Read kapsiki Ɓela 36 Bible Online

Ɓela 36 - kapsiki bible

Ɓela 36

¹Hwa'a kweci hwelefefia Zhozɛf, mbeli nyi te ghəa yita ta Gala'ad, wəzege ta Makir ba'a hwelefe ta Manasɛ se sha yɛ Moyize le mbeli nyi te ghəa hwelefefia Israyɛl.

²Ma ke hɛ: «Moyize, ma vəa ŋkwa nya gezave ŋa Mahwətə kanehe nda hɛɗi ke hwelefefia Israyɛl laka kwasheghediɗi ne, nahe Mahwətə kegezave ŋa perə kave nda ŋa wəza yiteyɛa n'yɛ Selofad bela ta hɛɗi ke ŋwalea kwɛa ŋkɛ.

³Ma kewəmeve mbeli nyi mbe kweci hwelefefia ka Israyɛl hɛ ne, kateŋamte geva ŋa nci bela ta hɛɗi seyi vare ŋa yita ta n'yɛ kezha mtsehe ŋa hwelefe nya tedzembe hɛ. Ma tsagha ne, kateŋamte geva hɛɗi nya kendeke n'yɛ geva laka kwasheghediɗi.

⁴Ɓiyitsa, ma te va kezlama ne, kateŋamte geva ŋa nci bela ta hɛɗi fəyitekeghə seyi vare ŋa yita ta n'yɛ kadzevare ŋa hwelefe nya tedzembe hɛ.»

⁵Kala ghena nyi gezete Mahwətə, ma ke Moyize gezave nda ghena nyi ke ka Israyɛl: «Kaganda ya va hwelefefia Zhozɛf nyi.

⁶Wa nya ghena nya gezete Mahwətə te ghəa ŋwalea kwɛa Selofad nya: Wərə hɛ kawəmeve mbeli nyi ɗe hɛ, ama nda ŋkɛ kanza kawəndə nya kwa yita ta yiteyɛa nci.

⁷Ma tsagha ne, kateslə hɛɗia ka Israyɛl mbe dzeve ta kwete yita kadzembe ŋa kwete we. Yayata nde Israyɛl kanza te hɛɗia yita ta ŋkɛ.

⁸Ma yayata wəzha makwa nya kekemave hɛɗi kawəsə kezeme ghɛ hwa hwelefefia Israyɛl ne, nda wəndə nya kwa yita ta yitenyɛ yatewəme nde. Ma tsagha ne, yayata hwelefe ta Israyɛl katezeme ghɛ yitea hɛɗia ka shihɛnyɛ.

⁹Ma tsagha gɛ ne, kateslə hɛɗi mbe dzeve ta kwete yita kadzembe ŋa kwete we. Yayata hwelefe ta Israyɛl kanza te hɛɗia ŋkɛ.»

¹⁰Pa ŋwalea kwɛa Selofad menete kala ghena nya gezave nda Mahwətə ke Moyize.

¹¹Pa Mala, Tirsa, Hogla, Milka ba'a Nowa wəmeve ŋwalea wəza yiteyɛa yiteyɛa nci.

¹²Pa hɛ wəmeve zhili nyi mbe hwelefefia ŋwalea Manasɛ, wəzege ta Zhozɛf. Ma hɛɗi nyi kemave nyi hɛ kawəshi kezeme ghɛ tsagha gɛ ne, va yita ta yiteyɛa nci nza hɛ.

¹³Nyi ya kaghena ba'a wəshi nyi gezave Mahwətə ke ka Israyɛl, laka Moyize, te ŋwela ta Mowab, mɛa Zhəwrdɛŋe ba'a kwa kema ta Zhɛriko.