Read kapsiki Ɓela 6 Bible Online

Ɓela 6 - kapsiki bible

Ɓela 6

¹Ma ke Mahwətə sha Moyize:

²«Ma pa na sha ka Israyɛl: Ma keɗe za keɗema male kameɗe kezha ve nda ghəa ŋkɛ tekeleke ke Mahwətə ne,

³katefɛa ŋkɛ yitea sa tɛ ba'a wəshi kesa nyi keghwəyi ŋkwa, katesa yayata wəsə kesa nya takɛ mbeli yitea rɛzɛŋe ŋkɛ we, katezeme rɛzɛŋe nyi njaɓa njaɓa keɗema nyi keghwele ghwele ŋkɛ we.

⁴Ma mbe vəa meɗe mɛa ŋkɛ ne, katezeme wəsə nya kese te wəfe ta rɛzɛŋe, ya ya nyi mbe ya ta ŋkɛ keɗema wəsə nya kənəa ya ta ŋkɛ ŋkɛ we.

⁵Mbe vəa meɗe mɛa ŋkɛ ne, kateŋsə ghəa ŋkɛ ba'a ghwɛmɛa ŋkɛ ŋkɛ we. Hwa'a te və nya kiɗi vəa ve ghə ta ŋkɛ tekeleke kaŋa Mahwətə ne, tekeleke tenza ŋkɛ. Katesərə shintia ghəa ŋkɛ ba'a ghwɛmɛa ŋkɛ ŋkɛ waɗe kaha.

⁶Ma mbe və nya veyi nda ghəa ŋkɛ ŋkɛ tekeleke ke Mahwətə ne, katehende geva ŋkɛ ke wəndə kemte mte we.

⁷Ya kezha wəndə kemte mtea yitenyɛ, meghekɛ, wəza meghekɛ, wəzha ta meghekɛ ne, katezhɛre ghəa ŋkɛ ŋkɛ wale wale we. Kwa nza ŋkɛ ne, nahe ŋkɛ keveyi geva tekeleke kaŋa Shala ta ŋkɛ, kala nya ncɛ shintia ŋkɛ nyi keŋsəmtema geva.

⁸Ma mbe pɛtɛa vəa meɗe mɛa ŋkɛa shɛ ne, tekeleke tenza ŋkɛ kaŋa Mahwətə.

⁹Ma kemtenyɛ wəndə vəkə vare gheŋkɛ, nahe nza ta ŋkɛ nya keveyi geva tekeleke kezhɛre wale wale. Kateŋsə ghəa ŋkɛ ŋkɛ te vecia yaɓe geva ta ŋkɛ wɛŋe. Te kwa mberefaŋe ta hɛ teŋsə ghə ŋkɛ.

¹⁰Ma te kwa deghese ta hɛ ne, katefə nda ghwəɗəŋkwə bake keɗema gheɗepe bake ŋkɛ kase ke nde dzeghe Shala, mɛa cɛ lekwesa kebegeme geva.

¹¹Katedzeghe melɛ kekele jaɗafa seyi te wənə nde dzeghe Shala le kwete. Nahe kwete kenza kezha melɛ kwa tere tere. Kwa sebe ta ŋkɛ ne, kateɓela gəsəkəa kelemte jaɗafa nya menete wəndəa shɛ laka kwaɗe wəndə kemte mte ŋkɛ kənəa wəndəa shɛ. Ma te vecia shɛ ne, katezhɛne ghəa wəndəa shɛ kanza tekeleke.

¹²Katezhɛne ŋkɛ kave ghəa ŋkɛ tekeleke kezha Mahwətə kala hɛ nyi sləyi ŋkɛ kaghate ba'a katekele game nya kemenete va kwetɛŋe ŋkɛ kase kezha dzeghe melɛ kedimə ghə. Kateɓela hɛ nyi kekiɗinji ŋkɛ va nya zhɛrenyɛ meɗe mɛa ŋkɛ wale wale we.»

¹³Wa nya ghena nya kegeze geva te ghəa ve geva tekeleke kaŋa Mahwətə nya: ma vəa ŋkwa nya kiɗinyɛ vəa meɗe mɛa ŋkɛ ne, katekele ŋkɛ mbeli kase kadzemɛa cɛ lekwesa kebegeme geva.

¹⁴Katefə nda wəshi keseɗa nyi ɗema beze te hɛ ŋkɛ mahekene kase ke Mahwətə kawəshi gəmə: Game nya same va kezha melɛ kwa tere tere, daɓa təmə nya same va kezha yaɓe jaɗafa ba'a game kezha melɛ kejikə ghə.

¹⁵Katekele kwaciga ta ɗafa nyi ɗema tenjɛne hwe nyi takɛ mbeli le n'yi, ɗafa kwalekwala nyi ɗema tenjɛne hwe nyi yisəaghe n'yi mbeli kənə, tsagha wəshi gəməa hə ba'a tɛ keɓasle ŋkɛ kase.

¹⁶Katefə wəshi gəməa shɛhɛ nde dzeghe Shala kadzawa kema ta Mahwətə ba'a katedzeghe melɛ keyaɓe jaɗafa ba'a melɛ kwa tere tere ŋkɛ.

¹⁷Kwa sebe ta ŋkɛ ne, katedzeghe melɛ kejikə ghə ŋkɛ le game kadzeyitea kwaciga ta ɗafa nyi ɗema tenjɛne hwe. Kakwa keɗaŋe ne, katefə nda hə ba'a tɛ keɓasle ŋkɛ ke Mahwətə.

¹⁸Ma vəa ŋkwa shɛ gɛ, kateŋsə ghəa ŋkɛ nya keveyi geva tekeleke wəndəa shɛ mɛa cɛ lekwesa kebegeme geva ba'a katebete shintia shɛhɛ ŋkɛ mɛa ghwə nya yitea melɛ kejikə ghə.

¹⁹Katekele pehwepe kwa pesa pesa ta game, ɗafa kwalekwala kwetɛŋe same kwa kwaciga ba'a ɗafa kwalekwala nya ɗema tenjɛne hwe kwetɛŋe nde dzeghe Shala kezha bete nda hɛ mbe dzeve ke wəndə shɛ, kwa sebe ta nya ŋsəmte shintia ghə meɗe mɛa ŋkɛ ŋkɛ.

²⁰Kateve wəshia shɛhɛ nde dzeghe Shala kwa kema ta Mahwətə laka ɓela gəsəkəa ve nda wəsə. Kaŋa nde dzeghe Shala tenza wəshi gəməa shɛhɛ kadzevare medzeŋezle ba'a seɗa nyi keveyi geva kaŋa ŋkɛ. Tagha gɛ ne, wərə wəndəa shɛ kasa tɛ.

²¹Nya ya kaghena nya kegeze geva kaŋa wəndə nya kemeɗeyi ve nda ghəa ŋkɛ tekeleke ke Mahwətə. Nyi ya kawəshi gəmə nyi fə nda ŋkɛ kezha meɗe mɛa ŋkɛ. Ma kenza berete ve kezha mtsehe kweci wəshi ne, wərə ŋkɛ kamtsehete. Katemene wəshi nyi gezete ŋkɛ kezha meɗe mɛa ŋkɛ, kala wəshi nyi kegezete geva te ghəa meɗe mɛa ŋkɛ ŋkɛ.

²²Ma ke Mahwətə sha Moyize:

²³«Ma pa na sha yɛ Aron le ŋwalea ŋkɛ: Wa nya tsetse tewəpi ka Israyɛl yɛ:

²⁴‹Pa Mahwətə wəpikɛ ŋayɛ ba'a yate ŋayɛ!

²⁵Pa Mahwətə pelaghe ntsə ta ŋkɛ kənəa gheyɛ ba'a zhɛakɛ heli yitea gheyɛ!

²⁶Pa Mahwətə ndeke ŋayɛ ganyɛa ŋkɛ ba'a ndeke ŋayɛ kwelɛŋe!›

²⁷Ma vəa ŋkwa nya tehekɛame sləa ɗa ka dzeghe Shala kezha wəpi ka Israyɛl ne, kateve nda wəpi ta ɗa 'ya le ghəa ɗa ke hɛ.»