Read kapsiki Ɓela 8 Bible Online

Ɓela 8 - kapsiki bible

Ɓela 8

¹Ma ke Mahwətə sha Moyize:

²«Wa nya ghena nya tegeze nda na ke Aron nya: Ma vəa ŋkwa tendə ghwə na te yɛ paterela ne, nda ŋkwa nya te kema ta wəsə kentare yɛ paterela yatewaŋe paterela nyi mberefaŋe nyi.»

³Pa Aron menete slene le ghena nya gezete Mahwətə laka Moyize: pa ŋkɛ ntentareyi yɛ paterela kezha waŋe ŋkwa hɛ dzate te kema wəsə kentare hɛ.

⁴Ma wəsə kentare yɛ paterela shɛ ne, le mze kwa tere tere kwa gezla gezla ŋkɛ, se kwake te seɗa hwa'a te wəsə nya kala ghwə ta wəfe. Kala nya ncɛte nda Mahwətə ke Moyize menete geva ŋkɛ.

⁵Ma ke Mahwətə sha Moyize:

⁶«Nehemte ka Lɛvi le kweci ka Israyɛl ba'a pɛmte hɛ wɛŋe.

⁷Wa nya tsetse tepɛ hɛ na: kateyisə yɛmə na kənəa hɛ kezha kelemte geva jaɗafa, kateŋsə shinti nyi te geva ta nci hɛ pɛtɛ ba'a katetsewe lekwesa ta nci hɛ. Ma kwa sebe ta ŋkɛ ne, wɛŋe tenza hɛ.

⁸Katekele mca hɛ zlaɓe le hə nya kehwaɗe hwaɗe le n'yi. Katekele mca kwa bake na kezha dzeghe melɛ keyaɓe jaɗafa.

⁹Katehende ka Lɛvi na kase kadzemɛa cɛ lekwesa kebegeme geva ba'a katetsene pɛtɛa ka Israyɛl na.

¹⁰Katehende ka Lɛvi na kase kadzawa kema ta Mahwətə. Tagha gɛ, katedape dzeve ka Israyɛl kwa ghəa nci.

¹¹Kateve ɗa ka Lɛvi Aron tekeleke kala wəsə gəmə nya kese va ka Israyɛl. Tagha gɛ, katenza hɛ kaka mene ɗa slene.

¹²Ma kwa sebe ta ŋkɛ ne, katedape dzeve ka Lɛvi kwa ghəa mcɛmcɛli nyi. Katedzeghe ɗa melɛ keyaɓe jaɗafa Aron le kwete mca. Nahe kwete kenza kezha dzeghe melɛ kwa tere tere, nda teɓela gəsəkə kele jaɗafa seyi te wənə ŋkɛ kənəa ka Lɛvi.

¹³Kateve ka Lɛvi na kwa kema ta yɛ Aron le ŋwalea ŋkɛ. Tagha gɛ, kateve ɗa hɛ na tekeleke, 'ya Mahwətə.

¹⁴Ma tsetse ne, kateve ka Lɛvi na tekeleke le kweci ka Israyɛl. Ma tsagha gɛ, kaŋa ɗa tenza hɛ.

¹⁵Ma se mɛa vəa shɛ ne, katese ka Lɛvi kamene slene mbe cɛ lekwesa kebegeme geva. Tsagha ne, katepɛ hɛ na ba'a kateve ɗa hɛ na tekeleke.

¹⁶Kwa nza ŋkɛ ne, ke 'ya ndeke geva hɛ hwa ka Israyɛl. 'Ya nde veyi hɛ te ŋkwa ka tezhɛa kɛfia ka Israyɛl.

¹⁷Kwa nza ŋkɛ ma ka tezhɛa kɛfia ka Israyɛl ne, ŋa ɗa hɛ, ka tezhɛa kɛfia mbeli ba'a ka tezhɛa kɛfia wəshi keseɗa. Ma te veci nya mpəmte ka tezhɛa kɛfi 'ya te hɛɗia Ɛzhipte ne, nahe 'ya keveyi hɛ tekeleke kaŋa ɗa.

¹⁸Nahe 'ya keveyi ka Lɛvi te ŋkwa ka tezhɛa kɛfia ka Israyɛl.

¹⁹Nahe 'ya kendeke hɛ ke yɛ Aron le ŋwalea ŋkɛ. Hwa ka Israyɛl ne, nahe ka Lɛvi kendeke nda geva ke hɛ kezha mene nda slene ke ka Israyɛl mbe cɛ lekwesa kebegeme geva ba'a kezha ɓela gəsəkəa kelemte jaɗafa kənəa hɛ. Ma tsagha, kateme ndiremi te ka Israyɛl va nya hendave nda geva hɛ ke ŋkwa nya keveyi geva tekeleke we.»

²⁰Tserame Moyize, Aron ba'a pɛtɛa ka Israyɛl menete wəshi nyi gezave nda Mahwətə ke Moyize te ghəa ka Lɛvi.

²¹Wɛŋe ka Lɛvi pɛmte geva ta nci ba'a tsewemte lekwesa ta nci. Kwa sebe ta ŋkɛ, pa Aron veyi hɛ tekeleke kaŋa Mahwətə ba'a ɓelate gəsəkə yaɓe jaɗafa ba'a pɛ ŋkwa wɛŋe kənəa hɛ.

²²Kwa sebe ta ŋkɛ, ntake ka Lɛvi kamene slene ta nci mbe cɛ lekwesa kebegeme geva, kwa kema ta yɛ Aron le ŋwalea ŋkɛ, kala nya gezave nda Mahwətə ke Moyize te ghəa nci.

²³Ma ke Mahwətə sha Moyize zhɛkwa:

²⁴«Wa nya ghena nya kegezete geva te ghəa ka Lɛvi nya: se te va bakemsə mcɛfeghəmbe ne, wərə nde kamene slene mbe cɛ lekwesa kebegeme geva.

²⁵Ma se te va mcɛfemsə ne, katesərə slenea shɛ ŋkɛ, katezhɛne ŋkɛ kamene slene we.

²⁶Wərə ŋkɛ kakemane ka menəhɛnyɛ vəa ŋkwa nya mene slene hɛ mbe cɛ lekwesa kebegeme geva, ama katenza slene ve le ghəa ŋkɛ we. Wa nya tsetse tetseɓa slene ta ka Lɛvi na.»