka Israyɛl ŋkɛ te ɓerama. Ma tsagha gɛ ne, nahe yɛ kezamte mbeli nyi pɛtɛ gɛ shi!»

¹⁶Pa mbelia shɛhɛ hendeke nda geva ke Moyize, ma ke hɛ shɛ: «Ewə! Ghen'yɛ kateŋa yɛ zlema ta timɛti teke ke wəshi keseɗa ta n'yɛ ba'a yɛ meleme kezha mbelia n'yɛ.

¹⁷Kwa sebe ta ŋkɛ, katefə wəshi kempa n'yɛ kahe kahe ba'a katedzete kema ta kweci ka Israyɛl n'yɛ kezha fə hɛ kadzete hɛɗi nya kendeke nda geva ke hɛ. Teke tenza mbelia n'yɛ mbe meleme nyi nza nyi zli yite, tewəfərə va mbeli nyi te hɛɗi nya.

¹⁸Katezhɛne geva ghen'yɛ kase keɗema yayata nde Israyɛl kekemave ŋa ŋkɛ bela ta hɛɗi we.

¹⁹Ama katekemave hɛɗi n'yɛ kala hɛ pelɛ kwete kema ta Zhəwrdɛŋe we, kwa nza ŋkɛ nahe ghen'yɛ kekemave ŋa n'yɛ laka bela nya, laka ŋkwa kesame ta veci yitea Zhəwrdɛŋe.»

²⁰Ma ke Moyize sha hɛ: «Menete wəsə nya gezete yɛ. Fə mə wəshi kempa ta ŋayɛ kalə kampa kwa kema ta Mahwətə.

²¹Jive kwete kema ta Zhəwrdɛŋe pɛtɛa mbeli nyi nza wəshi kempa va hɛ kwa kema ta Mahwətə. Pelɛagha nza hɛ, pa te və nya teŋkamte ka ghema ta ŋkɛ ŋkɛ te kema ta ŋkɛ.

²²Nza hɛɗi nya mbe dzeve ta ŋkɛ. Ma kwa sebe ta ŋkɛ ne, wərə yɛ kazhɛne geva kase sha ghɛa ŋayɛ. Kwa nza ŋkɛ ne, katenza yɛ kaka mene fete sha Mahwətə ba'a sha kweci ka Israyɛl we. Tagha gɛ, kaŋa ŋayɛ tenza hɛɗi nya te bela ta Zhəwrdɛŋe nya laka ɗe ta Mahwətə.

²³Ama keɗema yɛ kemenete kala nya ne, jaɗafa yatemene nda yɛ ke Mahwətə. Ɗepete mə megela, katefa ghwene nya mbe gheyɛ.

²⁴Ŋa mə yɛ meleme ke mbelia ŋayɛ ba'a yɛ zlema kezha timɛti ba'a kwia ŋayɛ. Ama zaghəyitema mene wəsə nya meɗeyi yɛ yɛ ma.»

²⁵Ma ke hwelefefia Gad ba'a ŋa Rəbɛn sha Moyize: «Kateyipə ghena nyi gezete na ka mene slene ta ŋa kadzawa nde sleke n'yɛ yawe.

²⁶Katenza mia n'yɛ ba'a ŋwalea n'yɛ, wəshi keseɗa ta n'yɛ ba'a wəshi keseɗa kefə wəshi ta n'yɛ teke, mbe yɛ meleme ta Gala'ad.

²⁷Ma ghen'yɛ le ŋa n'yɛ, katefə wəshi kempa ghen'yɛ pɛtɛ ba'a katedzemte ghen'yɛ kampa kwa kema ta Mahwətə, kala nya gezete na.»

²⁸Pa Moyize gezete nda ghena te ghəa nci ke nde dzeghe Shala Ɛlazar, ke Zhozəwɛ, wəzege ta Nəwn ba'a ke mbeli nyi te ghəa hwelefefia Israyɛl.

²⁹Wa nya ghena nya gezete nda ŋkɛ ke hɛ nya: «Ma kefəte wəshi kempa hwelefefia Gad ba'a ŋa Rəbɛn, kejive kema ta Zhəwrdɛŋe hɛ zlaɓe le gheyɛ, kadzemte hɛ kampa kwa kema ta Mahwətə, ma kekemanakɛ ŋayɛ hɛ kazləgwə hɛɗi ne, kateve nda hɛɗia Gala'ad yɛ kaŋa nci ke hɛ.

³⁰Ama keɗema hɛ kejive le wəshi kempa zlaɓe le gheyɛ ne, hwa gheyɛ tekemave ŋa nci hɛ hɛɗi te hɛɗia Kanan.»

³¹Ma ke hwelefefia Rəbɛn ba'a ŋa Gad zhɛnete ghwə yitea ghena shɛ: «Katemene wəsə nya gezete n'yɛ Mahwətə ghen'yɛ.

³²Katefə wəshi kempa ghen'yɛ ba'a katejive hɛɗia Kanan ghen'yɛ kwa kema ta Mahwətə. Ma tsagha ne, katekemave ŋa n'yɛ ghen'yɛ bela ta hɛɗi te bela ta Zhəwrdɛŋe nya.»

³³Pa Moyize ndeke nda hɛɗia Sihon, meghea ka Amor, ŋa Og, meghea Bashan, tsagha meleme ba'a hɛɗi nyi dzeyi yitea hɛ ke hwelefefia yɛ Gad le Rəbɛn, ba'a ke kwete bela ta hwelefefia Manasɛ, wəzege ta Zhozɛf.

³⁴Pa hwelefefia Gad zhɛne kaŋate yɛ meleme ta Dibon, Atarot, Arowɛr,

³⁵Atrot-Shofan, Yazɛr, Yogboha,

³⁶Bɛt-Nimra ba'a Bɛt-Haran. Pa hɛ ŋeŋeyite zli yitea hɛ ba'a ŋeŋate yɛ zlema kezha timɛti ba'a kwia nci.

³⁷Pa hwelefefia Rəbɛn zhɛne kaŋate Hɛshebon, Ɛlalɛ, Kiriyatayim,

³⁸Nɛbo, Ba'al-Mɛyon ba'a Sibma. Pa hɛ hekate nda kweci slə ke meleme nyi zhɛne hɛ kaŋate.

³⁹Pa hwelefefia Makir, wəzege ta Manasɛ lənji kadzete Gala'ad ba'a kelehwe hɛɗia shɛ. Pa hɛ ŋkamte ka Amor nyi te.

⁴⁰Tagha gɛ, pa Moyize ndeke nda Gala'ad ke Makir, wəzege ta Manasɛ nya kenzanyɛ te.

⁴¹Pa hwelefefia Yayir, kwete wəzege ta Manasɛ lənji kakelehwe yɛ ghedəkwəa ka Amor. Pa hɛ hekate nda slə ke hɛ kayɛ ghedəkwəa Yayir.

⁴²Kakwa keɗaŋe, pa Noba lə kakelehwe Kenat ba'a ghedəkwə nyi dzeyi yite. Pa ŋkɛ hekate nda sləa ŋkɛ nya kaNoba ke meleme shɛ.