Read kapsiki Ɓela 9 Bible Online

Ɓela 9 - kapsiki bible

Ɓela 9

¹Pa Mahwətə gezete nda ghena ke Moyize te ɓerama ta Sinay mbe kwa ghate ta tere mbe va kwa bake kwa sebe ta shave ta ka Israyɛl mbe Ɛzhipte. Ma ke shɛ:

²«Nda ka Israyɛl kamene gəsəkəa Pake te hɛ nya kenteyi geva.

³Mbe kwa meŋe wəfaɗeghəmbe ta hɛ te tere shɛ temene gəsəkəa shɛ yɛ, hetɛhwɛɗi. Katemene ŋkɛ yɛ kala ghena ba'a wəshi nyi kegezete geva te ghəa ŋkɛ.»

⁴Pa Moyize gezave nda ke ka Israyɛl kamene Pake.

⁵Pa hɛ menete gəsəkəa shɛ hetɛhwɛɗi, te kwa meŋe wəfaɗeghəmbe ta hɛ mbe tere kwa ghate, te ɓerama ta Sinay. Tserame ka Israyɛl menete kala nya gezave nda Mahwətə ke Moyize.

⁶Ama wale wale nzanji kweci mbeli va nya kekwaɗakɛ wəndə kemte mte hɛ te vecia shɛ. Vatse ne, kamenete Pake hɛ we. Cape hɛ kalə sha yɛ Moyize le Aron,

⁷ma ke hɛ sha Moyize: «Wale wale ghen'yɛ va nya kwaɗakɛ wəndə kemte mte n'yɛ. Va wa ɗema hweŋkwa va ghen'yɛ kafə nda wəshi gəməa n'yɛ kase ke Mahwətə te hɛ nya kenteyi geva kala kweci ka Israyɛl wa?»

⁸Ma ke Moyize zhɛnete: «Ntsagwe mə kaba nda fate wəsə nya geze Mahwətə te ghəa ŋayɛ 'ya.»

⁹Ma ke Mahwətə sha Moyize:

¹⁰«Ma pa na sha ka Israyɛl: Ma vəa ŋkwa nya tenza wəndə wale wale va nya kwaɗakɛ wəndə kemte mte ŋkɛ keɗema kenza ŋkɛ kwamte dzeghwa nya cakeɗa ne, katemene nda Pake ŋkɛ ke Mahwətə. Tsagha tenza ŋkɛ kaŋa ŋayɛ ba'a kaŋa hwelefefia ŋayɛ.

¹¹Ma te kwa meŋe wəfaɗeghəmbe ta hɛ mbe tere kwa bake, hetɛhwɛɗi ne, katemene Pake mbelia shɛhɛ. Katezeme zhɛgwə təmə hɛ le ɗafa kwalekwala ba'a gwəzə nyi 'yaghwa 'yaghwa.

¹²Katetene hɛ kamasheke we. Katempə 'yɛ'yɛa wəsə keseɗa shɛ hɛ we. Katemene Pake hɛ kala ghena nya kegezete geva te ghəa ŋkɛ.

¹³Ama kepeleyite se wəndə nya wɛŋe ba'a nya keɗema kedzemte dzeghwa yitea mene Pake ne, kateŋkamte geva ŋkɛ shave hwa jikə ta ka Israyɛl, va nya ɗema ŋkɛ kefəke nda wəshi gəməa ŋkɛ kase ke Mahwətə te hɛ nya kenteyi geva. Kwa ghəa wəndəa shɛ tenza fete ta ŋkɛ.

¹⁴Ma keɗe nde se se nya te hɛɗia ŋayɛ kamene nda Pake ke Mahwətə ne, katezele ghena ba'a wəshi nyi kegezete geva ŋkɛ te ghəa Pake. Gəsəkə nya kwetɛŋe yateɓela yɛ nde se se le nde Israyɛl.»

¹⁵Ma te veci nya mɓete geva cɛ lekwesa nya keveyi geva tekeleke ne, pa meləkwə ləkwə se ba'a zhiɓəaghe geva kənəa cɛ lekwesa nya nza səndəkwəa jikə geva mbe. Ma se va hetɛhwɛɗi pa va masheke ne, pa meləkwə ləkwəa shɛ zhɛrenyɛ kala ghwə.

¹⁶Ma se mɛa vəa shɛ ne, tsagha nzanyɛ ŋkɛ: meləkwə ləkwə ya kənəa cɛ lekwesa nya keveyi geva tekeleke. Ma heviɗi ne, kazhɛre ŋkɛ kala ghwə.

¹⁷Ma te yayata və nya dzeme meləkwə ləkwə kənəa cɛ lekwesa ne, taghanyɛ slə ka Israyɛl. Ma te yayata ŋkwa nya sawa meləkwə ləkwə kənə ne, tagha mɓe cɛ lekwesa ta nci hɛ.

¹⁸Nda Mahwətə kagezete nda slə ka Israyɛl ba'a nda Mahwətə kagezete nda mɓe cɛ lekwesa ta nci hɛ. Tagha nza hɛ kala temə ta meləkwə ləkwə kənəa cɛ lekwesa.

¹⁹Ma vəa ŋkwa nya temə meləkwə ləkwə kənəa cɛ lekwesa ne, hawe yahawe ka Israyɛl va Mahwətə, kaslə hɛ we.

²⁰Ma mbe kweci və ne, kahɛ ɓɛhwɛ temə meləkwə ləkwə kənəa cɛ lekwesa. Nda Mahwətə kagezete nda mɓe cɛ lekwesa ta nci hɛ ba'a nda Mahwətə kagezete nda slə hɛ.

²¹Ma mbe kweci və ne, se va tɛhwɛɗi pa va masheke, keɗema ne, kaveci zake ba'a kaviɗi zake nza meləkwə ləkwə nahe. Ma dzemema ta ŋkɛ ne, kaslə ka Israyɛl.

²²Ama kenzanyɛ meləkwə ləkwə kənəa cɛ lekwesa kahɛ bake, katere zake, keɗema kava zake ne, tagha nza ka Israyɛl, kaslə hɛ we. Ma dzemema ta ŋkɛ ne, kaslə hɛ.

²³Nda Mahwətə kagezete nda mɓe cɛ lekwesa ta nci hɛ ba'a nda Mahwətə kagezete nda slə hɛ. Hawe yahawe hɛ va Mahwətə kala nya gezete Mahwətə laka Moyize.