Read kapsiki Mishɛ 2 Bible Online

Mishɛ 2 - kapsiki bible

Mishɛ 2

¹Ɗa ya te mbeli nyi kezəzə wəsə kwa ndiremi, nyi kehi geva yitea beze ghena heviɗi! Kiɗima ta ŋkwa ne, ntəŋə hɛ yitea mene hɛ, kwa nza berete va hɛ.

²Ma kemawehwe yɛ wəve hɛ ne, pa hɛ zləgwəhwe hɛ. Ma kesləyite ntsə hɛ yitea yɛ ghɛ ne, pa hɛ fəhwe hɛ. Ntəŋə hɛ yitea mene berete te mbeli keghɛ ba'a mbelia nci laka fə wəshia nci.

³Vatse gɛ ne, wa nya ghena nya geze Mahwətə nya: «Nahe 'ya ketarete ve ndiremi kadzete mbelia shɛhɛ. Kambele ŋayɛ yɛ ve we, kazhɛne yɛ kadzeghwa le kema yitea ghweme, kwa nza ŋkɛ ne, kavəa ndiremi tenza ŋkɛ.»

⁴Ma te vecia shɛ ne, katenehwene mbeli kənəa gheyɛ. Ma ke mbeli sha tegha nehwene: «Pɛtɛ mbeli kefəhwe wəshia n'yɛ. Mba yɛ wəve va mbelia n'yɛ we. Nahe ka jaga ta n'yɛ kenehehwe hɛ. Wa raberə fəhwe wəshia n'yɛ mbeli wa?»

⁵Vatse gɛ, wəndə shɛ hwa gheyɛ katekemave wəve nya tezhɛne mbelia Mahwətə kanehe we.

⁶Ma ke kweci sha ŋele ɗa: «Sərəakɛ tseha mɛa ŋa. Nda mbeli katsehate mɛ kezha ncɛ hawe nya ketenza te ghen'yɛ we.

⁷Nahe ka Israyɛl kenza kebezla bezla na? Wənəakwe Mahwətə va zereghe ghena na? Tsetse seneve ŋkɛ kamene ghalanza na?» Ma 'ya le ŋa ɗa ne, ghena ganji yageze nda 'ya ke mbeli nyi kedzeghwa tiɗiɗi.

⁸Ama ma ke Mahwətə sha gheyɛ: «Ka ghema ta mbelia ɗa yɛ. Lekwesa yaseɗe yɛ kənəa mbeli nyi kesheke kwamte mpa ba'a kənəa nyi kedzeghwa mbe kwelɛŋe.

⁹Ŋkwase yɛ ŋkamte mia mbelia ɗa shave ki ghɛ nyi ɗehwe hɛ. Pa yɛ kelehwe zləvə nya vate 'ya te ŋwalea nci kaghala ghala.

¹⁰Sate mə te ŋkwa kaslə. Və kezhɛne mpi nya we. Ndiremi ya te hɛɗi va nza ta ŋayɛ wale wale. Vatse tesa yaka yɛ kwele kwele.»

¹¹Kweci mbeli nyi ketseha mɛ ba'a nyi keteghe tseŋwə ya shɛ. Ma ke hɛ sha geze: «Tɛ ba'a wəshi nyi keghwəyi ŋkwa yatesa yɛ.» Nde tseha mɛ nya kala nya nde hi kaŋa mbeli nyi.

¹²Ma 'ya, 'ya Mahwətə: «Katetsene ŋayɛ 'ya pɛtɛ, mbelia Zhakob, katerəkwə ŋayɛ 'ya, ka Israyɛl nyi mba teghweme. Katerəkwə hɛ 'ya kala timɛti kwa zlema ta nci, kala wəshi keseɗa te ŋkwa kezeme gwəzə ta nci. Katenza mbeli nyi ketseha mɛ shɛ kwele kwele.

¹³Te kema ta ŋayɛ tedzeghwa wəndə nya keteghwene hweŋkwa. Waɗe nza yɛ, kapele mɛ degha yɛ ba'a kashave yɛ kwa. Mahwətə nya kameghea ŋayɛ nde tenza te kema ta ŋayɛ.»